¹ Apwiya yaahomuulumana Moises, ni yaahiira: ² Waattarusse athu owiisrael mwaha waamedianita. Yaviraka eyo, onaahala okhwa ni on'hala othukumana naatthwaa. ³ Vano Moises aahowiirela atthu, iiraka: Mwaatthonkomanihe atthu wiira arwee oMidia ni mwapanke nttarusso waaPwiya. ⁴ Nloko nowiisrael nooteene ninaahala waaveleeliha anakhotto ekonto emotja okhottoni. ⁵ Tjitjon'mo waatthu ekonto ekontotjene owiisrael, yaahovahatjiya atthu ekonto emotja wakhula nloko okhotoni. Otakanihiyawaya ooteene yaari ekonto khuumi napiili. ⁶ Vano, Moises ahaaveleeliha okhottoni, ekonto emotja wakhula nloko, vamotja ni Fineias, mwaana nankuttho Eleazar, ni tjitthu tjooreerela tjonipuro ttakattiifu ni mapenka, wiira arumihiyeke yaphiya ewoora. ⁷ Yaahowana ni Mdia, phnaka aPwiya tjan'himeeryalyaaya Moises. Yaahowiiva atthu ooteene. ⁸ Vamotja naatthu ookhwa ooteene, yaahowiiva mamwene tjooMidia, Evi, Requem, Zur, Hur ni Reba, mamwene athanu ooMidia. Yaahowiiva tootho Balaao, mwaana Beor, niikatana. ⁹ Anakhotto owiisrael yaahaavarakatja athiyana ooMidia, naasaanaaya, enamatjooteene, mihuwo nimihakhu tjooteene. Yaahokussatja phanka tjawaya. ¹⁰ Yaahopahatja epooma tjooteene tjaakhalaaya, nimapuro yaathukumanaaya ooteene. ¹¹ Yaakussatjale phanka tjawaya naaperetju, atthu niinama. ¹² Yaahowaanatja tjitthu tjooteene, tjitthu tjaakussiye wa Moises, wanankuttho Eleazar naatthu owiisrael Yaahowaanatja waakhalaawe Moabe, nphantte wa jordao, waattamenla Jerico. ¹³ Moises, nankutthu Eleazar naahooleli ooteene yaahorwaa nphantte nkhwaawe waaathukumaniye. ¹⁴ Massi Moises aari oorussiya naakhulupale aanakhotto, naahooleli aatthu ekonto , naahooleli aathu emiya, yaawaale okhottoni. ¹⁵ Moises aahowiirelatja: N'haahiyatja athiyana ooteene akumi? ¹⁶ Nkaweha, ayo yaari athiyana, yaahimeeriye ni Balaao, yaatthekihale atthu owiisrael waaPwiya mwaha wa Peor, owakathi assinttuuttu wamwareelalyaaya waatthu aaPwiya. ¹⁷ N'nava, mwiive anamwane ooteene, naathiyana ooteene arupale ninlopwana nkhwaawe. ¹⁸ Massi mwaakusse assithiyana ahinarupa ninlopwana. ¹⁹ Mwakhalatje ota wonthukumano owiisrael womahuku saapa. Ooteene wayaale amwiivale ntthu wala ankwanhale ntthu ookhwa, ahaana yiirapihaka nihuku noneeraru nihuku nonasaapa, nhuuvaatja naaperetjwiinhu. ²⁰ Nrapihe ekuwo tjooteene, yooteene evariye niinama, ni yooteene epankiye niithaapwa. ²¹ Nankuttho Eleazar aahowiirela anakhotto yaarwaale okhottoni: Ela ekettelo ehimyatjiye naaPwiya en'vahalyaaya Moises: ²² Ewooru, eparatha, eporontje, efeero, elatao niichumbu, ²³ ni yeele ehin'hala ovya vamooroni, tjinaahala ovira vamooroni. Vano tjin'hala okhala tjoophwanela. Vano, n'nohala orapihatjitthun'nho nimaatji oorapiha. Yooteene ehin'hala ovira vamooroni en'hala oreerihiya nimaatji yaale. ²⁴ N'nohala okattha ekuwotjinhu nihuku nonasaapa, vano n'naahala okhala ooreera. Vano, n'naahala okela munthukumanoni owiisrael. ²⁵ Vano, aPwiya yaahomwiirela Moises yiiraka: ²⁶ Waalikele tjitthu tjooteene tjikussiye, waatakaniha atthu niinama. We, ninankuttho Eleazar, naahoooleli omunttettheni nimahimo aatthu okhalayi. ²⁷ N'nohala okawaniha mihakhun'nho miphantte miili, waatthu yaarwaale okhottoni, ni yaahanle munttettheni. ²⁸ Waatthu yaarwaale okhotoni, npanke tjootjanka tjawaka. Ntjanko yoola on'hala okhala, waatthu, mihuwo, wonama, wopwittipwitthi niimope. ²⁹ Okussatje ntjankooyo wonphanttyaayatja ni onvahe nankuttho Eleazar, phanka yoovahiyaaka. ³⁰ Tootho nuussu naatthu owiisrael, on'hala okawaniha, atthu, enama, mihuwo, epwittipwitthi niimope. Waaahatje alevita ankhlenlatja enupaaka. ³¹ Vano, Moises ni nankuttho Eleazar yaahopankatja phanka aPwiya tjaamyiirelalyaaya Moises. ³² Tjoohala tjaakussalyaaya anakhotto tjaari epwittipwitthi ekonto emiyasita wosapiini nathanu. ³³ Emope ekonto sapiini napiili. ³⁴ Enama ekonto sapiini namotja. ³⁵ Nimimyaaruussi ekonto talaathiini neeli. ³⁶ Nuussu naahalihiye naanakhotto tjaari epwittipwitthi ekonto emiya tthaaru wotalaathiini nasaapa. ³⁷ Nphantte waaPwiya wopwittipwitthi tjaari emiya sita wosapiini nathanu. ³⁸ Emope tjaari ekonto talaathiini nasita, wotjen'nho mitjanko tjaaPwiya tjaari sapiini napiili. ³⁹ Enama tjaari ekonto talaathiini niimiya thanu, wotjen'nho nphantte waaPwiya tjaari ssuthwiini namotja. ⁴⁰ Athiyana yaari ekonto khuumi nasita, woyaayo otjankiya waaPwiya yaari talaathiini neeli. ⁴¹ Moises aahokussa tjotjankiya wiira ejhale tjoovahiya yaaPwiya. Yena aahonvaha nankuttho Eleazar, phanka tjaahimeeriyaawe Moises. ⁴² Owakathi Moises waakussalyaawe nuussu waatthu owiisrael arwaaka okhottoni: ⁴³ Nuussu naatthu naari ekonto emiya tthaaru wotalaathiini nasaapa niimiya thanu, ⁴⁴ emope tjaari ekonto talaathiini nasita, ⁴⁵ enama ekonto talaathiini niimiya thanu, ⁴⁶ naathiyana ekonto khuumi nasita. ⁴⁷ Nuussu naatthu owiisrael, Moises aahaakussa atthu niinama. Yena aahaavaha alevita yaakhalenla enupa yaapwiya, tjitjon'mo aPwiya tjaahimyalyaaya. ⁴⁸ Vano akhulupale aanakhotto, ahooleli aatthu ekonto emotja, naakhulupale aatthu emiya, yaahowa wa Moises, ⁴⁹ ni yaahomwiirelatja: Anantekweenhu ahowaalikela anakhotto yaarineehu, ni khaavo ntthu n'haleela. ⁵⁰ Nihowaana yoovahiya aPwiya, wakhula ntthu ephwanhalyaawe, tjitthu tjowooru, epulseera, anela, mikhova, wiira nikhalane ohoolo waaPwiya. ⁵¹ Moises ni nankuttho Eleazar yaahaakhenlatja ewooru nitjitthu tjooteene tjaapankiye. ⁵² Ewooru yooteene yaavahiye aPwiya tjoovahiya naahooleli aatthu ekonnto emotja nakhulupale aatthu emiya olemelawaya tjaari ekiilu ekonto khuumi nasita wohansiini. ⁵³ Khula nakhotto aahokussa, khula ntthu yawawe. ⁵⁴ Moises ni nankuttho Eleazar yaahokussatja ewooru yaahooleli aatthu ekonto emotja naakhulupale aatthu emiya emotja. Ayenatja yaahorweeha n'heemani wonthukumano, phanka muupuwelelo waatthu owiisrael waaPwiya.