¹ Moises aahowiirela ahooleli omakhoto aatthu owiisrael, iiraka: Ela Apwiya phin'himyaaya. ² Ntthu apankaka yoothanliya waPwiya, wala oluphela wookhuluveliha, khan'hala ohanhuriha nuulumonawe. Npaka opankeke ekhuluvelihalyaa. ³ Akhalaka nthiyana, ookhalaniyaka waathumwaane, napankale yoothanliya waaPwiya ni akhuluvelihaka. ⁴ Ni athumwanawe yiiwaka ekhuluvelihalyaawe, ni athumwaane woohuulumatjeetthu, othanlawawe onaahala okhalalela. ⁵ Athumwanawyaayo yiiwaka ekhuluvelihalyaawe wala ethanlalyaawe khuhiireetthu enaahala okhalela. ⁶ Watjooteene, yatheliyaka anarina tjookhuluveliha wala tjoothanliya nmattereniwaya. ⁷ Ni awan'nhayaayo khuhipankeetthu yiiwavale, tjookhuluvelihatjayanýo tjinaahala okhalela. ⁸ Massi awan'nhayaayo yavaanhiha yiiwavale, anaahala ohiya tjoothanlatjaya, wuuluma womalakwaaya. Apwiya anaahala wunteeliha. ⁹ Akhalaka nthupa wala nthiyana oomwalaniya, tjookhanhenriya tjooteene tjin'halaaya ovara tjinaahala okhalela. ¹⁰ Nthiyana akhalaka ootheliya apankaka yothanliya, yapankaka yookhuluvelihiya nooluphela. ¹¹ Ni awan'nhawe khutjuwela ni khuhaavaanhiha, tjoothanliya tjooteene tjinaahala okhalela. ¹² Massi awan'nhawe, yiiwakavale, avanhihaka ekhuluvelihalyaaya, vano en'hala okhala yooteene, yuulumalyaaya wamalakuniwaya, tjoothanlatjawe wala tjookhuluvelihiya khatjin'hala okhalela. Apwiya anaahala omaliha. ¹³ Yoothanliya yooteene wala yookhuluvelihiya en'hala opanka nthiyana, ni akhottaka eethu, enaahala waamineeliya wala okhotthiya naawan'nhawe. ¹⁴ Massi yena eehaavaanhihe mahuku ooteene, naahala okupaleela tjookhuluvelihatjawe wala tjoothanliyatjawe. Yena nkupaleela kontha khaahimeeryale owakathi waapankaaya. ¹⁵ Ni awan'nhawyaayo yaateeliha tjookhuluvelihiya tjaamwaarawaayo owakathi mwintji wiiwalyaawe tjookhuluvelihiya, vano yena naahalana tjoottheka tjaamwaarawe. ¹⁶ Ala malamulo Apwiya yan'himeeryalyaawe Moises wiira aahimeeryatje, malamulo yaawaaniye mwaha wanlopwana naamwaarawe, ni mwaha waathumwaane nimwaamwanaya, yiira anari nanttonpe waathumwaane.