¹ Nihuku nowantjera womweeri wonasaapa, n'nohala okhalana nthukumano ttakattiifu wowaattittimiha aPwiya. Khan'nohala ovara nteko nen'no nihukun'no, nin'hala okhala nihukuninhu nowoopa mapenka. ² N'nohala waavaha aPwiya yoovahiya yoopahiya, woopankiya nuunukhela; epwittipwitthi emotja, enama emotja niikhontwaa saapa tjoolopwana tjomwaakha n'motja tjeeyareelo, tjoohirakala. ³ N'nohala ovaha, vamotja nitjen'nho, ephepa yootakaniheriya makhura, ekiphantte tthaaru tjonakhuumi yopwittipwitthi, ekiphantte piili tjonakhuumi yonama; ⁴ ninphantte n'motja wonakhuumi wakula ekhontwaa tjoosaapa. ⁵ N'nohala ovaha ntiita n'motja woopheela owaapulani etanpitjinhu. ⁶ Nreerihe tjoovahan'nha mweeri wonasaapa, ntakanihaka tjoovaha tjooteene tjin'haleenhu ovaha nihuku nowantjera wakhula mweeri: Yoovahiya yoopahiya ni yoovahiya tjotthaka tjinaahala oveleela tjoovahiyan'nho. Yoovahiya yoopahya, tjotthaka ni tjonipha tjin'hala otakanihatjiya. Phanka tjitjon'mo tjaapankiyaaya tjoovahiya, n'nohala wiiwelela ehimyatjiye woopheela opanka yooreera, phanka yoovahiya yaaPwiya. ⁷ Nihuku nonakhuumi nomweeri wonasaapa, mwapankatje nthukumano ttakattiifu wowaattittimiha aPwiya, mwiiyevihe ni n'hivare nteko. ⁸ N'nohala ovaha yoopahiya wiira npanke yowaatjivela aPwiya. N'nohala ovaha epwitipwitthi emotja, enama emotja niikhontwaa saapa tjoolopwana tjoyaakha emotja tjeeyareelo, tjoohirakala. ⁹ N'nohala ovaha niitthaka, niiphepa yootakaniheriya makhura, ekhipantte tthaaru tjonakhuumi weepwittipwitthi, ekhipantte piili tjonakhuumi weenama, ¹⁰ niikhontwaa saapa ekhipantte emotja. ¹¹ N'naahala ovaha enama yoolopwana. Eyo en'hala otakaniheriya yoovaha mwaha wotanpi woopheela owoopolani, tjoovahiya tjokhula nihuku, tjoovahiya tjotthaka nitjoovahiya tjonipha. ¹² Nihuku nonakhuumi namathanu womweeri wonasaapa, n'naahala opanka nthukumano wowaattittimiha aPwiya khan'nohala ovara nteko n'nohala okhala niisukuhuulu yomahuku saapa. ¹³ N'nohala ovaha yoopahiya, okuttho woopahiya wiira npanke yowaatjivela aPwiya. N'nohala ovaha epwittipwitthi khuumi natthaaru, enama piili nikhontwaa khuumi natjesse tjoyaakha emotja tjeeyareelo. Tjoohirakala. ¹⁴ N'nohala ovaha, vamotja nitjen'nha, tjoovaha tjotthaka, ettuva yophepa yootakaniheriya makhura, ekhipantte tthaaru wonakhuumi wakhula epwittipwitthi, ekhipantte piili wakhula enama, ¹⁵ niikhipantte emotja yonakhuumi wakhula ekhontwaa. ¹⁶ N'nohala ovaha enama emotja mwaha wotanpi watjoovaha tjoovaha tjoopahiya, tjoovahiya tjooreerela ni tjonipha. ¹⁷ Nihuku nonayeeli nonthukumano, n'nohala ovaha epwittipwitthi khuumi napiili, enama piili niikhontwaa khuumi natjesse tjoolopwana tjoyaakha emotja tjeeyareelo, tjoohirakala. ¹⁸ N'nohala otakaniha nitjoovaha tjooreerela nitjonipha. ¹⁹ N'nohala ovaha enama yoolopwana mwaha wotanpi wootakaneela tjoovaha tjokhula nihuku tjoopahiya. ²⁰ Nihuku nonayeeli nonthukumano, n'nohala ovaha epwittipwitthi khuumi namotja, enama piili, niikhontwaa khuumi natjesse tjoolopwana tjoyaakha emotja tjeeyareelo, tjoohirakala. ²¹ Mwavahe etthaka ni nipha, epittipwitthi enama niikhontwaa, nvahaka tjoovaha tjintji phanka tjihimiyaaya. ²² N'nohala ovaha enema emotja yoolopwana mwaha wotanpi, vamotja nitjoovahiya tjoopahiya, tjoovahiya tjotthaka nitjonipha. ²³ Nihuku noneetjesse nonthukumano, n'nohala ovaha epwittipwitthi khuumi, enama piili niikhontwaa khuumi natjesse tjoyaakha emotja tjeeyareelo, tjoohirakala. ²⁴ Mwavahe tjoovaha tjotthaka ni tjonipha, noovaha tjooteene phanka tjihimiyaaya. ²⁵ N'nohala ovaha enama emotja yoolopwana mwaha wotanpi wootakaniha tjoovahiya tjokhula nihuku. ²⁶ Nihuku noneethanu nonthukumano, n'nohala ovaha epwittipwitthi naane, enama piili niikhontwaa khuumi natjesse tjoolopwana tjoyaakha emotja tjeeyareelo, tjoohirakala. ²⁷ Mwavahe tjoovaha, npankaka tjoteene phanka tjihimiyaaya. ²⁸ N'nohala ovaha enama yoolopwana mwaha wotanpi otakaniha nitjoovaha tjoopahiya tjokhula nihuku. ²⁹ Nihuku nonasita nonthukumano, n'nohala ovaha epwittipwitthi khentta, enama piili niikhontwaa khuumi natjesse tjoolopwana tjoyaakha emotja tjeeyareelo, tjoohrakala. ³⁰ N'nohala ovaha tjoovaha, npankaka phanka tjihimiyaaya. ³¹ N'nohala ovaha enama yoolopwana mwaha wotanpi wootakaniha tjoovahiya tjoopahiya tjokhula nihuku. ³² Nihuku nonasaapa nonthukumano, n'nohala ovaha epwittipwitthi saapa, enama piili niikhontwaa khuumi natjesse tjoyaakha emotja tjeeyareelo, tjoohirakala. ³³ N'nohala ovaha tjoovahiya, phanka tjihimiyaaya. ³⁴ N'nohala ovaha enama emotja yoolopwana mwaha wotanpi, wootakaniha tjoovaha tjoopahiya tjohula nihuku. ³⁵ Nihuu nonakhentta, n'nohala okhalana nthukumano nkhwaawe. Khan'nohala ovara nteko. ³⁶ N'nohala ovha tjoovaha tjoopahiya, wiira npanke yowaatjivela aPwiya. N'nohala ovaha epwittipwitthi emotja, enama emotja niikhontwaa saapa tjoolopwana tjoyaakha emotja tjeeyareelo, tjoohirakala. ³⁷ N'nohala ovaha vamotja, npankaka phanka tjihimiyaaya. ³⁸ N'nohala ovaha enama emotja yoolopwana mwaha wotanpi wootakaniha tjoovahiya tjoopahiya tjokhula nihuku. ³⁹ Tjen'nho phin'haleenhu waavaha aPwiya n'masukuhuuluni. Ntakaniheraka tjoothanlatjinhu ni tjoovaha tjowiivahenra, ni tjitjon'mo phanka tjoovahiya tjoopahiya. ⁴⁰ Moises aahowiirela atthu owiisrael tjooteene aPwiya tjaamwiirelalyaaya.