¹ Apwiya yaahomwiirela Moises: ² Owiirele atthu owiisrael: Nkivahe tjookivaha owakathi wooreerela; Etjoolya tjoopahiya tjoonukhela ni tjookitjivela. ³ Onaahala owiirelatho:Ela yoovahiya yoopahiya enaavaheenhu aPwiya: Enama piili tjoolopwana tjoyaakha emotja tjeeyareelo, tjoohirakala, mahuku ooteene, tjoovaha tjoohihiyenriya. ⁴ N'nohala ovaha enama emotja owitjissu ekhwaaweyo otjootjilo. ⁵ N'nohala ovaha nphantte wonakhuumi wophepa, ni tjoovaha tjooreerela, tjootakaniheriya makhura. ⁶ Eyo yoovahiya yoonukhela yokhula nihuku yaahimyatjiye omwaako Sinai, yoovahiya yoopahiya yaaPwiya. ⁷ Yoovahiya yonipha en'hala okhala minisaaya n'motja wakhula enama. N'nohala omwaressela, nipuro nooreerihiya, yoovahiya yonipha yaPwiya. ⁸ N'nohala ovaha enama ekhwaawe yootjootjilo, ni tjoovahiya tjooreerela, phanka tjoovahiya tjoowitjissu. N'nohala ovahatho tjitjon'mo, yowaatjivela aPwiya. ⁹ Nihuku nosaapatu, n'nohala ovaha enama piili tjoolopwana, tjoyaakha emotja tjeeyareelo, tjoohirakala, nimiphantte miili tjophepa, ni tjoovahiya tjooreerela, tjootakaniheriya makhura, otakaniha ni nipha. ¹⁰ On'hala okhala ovaha wokhula saapatu, woovirikana ovaha wakhula nihuku. ¹¹ Woopatjero wakhula mweeri, n'naahala waavaha okuttho aPwiya. N'nohala ovaha epwittipwitthi piili, enama emotja, niikhontwaa saapa tjoyaakha emotja tjeeyareelo, tjoohirakala. ¹² N'nohala ovahatho ephantte tthaaru tjonakhuumi tjophepa, phanka yoovahiya yooreerela, yootakaniheriya makhura, wakhula enama, nimiphantte miili tjonakhuumi tjophepa, phanka tjoovahiya tjooreerela, tjootakaniheriya makhura wakhula enama. ¹³ N'naahala ovahatho nphantte n'motja wonakhuumi yophepa, phanka yoovahiya yooreerele wakhula enama. Yoovahiya yoonukhela; yoovahiya yoopahiya yaaPwiya. ¹⁴ Yoovahiya tjonipha naatthu en'hala okhala nuusu nonipha weenema emotja, nphantte woneeraru wopwittipwitthi emotja, ninphantte woneetjesse wokhontwaa emotja. En'hala okhala yoovajiya yoopahiya womweeri tjooteene wakhula mwaakha. ¹⁵ Phanka yoovahiya yotanpi, n'nohala waavaha aPwiya enama emotja. En'hala okhala yowintjenriya wayoovahiya tjonipha. ¹⁶ Mweeri wooteene, nihuku nonakhuumi namatjesse womweeri yooyo, naatthapenliya paaskowa aaPwiya. ¹⁷ Nihuku nonakhuumi namathanu womweeri yooyo en'hala okhala essukuhuulu. Yomahuku saapa, n'nohala okhuura ephaawu yoohimiropo. ¹⁸ Nihuku nowantjera, onaahala okhala nthukumano wooreerihiya wowaattittimiha aPwiya. Khan'nohala ovara nteko nen'no nihukun'no. ¹⁹ Phimaana n'nohala ovaha yoovaha yoopahiya waPwiya. N'nohala ovaha epwittipwitthi piili, enama emotja, niikhontwaa saapa tjoolopwana tjomwaakha n'motja tjeeyareelo, tjoohirakala. ²⁰ N'nohala ovaha, vamotja niipittipwitthi, tjoovaha tjooreerela tjophantte tthaaru tjonakhuumi tjophepa, yootakaniheriya makhura ni miphantte miili tjonakhuumi niinama. ²¹ Wakhula ekhontwaa tjoosaapa, n'nohala ovaha nphantte n'motja wonakhuumi yophepa, yootakaniheriya makhura, ²² ninama emotja yowootaphulatjani etanpi. ²³ Tjitthun'nho n'nohala ovaha woovikana tjoovaha tjoowitjissu, tjiri tjoovaha tjokhula nihuku. ²⁴ N'nohala ovaha khula nihuku, womahuku saapa opaaskowa, woyoolya yoopahiya yowaatjivela aPwiya. Ekhalaleke yoovahiya yowintjenriya vamotja wayoovahiya yonipha. ²⁵ Nihuku nonasaapa, kinaahala woopankatjani nlattulo ttakattiifu wowaattittimiha aPwiya, ni khan'nohala ovaratja nteko nihukun'no. ²⁶ Ohiya vaa, mahuku owantjera, mwavahaka tjoovaha waaPwiya nssukuhuuluniwinhu, n'naahala opankiya nlattulo ttakattiifu wowaattittimiha aPwiya, ni khan'nohala ovaratja nteko nen'no nihukun'no. ²⁷ N'nohala ovaha tjoovaha tjowaatjivela aPwiya. N'nohala epwittipwitthi piili, enama emotja, niikhontwaa saapa tjoolopwana tjoyaakha emotja tjeeyareelo. ²⁸ N'nohala ovaha tjooreerela wootakaneela niiphepa yootakaniheriya makhura, ekiphantte tthaaru tjonakhuumi tjophepa tjootakaniheriya makhura wakhula epwittipwitthi niikiphantte piili weenama amotja. ²⁹ N'nohala ovaha nnphantte n'motja wonakhumi wophepa wootakaniheriya makhura wakhula ekhontwaa tjoosaapa, ³⁰ ninama emotja yoowaapulani. ³¹ Mwavahakavale tjen'nha enaman'nha tjoohirakala, vamotja ninipha, eyo en'hala okhala yowintjenriya watjoovaha tjokhula nihuku ni tjoovaha tjooreerela.