¹ Vano, asaana aMoises yaahowa waZelofeade, mwaana aHefer, mwaana aGileade, mwaana Maquir, mwaana Manasses, nihimo naManasses, mwaana Jose. Matjina aassaanaawe yaari phaala: Macla, Noa, Hogla, Milca ni Tirza. ² Ayenatja yaahokhalatja ohoolo waMoises, wanankuttho aEleazar, waahooleli naatthu ooteene, omakhumenloni woheema wonthukumano. Ayenatja yaahiiratja: ³ Athumwanihu akhwale moothakoni. Ayena khayaari naale yaahanhuriha aPwiya waaveleeliyaawe Core. Ayena akhwale mwaha wotanpitjaya, ni khayaarina asaana. ⁴ Ntjina naathumwanihu naahala okumiheriyani n'nihimoniwaya mwaha woohikhalana asaana? N'nivahe mapuro aasimutjaaya athumwanihu. ⁵ Vano, Moises aahokussa nuulumonatjaya arweehaka waaPwiya. ⁶ Apwiya yaahomwiirela Moises: ⁷ Assaana aZelofeade khaavonhale. Weekhweeli ohaana waavaha mapuro, phanka yoohiyeriya naasimutjaaya athumwanaya. ⁸ Atthu owiisrael onaahala owiirela: Wakhala wiira nlopwana naakhwa woohaassaana, vano n'naahala omwiirela wiira yoohiyeriya n'halana mwaana. ⁹ Aahikhalane mwaana, n'hala waavaha assihimaawe; ¹⁰ eehikhalane assihimaawe, n'nohala waavaha assihimaaya athumwanawe; ¹¹ athumwanawe yeehikhalane assihimaaya, n'nohala onvaha n'mutji on'nihimoniwaya. N'na nlamulo nin'hala weetteliya naatthu owiisrael, phanka aPwiya tjikihimeeryalyaaya. ¹² Apwiya yaahomwiirela Moises: Owele n'mamyaakoni tjoAbarim ni owehe elapo yaavahalyaaka atthu owiisrael. ¹³ Waawehakavale, niwe onaahala othukumna naatthu, phanka mwaamun'naa Arao. ¹⁴ Eyo en'hala owiiraneelani kontha n'nookitanhifu woothakoni woZim. Owakathi okhumalyaaya maatji vamwala, noorussiyawinhu, khankittittimihale ohoolo waatthu ooteene. Ala phamaatji ooMeriba ooCades woothakoni ooZim. ¹⁵ Vano, Moises aahuuluma naaPwiya ni aahiira: ¹⁶ Nhu, aPwiya, Nluku ominepa tjaatthu ooteene, munthoonhe nlopwana n'motja eriyari waatthu, ¹⁷ nlopwana n'hala oweettihera ota awaanaka npaani, wowiira atthwiinhu ahikhale phanka enama tjihirina n'hakheli. ¹⁸ Apwiya yaahomwiirela Moises: Onkusse Josue, mwaana Naum, nlopwana nkhala nin'nepaaka, omweesenre ntata yooyo. ¹⁹ Wanthoonhe wanan'kuttho Eleazar ni ohoolo waatthu ooteene, ni omwiirele ohoolo womeethwaa wiira ahoolele. ²⁰ Onaahala on'vahatjera atthu ooteeene, wiira atthu ooteene owiisrael amwiiwelele. ²¹ Yena naahala orwaa wanan'kuttho wiira arweele otthunawaka, watjootthuna tja Urim. Atthu an'hala okela nookhuma mwaha wa Josue, yena naatthu owiisrael. ²² Vano, Moises aahopanka phanka aPwiya tjaamwiirelalyaaya. Yena aahonkussa Josue ni aahonrweeha wanan'kuttho Eleazar ni waatthu ooteene, ²³ aahomweesenra matataawe ni aahomwiirela wiira ahoolele, tjitjon'mo tjiireliyaawe naaPwiya wiira apanke.