¹ Vano, ahooleli aasimutjyaaya aatthu okhalayi, nihimo naGileade, mwaana Maquir, mwaana Manasses mahimo aJose, yaahuulumatja ni Moises naahooleli, wiira yaari akhulupale aatthu owiisrael. ² Ayenatja yaahiiratja: Apwiya anowoorumani, wiira nkhale nlapo yovathi, waatthu owiisrael. Nrumiye naapwiya, wiira npanke nphantte waZelofeade, mwaamun'nihu, waasaaneenhu. ³ Massi, yathelatjiya naalopwana onloko nikhwaawe, waatthu owiisrael, elapo yovathi enaahala omyaanihiya wonphantte waatthu okhalayi. Enaahala okuminya noovukuliya wayoohiyeriyeehu. ⁴ Waphiyaka mwaakha wa Jubileu waatthu owiisrael, nphanttyaayatja onaahala otakanihiya wonihimonaya. Tjitjon'mo, nphanttyaayatja onahala okumihiya n'nihimonim mwaatthwyiihu okhalayi. ⁵ Moises aahohiya nuulumo waatthu owiisrael, mwaha wonuulumo naaPwiya. Yena aahiira: Enuuluma nihimo naJose ekhweeli. ⁶ Ela phuulumatjalyaaya aPwiya wohissima waasaana aZelofeade. Yena aahiira: Athelatjiye naatthu an'halaaya waathanla, massi athelatjiye ninihimo naathumwaane. ⁷ Khiivo yoohiyeriya yaatthu owiisrael en'hala okhuma nihimo erwaaka nihimo nikhwaawe.. Khula nihimo naatthu owiisrael an'hala waakulela yoohiyeriya nihimo naatthu okhalayi. ⁸ Khula nthiyana waatthu owiisrael n'hala ohiyeriya wonihimonawe, haana atheliyaka ni nihimo naathumwaane. Tjitjon'mo naatthu owiisrael anaahala osunka tjoohiyeriya naatthu okhalayi. ⁹ Ni tjoohiyeriya khatjin'hala ovirikana. Khula nihimo naatthu owiisrael ahaana asunkaka yoohiyeriyaaya. ¹⁰ Asaana aZelofeade yaahopanka phanka aPwiya tjaamwiirelalyaaya Moises; ¹¹ Macla, Tirza, Holga, Milca ni Noa, asaana aZelofeade, athelatjiye ninloko naManasses. ¹² Athelatjiye naamutji aasaana aManasses. mwaana Jose. Weenan'na yeeyo, tjoohiyeriyatjaya tjaahokhala n'nihimoni mwaathumwanaya. ¹³ Phamalamulo aPwiya yaavahalyaaya atthu owiisrael, mwaha wa Moises, munttettheni mwa Moabe, vamotja waJordao, oJerico.