¹ Woomaleloni, assun'naka, ninawuulepelani ni ninawuulipiherani mwa Pwiya Yesu wiira, ntoko tjakhenlalen'nhu tjen'ye tjoosomihaleehuni manan'na oweetta ni ontjiveliha Muluku, mweettele yooyo nttalooyo, wo wiira mpanke tho tjinene. ² Kontha n'naatjuwela tjoosomihiya tjuuvahaleehuni mwaha wa Pwiya Yesu. ³ N'no othuna wa Muluku, ottakattifihiya winhu, wiira mwiihuluwe mooluvani, ⁴ wakuta m'motja atjuwele owehaweha eruthuaawe wo manan'na ottakattifihiya ni ottittimihiya, ⁵ n'heettiheriyaka mwa tjootjivelatjiya, ntoko amalaponi ahinontjuwela Muluku. ⁶ Ni wiira hikhale nthu hinon'hissima aulaani onrakaliha mwaamun'nawe we nan'na yeela. Kontha aPwiya phankhala ooliviaaniha wa tjithu tjeiya, ntoko tjoohimerialeehuni ni woohoovithani. ⁷ Kontha Muluku khaniihanale wiira oonhala, massi wo wiira nkhale attakattiifu. ⁸ Phimaana, yoole nokhotta iya khanonkhottela nthu, massi Muluku, Yoole ovahaleni N'nepaawe Nttakattiifu. ⁹ N'hina wo nifeento, khawamphwanela nhu wantikheliya, kontha nhuuva n'naasomihiya ni Muluku ofentana nthu ninkhuaawe. ¹⁰ Khweeli, mpankaneke tjiitjam'mo wa athu ooteene anokhala oMacedonia. Phimaana, wuuhimeerialeehuni, assun'naka, mpankeke tjinene. ¹¹ Tjiitjam'mo wuuhimeerialeehuni okhala woovilela, okhalihera tjithu tjinhu, ni nvaraka nteko ni matata en'nhu, ntoko tjuurumaleehun; ¹² Tjitjom'mo, mweetteke saana ni yaale ontuniyani, ni khan'nohala othueiya ni ethu. ¹³ Assun'naka, khanimpheela wiira mwaakhotte wa yaale anrupa, wo wiira ahootjukulihatjeni ntoko akinaku yaale ahirina owehenra. ¹⁴ Kontha, nakupali wiira Yesu hokhua ni hovuwenla, Muluku nawaavussa yaale arupale ni Yesu. ¹⁵ Yeeleela phinuhimeeriehuni wo Nulumo na Pwiya, wiira hiivano niri akumi niwehenraka owa wa Pwiya, we khueeli khaninohala walikanana yaale akhuale. ¹⁶ Kontha aPwiya yaayo anaahala okhuruwa wiirimu akhuwelaka tjinene, ni ntju na arkanju, ni nipalapatta na Muluku, ni yaale akhuale ni Kristo phankela opatjera ovuwenla. ¹⁷ Ohoolowaya, hiivano, niri akumi, ni hivano ninkela ohala, nin'hala okussiya ni ayena m'mahutteni, wo wiira nithukumane na Pwiya n'tjulu. Wo manan'na yaala, nin'hala okhala ni aPwiya. ¹⁸ Phimaana, m'maalihane nthu ninkhuaawe ni mulumo yaala.