¹ Phimaan, vano hi khanakhalatho nivileelaka, naahoonela wiira waanaareera okhala veekha wAtenas. ² Hiivano nihoonruma Timoteo, mun'nihu ni nanteko a Muluku ooHapari ya Kristo, wo wiira olipihereni waamini winhu. ³ Nipankale tjom'mo nipheelaka wiira hikhale nthu nohala ovulussiya ni mahuviho yaala. Kontha nhuuva n'hotjuwela wiira phiwaaneliyeehu. ⁴ Wekhueeli, waariihu ni nhuuva, nihohimeeriani wiira nanaahala oohaawatja, ni ehiirania, ntoko tjintjuwelen'nhu. ⁵ Phi sariya yeela, wahakelaka ovilelatho, mi kihonruma wo wiira iitjuwele waamini winhu, pooti n'wanani, wo manan'na oovirikana, ninoottehattehaleni nteko ehu owakookhala wopure. ⁶ Massi Timoteo hohokolia ni honiwaanela ehapari yooreera mwaha wo waamini winhu ni nifento ninhu. Ntoko yena tjinihimeerialiaawe, nhuuva mwin'nonuupuwela saana ni mwinopheela onoona, ntoko ni hiivano tjimpheleehu owoonani. ⁷ Nlatto wa yeeyo, assun'naka, hiivano niholipiheriya nlatto wo waamini winhu, otjukula wihu ni ohuva wihu. ⁸ Kontha hiivano ninaakhala, mwakhala oolipa mwa Pwiya. ⁹ Mahala makavi ankovaheehu Muluku mwa nhuuva, nuutteliya orineehu eriyari ya Muluku nlatto wa winhu? ¹⁰ Ohiyu nuuthana ninoovekela tjinene wo wiira noone miphantti tjinhutjikhumenlaka wa yeele en'haleela wamini winhu. ¹¹ Mwaneene Muluku, apaapeehu, ni Pwiyeehu Yesu, anihoolele nttaleehu mpaka orin'nhu. ¹² Ni Pwiya akhale awun'nuwihakani ni intjivihe nifento nthu nikhuaawe ni athu oteene, ntoko hiivano tjinupankeehuni. ¹³ Wiira Yena alipihere mirimatjinhu, woopheela wiira n'hikhale ohivaanhihatjiya mweettakattiifuni ohoolo wa Muluku ni paapa, owa wa Pwiya Yesu ni attakattiifu aya oteene.