¹ Wa owakathi woowehenra, assun'naka, khawamphuanela wantikheliya ethu. ² N'natjuwela saaneene wiira nihuku naa Pwiya onkoowa ntoko ttapaya ohiyu. ³ Wiiriyaaya: "Nrettele ni nkhalihero", okwanhuliya wootutuseriya onawaaweela. Onkokhala ntoko oweria wooyara wa nthiyana eerukulo, ni ayena khankowoona ma thiawelo. ⁴ Massi nhuuva, assun'naka, khanri ethu muipiphini wa yooyo owakathi oyo wuphuanheni ntoko ttapaya. ⁵ Oteene winhu nri assaana omwinthukoni ni assaana oothana. Hiivano khaninakhala assaana oohiyu ni omwiipiphini. ⁶ Phimaana, nihirupe ntoko tjimpakaaya akinaku, nikhale niwehawehaka nlelo, ni nikhale owehaweha othonkomania. ⁷ Kontha yaale anorupa, anrupa ohiyu, ni yaale an'hapaliya, an'hapaliya ohiyu. ⁸ Massi, okhala wiira niri assaana oothana, nikhale owithenkatja. Niwaraka nkhalihero wo waamini ni wo nifento, ni owehenra wo woopoliya on'wa ntoko ekapacetiihu. ⁹ Kontha Muluku khaniphelenle othukeliya, massi paara woopoliya, eriyari wa Pwiy Yesu Kristo. ¹⁰ Yena phinikhuenle , wo wiira, nikhale oovuwa, wiira nikhale nkhayi ni Yena. ¹¹ Phimaana, nilipihere ni nitekane yaayoru ntoko nhuuva tjapenkeen'nhu. ¹² Hi ninawuulepelani, assun'naka, wiira mwaatjuwele yaale anvara nteko ni nhuuva, anuurattavenlani mwa Pwiya, yaale onohoolelani. ¹³ Ninawuulepelani tho mwaahissime tjinene, mwa nfento, nlatto wo nteko aya, Nkhale ni nrettele. ¹⁴ Hi ninawuulipiherani, assun'naka, mwaasomihe alolo, mwalipihere oovelavela, mwaakhavihere owooloa, nvilelaneke yaayoru. ¹⁵ Mwiirattavele wo wiira hikhale nthu nopankani yoonhala wa yoonhala, massi mwiilipihere mwa tjooreera nthu ninkhuaawe ni wa athu oteene. ¹⁶ Nkhale ntteliyaka. ¹⁷ Nvekele wo himumula. ¹⁸ Mwa tjooteene, nsukhuru, Kontha n'no phuuthuna wa Muluku, mwa Kristo Yesu, wa nhuuva. ¹⁹ N'hikhottiihe N'nepa. ²⁰ N'hihanhurihe tjohimiya. ²¹ N'wehawehe tjithu tjooteene; nkhalelaka eri yooreera. ²² N'huluwaka wa makhalelo oonhala. ²³ Mwaneene Muluku onrettele ottakattifiheni. Wa n,nepaawe woteene, eroho ni eruthu ekhale yosunkiya yohivanhihatjiya woowa wa Pwiyeesu Yesu Kristo. ²⁴ Wiihanaleni Owaamini, ni Yena nawuupakani. ²⁵ Assun'naka, n'nivekelele. ²⁶ Nsenlihaneke yaayoru ni epeetjo yeettakattiifu. ²⁷ Mi kinawuvekelelani, mwa Pwiya, wo wiira niwarakha n'na nissomiye paara assun'na oteene. ²⁸ Wa mahala aa Pwiyeehu Yesu Kristo nikhale ninhuuva.