Ewarakha 13
1
Mmuloko ni mwa Kristu a w`Antiyokiya,yahikhala-mo maprofeta ni awixuthihi. Awo ti ala: Barnaba ni Simoni,aitthaniwa-tho Oripa,ni Lusio o Kireni,ni Manaye, ``ola amwihiwe vamovya ni Herodi Antipa``,ni Saulo.
2
Nihiku nimovya yatthukawa okati wairawa Okaristiya,Eroho Yawarya yahalela wira mukithanlele Barnaba ni Saulo, wira yavare nteko kiwitthanenlaka.
3
Nna, yahitepa olonpa ni othuka: numala, yahathetterya matata, ahiya erowaka.
4
Eryumwe vyivyo ni Eroho Yawarya, Barnaba ni Saulo yahirowa o Seleusia: weiwo wawenlaya wo ekalawa, erowa vakhiviru y`o Kipero.
5
Yaphinyawa o Salamina,yahipajerya olaleya masu a Muluku mpani anthukumanamo aYuda. Nvyo Yohani Marko anikhala niyawo, anakhaliherya.
6
Awo yahethetha exyixyi yothene,mpakha o Pafo. Weiwo,yahimpwanya nlopwana mmovya mu Yuda, naxintta,aipaka okhala profeta: nvyina ne Bryisu.
7
Owo ari mpattani a Guvernatoro Serjio Paulo,mulopwana ankhili. Guvernatoro owo ahimwithaniha Barnaba ni Saulo, aramelaka wiwa masu a Muluku.
8
Masi namaxitt`owo n`igrego eniriwa Elima, anavirikanya yawo,aramelaka onhapusa Guvernatoro wira ahamini.
9
Nvyo Saulo, aithaniwa-tho Paulo avyanle Eroho Yawarya, ahinlipela.
10
Anlela wira: nyuwo,mwa muthu ovyala olavilavi ni vyotakhala sothene,mwahawa axethani,nwanani axethani othene.
11
Nvyo vo mwiwe syana: Apwiya anawohukhumu ni; Nyuwo nnokhal nlipa ohona,mhone warya wa nvyuwa mpakha okathi nkina.Nananoru,yahinkhumelela ewiriphi apajery ohona. Elima,aryukunuwelaka iphantta vyothene, aninramela nthu onpharela ntata, wira amwethihe.
12
Guvernatoro, onneiye ethu ele yankhumelenle,ahamini,atikiniwe n`itthu vyahuvyihiwa vya Apwiya.
13
Paulo ni axirikha ye, yahirowa ekala o Pafo,erowaka o Perje muththte w`o Pafilia. Nvyo Yohani Marku yahimualana ni yawo ethikelaka o Yerusalemo.
14
Nvyo yawo, evenyaka o Perje yahivira yethaka, ephiya w`Antiyokiya, muttethe w`o Pisidia. Nihiku na esabadu,yahirowa mpani mothukumana mw`aYuda, ekilathi.
15
Numala osommwa elivuru ya ikano vya Moisesi ni vyawathikiwa vya maprofeta,alupale a mpani mwa othukumana yahiruma orowa oleliwa Paulo n`akwe wira: Amuvy`ihu,mwarina mlumo awatumererya atthu,mulotte.
16
Paulo ahemela,ahitexa ntata,kwira: Nyuwo atthu a Isarayeli,ni nyuwomunimuttittimiha Muluku,nkiwiriyane.
17
Muluku a nloko nna,Muluku a Isarayeli,ahathanla axitith`ihu a kalai. Owo ahiwajerera atthu ye ,okathi yakhalawa wEjitu.Numala,ahakhumiha wEjitu n`uwerya we wulupale.
18
Ahakhapelela mothakoni mpakha iyakha miloko mixexe.
19
Owo ahipha malolko mathanu na manli,mlaponi m`o Kanani: kwavaha elapo ya atthu ye wira ekhale yawa.
20
Vyavinrawa iyakha vakhiviru miloko miloko mixexe n`iyakha miloko mithanu, ahavaha axitith`ihu makhulupale,mpakha ora profeta Samuweli.
21
Okhati uwo yahivekela wira evahiwe mwene,nvyo Muluku ahavaha Sawuli,mwan`e Kixi,a nihimo na Beniyamini, awttihenrye mpakha iyakha miloko mixexe.
22
Muluku annyanyalaka Sawuli,ahavaha yawo mwene Davidi,anttottopelaka ni molumo ala;``Komphwanya Davidi mwa`awe Yese. Ti nlopwana onethela nrim`aka: owo onrowa omaleliha otthuna waka``.
23
Mwa nloko nna,nkhama ahinm`eiye khalai,Muluku t`akumihenrye atthu a Isarayeli mopoli Yesu.
24
Yohani ahilikaniha ora we,alaleryaka atthu othene a Isarayeli wira ekurunusye mirima,erapihiwe.
25
Yohani uwo,ahalak vakhani omaliha ntekoye,ahilotha wira: ```Munona wira miyo k`ani? Miyo kahiyo ole oninlipelelannyu: owo onra ottuli waka,yowo nkinpwanela otaphula mikhoyi vya exapatto vye``.
26
Nyuwo amuvyi aka,atthu a nloko n`Abrahamu, nyuwo-tho muri vava mmutthitthimihaka Muluku:ti hiyo nivahiwe masu ala awopola.
27
Tthiri,atthu o Yerusalemu ni makhulupale ya kiyanvyuwenle Yesu,nta khiyavyuwenle molumo a maprofeta,ansommwa khula esabadu: Nna,emwiphaka Yesu,yahimalihera molumo awo.
28
Ata ahipwannye nlathu wopwanela omwiphela,yahinvekela Pilato wira emwipe.
29
Yamalihenrawa vothene vyatikinwe nlivuruni mwaha wa yowo,yahinkurusya va muwikimanyo,envitha mmahiye .
30
Masi Muluku omuhihimusya mokwani.
31
Mahiku awatha Yesu ahakhumelela ale yantthanre okhuma o Galileya mpakha o Yerusalemu. Awo t`akhanle nanano anamon`aye oholo w`atthu a Isarayeli.
32
Nave-tho yiwo ninnolaleryani Ehapar`ila Yorera wira:etthu Muluku yalaihenreiye awitith`ihu.
33
ahimaliherya wa hiyo,nikhanle an`aya ale a khalai,amuhihimusyaka Yesu mokwani. Ti vyivyo vyatikhinwawa msalmuni yanapili,wira: ``Nyuwo mwan`aka,miyo koyanreni olelo``.
34
Muluku omuhihimusya Yesu mokwani wira ahikwe-tho; ti vyivyo ahinmeiye ni molumo ala: Kinnovahani vyorera vyothene ni vy`ekekayi,kanlenlaka Davidi``.
35
Tivo nipuro nikina vyatikinwawa wira: ``Kamunwerya ohiya yinttaka erutthu ya nrumeyi nnyu``.
36
Nvyo Davidi,amalinheiye ovara miteko vya Muluku ekumi ye yotthene,ehukwa evithiwa vamovya n`axitithi ye: eruthu ye ehintha.
37
Masi ule Muluku onhihimunseiye,eruthu ye khayinthale.
38
Nyuwo axinn`aka,nvyuwele syana ehapar`il: mwa Yesu nyuwo nnovahiwa oleveleliwa itampi ni atanihiwa ni Muluku,weiwo wahaweryannyu opwannya mwahawa wa ikano vya Moisesi.
39
Tthiri mwa Yesu t`onopoliwaiye mutthu ti mutthu onimwamini yowo.
40
Nna mwikalihere wira ehokhumeleleni elo yahinmawa maprofeta wira:
41
Mwiwelele,nyuwo nninthanya Muluku! Mtikinihiwe,mmwareye! Nanlelo nyuwo nkhalaka akumi,kinrowa okhumiha nteko wothamaliha ohinweryannyu okupali,hata nthu olelakani.
42
Paulo ni Barnaba,yavennyawa mmukumanoni,yahivekeliwa wira esabatu ekina ettihike,elothe-tho ethu yele.
43
Atthu othene emwareyaka,aYuda awatha n`akina-tho yamuttittimiha Muluku ni yavyiveliwa ni mwettelo w`aYuda,yahinthara Paulo ni Barnaba. Nvyo awo yahilotha,yalipiha nrima,wira ehihiye eparaka ya Muluku.
44
Esabadu yotharelana,atthu othene a mmuttettheni,wahiya vakhani pahi,yahithukumana,wira yiwe molumo a Pwiya.
45
AYuda yonnawa othukumana wulupale vyivyo,yahivyala nrima: epajerya onvannya Paulo vyothene yothene alothaiye,nunruwana.
46
Nvyo Paulo ni Barnaba yahalela ni wilipiha wira: Ti nyuwo mwaphwanenle opajerya olaleriwa molumo a Mumluku. Nvyo nyuwo munnikhotta molumo awo: vyivyo nnoniherya wira kamunxikha ekumi ehinmala. Tivo,hiyo ninrowa walalerya atthu ahikhanle aYuda.
47
Vyivyo Apwiya t`anirummyaya wira: Miyo kihokhalihani warya wa nlaponi wothene,wira nlaleye wopowa mpakha yomaleleni wa elapo.
48
Amalapo yaiwalawa molumo ala,yahitteliwa nrima, epajerya ovuwiha molumo a Muluku. Othene ale yathanleliwe ekumi yohimala,yahamini.
49
Nvyo, masu a Muluku yahimwarela elapo yothene.
50
Masi aYuda yahatethererya atthiyana awamini,yari ovyuweliwa nmuttetheni, yahilotha-tho ni makhulupale a mmuttettheni,apajeriha onlupattha Paulo ni Barnaba,ewikara nlaponi mwa.
51
Nvyo Paulo ni Barnaba yahatathela atthu ale ntthupi na isyapattho vya,evenya erowa wIkonio.
52
Atthu awamini a wAntiyokiya yanivyala Eroho Yawarya,etteliwaka nrima.