¹ Vano kahoweha erimu esya ni vathi vasya, vano erimu yopatjerya ni vathi vopatjerya wovira, ni matji khakhanle-tho. ² Miyano kahiweha epoma yowarya, Eyerusalemu ya nanano, yakhuruwa wirimu wa Muluku, ereheriyene ntoko namatheliya orowaniyaka wanamathelaya. ³ Kahinwa ntju nulupale vehitjeni, niiraka: ''Eri va okhala wa Muluku ni atthu, ni Owo onakhala ni awo. Awo anrowa okhala atthu Awe, ni Muluku mwanene onrowa okhala ni awo ni onarowa okhala Muluku aya. ⁴ Owo onarowa opuputtha menthori a m'menthoni mwaya, ni khonrowa okhala-tho okhwa, n'nakhala okhweliya, n'nakhala wunla, n'nakhala oweren'ya, okhala wira itthu tjivinre. ⁵ Ole akilanthi vehitjeni ahira: ''Vano Miyano kopaka tjotene wananano''. Owo ahira: ''Nlepe, okhala wira matju ala ta ekekhayi''. ⁶ Owo ahikihimerya: ''Itthu in'ya tjopakiya! Miyano ka Alfa ni Omega, Opatjerya ni Okhitjerya. Ale avoliye ntthuna kinamwavaha, vohikhala etthu, matji a ekumi. ⁷ Ole onrowa owanela onarowa ohalana itthu in'ya, ni Miyano kinrowa okhala Muluku awe, ni owo onrowa okhala mwana Aka. ⁸ Vano ale owoova, oohamini, onyokheya, anawive, anamararuwa, anamalowa, anakokhorela amuluku ethiru, ni anawothe otene, nipuro naya ninrowa okhala olittini wa moro ni enxofre. N'no okhwa wa enenli''. ⁹ Nimotja wa malaikha ale thanu napili yahiwa waryakawo, arina ekopho ya tjotakhala thanu napili tjokhitjerya, ni ahira: ''Nwe va. Miyano kinawoniheryani namatheliya, amwarawe Mwapwittipwitthi''. ¹⁰ Vano ahikikuxa, m'munepani, otjulu wa mwako worekama ni mulupale, ni khukoniherya epomayowarya, Yerusalemu, yakhuruwa wirimu wa Muluku. ¹¹ Yerusalemu ahikhalana ovuwa wa Muluku, ni anikarya ntoko ejoiya yowarya, ntoko nluku na jaspe. ¹² Nwo tjahikhala ixiri tjorekama ni mikhora muloko napili, ni malaikha muloko napili m'mukhora, mem'mo mwalepiye maloko muloko napili a anamwane a Wisarayeli. ¹³ Onkhuma epheyo, tjahikhala mikhora miraru; onrowa epheyo, miraru; onrowa ntjuwa, miraru; ni onkhuma ntjuwa, mikhora miraru. ¹⁴ Empa ya opoma yarina ikolomo muloko napili, ni mem'mo yahikhala matjina a arum'mwa a Mwapwittipwitthi. ¹⁵ Yowo alavula ni miyano ahikhalana ekopo yophimana, ya ewero, wira aphime epoma, mikhora tjaya ni ixiri tjaya. ¹⁶ Epoma yarina iphantti itjese tjolikana, orekama wa ipantti tjotene tjamulikana. Ahiphima epoma ni ekopo ni yarina ikolomo tjophiyaka ikonto muloko napili iphantti tjotene ni orekama wene. ¹⁷ Ni owo-tho ahiphima ixiri: imetro tjophiyaka emiya emotja ni miloko mitjene ni itjese, ottharihelaka ophima wa atthu, ni tho wari ophima wa malaikha. ¹⁸ Exiri eyo ti ya jaspe, ni epoma ti ya ewero yowarya, enlikana ni evidru yorika. ¹⁹ Alicerici a ixiri iyo torerihiya ni wakhula nthinto wa maluku owarya. Noopatjerya ti na jaspe; wanenli, ti-na safira; wa eneraru, ti-na calcedoniya; wa enetjese, ti-na esmeralada; ²⁰ wa enethanu, sardonik; nethanu namotja, sardiyu; nethanu napili, crisolito; nethanu nattharu, berilo; nethanu natjese, topazio; namuloko, crisopraso; namuloko namotja, jacinto; namuloko napili, ametista. ²¹ Mikhora moloko napili iperola, ni wakhula mukhora opakiye ni eperola emotja. Irampha tja epoma ti tjawero yowarya, yowoneleya ntoko evidru. ²² Miyano nkawehale empa ya mavekelo mpoma, okhala wira Apwiya Muluku Owerya ni Mwapwittipwitthi tari ipa tja mavekelo. ²³ Epoma eyo khanimpheleya ntjuwa hata mweri wira imwalele, okhala wira ovuwa wa Muluku anamwalela, ni nthuko awe Mwaapwittipwitthi. ²⁴ Atthu anrowa wettaka mowaryani mwawe. Mamwene a nlaponi anwana warya waya. ²⁵ Mikhora khainatthukiyaka othana, ni khunrowa okhalaka ohiyo nwo. ²⁶ Awo anawanela ovuwa ni nttittimiho na atthu, ²⁷ ni khinrowa okelakamo etthu entthuna onanariha, ni empaka itthu tjohiloka ni wootha, vano ale pahi matjinaya alepiya Nlivuruni wa Ekumi ya Mwapwittipwitthi.