¹ Vano nlaikha nhikoniherya muro wa matji a ekumi, wowoneleya ntoko ecristal, yavira oholo wa ehitje ya Muluku ni wa Mwapwittipwitthi, ² eriyari ya erampha mpoma. Wkhula ekhopela wa muro, ori mwiri wa ekumi, oniima mihokorokho muloko napili, tjiimaka mihokorokho tjaya wakhula mweri. Makukhu a mwiri tjinavoniha atthu. ³ Nwe khunrowa okhala otakhaliya. Ehitje ya Muluku ni ya Mwapwittipwitthi enrowa okhala mpoma ni arum'mwa Awe Anam'murumelaka. ⁴ Awo anaweha owitho Wawe ni Ntjina na Muluku ninrowa okhala vayutji waya. ⁵ Khunrowa okhala-tho ohiyo, ni awo khanrowa ophelaka warya wa mithuko n'nakhala warya wa ntjuwa, okhala wira Apwiya Muluku onimwarya oholo waya, ni anamwettiherya vohimala ni vohimala-tho. ⁶ Nlaikha nihokihimerya: ''Matju ala teekekhayi ni ororomeleya. Apwiya Muluku a minepa tja maprofeta onrumale nlaikha Nawe wira owoniherye arum'mwa Aweentthun a wiraneya wananano.'' ⁷ Moone! Miyano kinawa vohilekela! Oreriya tuule oniwelela yolaleiya ya elivuru ila''. ⁸ Miyano, Yohani, tin'yole inwale ni khuweha itthu in'ya. Numala winwa ni woona in'ya, kahikokhora oholo wa nlaikha akiwehihale itthu in'ya, wira kinttottopele. ⁹ Nlo nahikihimerya: ''N'hipake eyo! Miyano kinvara nteko wa Muluku ntoko nyuwano ni axin'ninyu, maprofeta, ni ale aninwelela matju a elivuru-ila. M'mukokhorele Muluku''! ¹⁰ Nlo nahikihimerya: ''N'hivithe matju a elivuru-ila, okhala wira okathi ohakuveya. ¹¹ Ole ori otakhala atepe otakhala. Ole ori ohiloka atepeke ohiloka wawe. Ole ori ekekhayi otepeke opaka itthu tja ekekhayi. Ole ori owarya, atepe wiipaka owarya''. ¹² Moone! Miyano kinaawa wananano. Otthuvela waka ori ni Miyano wira kinvahe wakhula ntthu ottharelaka ni miteko tjawe. ¹³ Miyano ka Alfa ni Omega, Oopatjerya ni Okhitjerya, Opatjerya ni Omalela. ¹⁴ Oreriya taale ankattha ikuwo tjaya wira akhalane owerya woolya muhokorokho wa ekumi ni akele mpoma aviraka vankhora. ¹⁵ Anahala ota alapwa, anamalowa, anamararuwa, anawiive, anakokhorela amuluku a ethiru ni ale amphenta ni anootha. ¹⁶ Miyano, Yesu korumiha nlaikha Naka wira awireleni namona itthu in'ya n'hina mwa ikereja. Miyano ka ntathari ni otjulu wa Davidi, Etheneri yowarya ya Witjisu''. ¹⁷ Munepa ni Namatheliya oniira: ''Nweke''! Ole oninwa ireke: ''Nweke''! Ole otene avoliye ntthona aweke, ni ole otene omphela, akheleke wahala matji a ekumi. ¹⁸ Miyano kin'niwirela namona otene aninwa matju a elivuru-ila: Akhala ntthu ontthuna watjererya etthu, Muluku onamwatjererya wa owo otakhaliya olepiye nlivuruni-mu. ¹⁹ Akhala ntthu ontthuna okumiha matju a nlivuruni-mu, Muluku onakumiha mphantti awe wa n'hokorokho wa ekumi ni epoma yowarya, tjen'yo tjilepiye nlivuruni-mu. ²⁰ Ole onirela namona itthu in'ya oniira: ''Ayo! Miyano kinawa wananano''. Amem! Nweke, Apwiya Yesu! ²¹ Mahala a Apwiya Yesu akhale ni nyuwano otene. Amem.