¹ Vano kahiweha nlaikha nikhuruwaka wirimu. Nlo nahikhala etthukulelo ya wephinini ekwirinti yulupale m'matatani mwaya. ² Nlo nahintthukwa dragao, enowa yakhalayi, yeyo eri xotwana hata Satana, ni ahatthukwa n'hina mwa iyakha ekonto emotja. ³ Nlo nahattikhela wephini, khutthukwa ni khuhela ekanyeryo, wira ahitthikele-tho wawoka atthu mpakha iyakha ekonto omalela. Numala eyo, owo onarowa otthukuliya okathi vakhini. ⁴ Vano kahoweha ihitje, tjen'yo tjakilatheliye ni ale yarina owerya wolamula. Miyano-tho kahoweha iroho tja ale yahitiye mwaha wa namona a Yesu ni molumo a Muluku. Awo khiyakokhorelale nsena hata elatarato aya ni yahikhotta wakhela ethonyeryo vayutji ni m'matatani. Awo akhala ni ahettiherya vamotja ni Kristu n'hina wa iyakha ekonto emotja. ⁵ Atthu okhwa akina khiyakhalal,e mpakha ophiyerya iyakha ekonto emotja. Nwo ohihimuwa wopatjerya. ⁶ Oreriya ni owarya taale anirela mphantti ohihimuwa wopatjerya! Wa ala okhwa wa eneli khorina owerya. Awo anrowa okhala anankuttho a Muluku ni Akristu ni anarowa wettiherya ni Owo iyakha ekonto emotja. ⁷ Numala iyakha ekonto emotja ophiya okhomoni waya, Satana onatthukuliya nkhatteya. ⁸ Owo onakhuma wira awoke atthu ari iphantti itjese tja vathi - Gogue ni Magogue - wira atakanihe yawane ekhotto, yawo numuru naya ninrowa okhala ntoko ihava tja m'matjini. ⁹ Awela opuro wotepa orekama wa elapo ni khurukurerya opuro wa owarya, epoma yophentiya. Vano moro okhuruwa wirimu khuwinva. ¹⁰ Xotwani, aawoka, ottikheliya nlittini mwa moro ni enxofre, wenwo nsena ni profeta owootha ottikheliyaya. Awo anarowa ohaxiya othana ni ohiyo, vohimala ni vohimala-tho. ¹¹ Oholo waya, kahoweha ehitje yottela ni Ole akilathenle. Elapo ya vathi ni erimu yotthyawa oholo Wawe ni khiwakhanle opuro worowa. ¹² Miyano kahaweha alipa okhwa, alupale ni akhini, yemenlene oholo wa ehitje ni ilivuru khutthukuliya. Vano elivuru ekina yahitthukuliya, Elivuru ya Ekumi. Alipa okhwa yahilamuliya ottharelaka ele yalepiye nlivuruni, ottharelaka miteko tjaya. ¹³ Matji yahavahererya onookhwa yarinaya. Okhwa ni Omoroni yahavahererya-tho alipa okhwa yarinaya, ni alipa okhwa yahilamuliya ottharelaka miteko tjaya. ¹⁴ Okhwa ni Omoroni yahittikheliya olittini wa moro. N'no okhwa wa enenli, olittini wa moro. ¹⁵ Wakhala wira n tjina na ntthu khaniphwanyiye Nlivuruni mwa Ekumi, owo ottikheliya olittini mwa moro.