¹ Numala itthu in'ya, kahinwa wirimu ntoko ntju nokhuwelana muttitthi wa atthu muntji, niiraka: ''Avuwihiye Muluku! Wopowa, ovuwa ni owerya ti wa Muluku ehu. ² Olamula wawe tiwekekhayi ni ekhweli, vano onlamula puta mulupale ohonon'no elapo ni onamittompe awe. Owo ophukela ephome ya arum'mwa awe, yeyo owo omwaranxawe''. ³ Ekwaha ya enenli, yahiira: ''Avuwihiye Muluku! Mwixi awe on'niwela vohimala ni vohimala.'' ⁴ Manciyawu ale miloko mili ni atjese ni iye ikumi mitjese yahikokhora ni anttottopela Muluku, akilanthi vehitjeni, yiiraka: ''Amem. Avuwihiye Muluku''! ⁵ Vano nahikhuma ntju vehitjeni, niiraka: ''Avuwihiye Muluku ehu arum'mwa otene, nyuwano Mum'muva, okhuma alupale mpakha anamwane''. ⁶ Vano kahinwa ntju ntoko na muttitthi muntji, ntoko okhuwela wa matji ni ntoko ntju na itari tjulupale, niiraka: ''Avuwihiye Muluku! Okhala wira Apwiya, Muluku Owerya Tjotene, on'neettiherya. ⁷ Nitthape, nihakalale ni ninvuwihe, okhala wira nin'niphiya niira na Mwapwittipwitthi, ni namatheliya awe ohireherya''. ⁸ Otthuniheriya wira aware ikuwo tjoorika, tjorera ni tjowarya'' ( ikuwo tjorika itthu tjekhweli tja atthu owarya.) ⁹ Nlaikha nahikihimerya: ''Nlepe ela: Oreriya taale alattuliye wohakalalani wa Mwapwittipwitthi''. Ni-tho ahira: ''Tin'yala molumo ekekhayi a Muluku''. ¹⁰ Kahinkokhorela m'mettoni mwawe wira kinttottopele, vano owo ahikihimerya: ''N'hipake eyo! Miyano kamun'ninyu ni nyuwano ni axin'ninyu animpweha namona a Yesu. M'muttottopele Muluku, vano namona a Yesu munepa wolaleya''. ¹¹ Vano kahiweha wirimu otthukunwen'ne, ni yahikhala ekhavalo yottela yowo ole om'mwettiha onihaniya Ekekhayi ni Ekhweli. Owo on'nilamula ni on'niwana ni ekekhayi. ¹² Mentho awe anlikana ntoko moro ni, m'muru mwawe, tjokhala itthu tjintji ni yolepiya ehitjuweliye ni ntthu wohikhala Yowo pahi. ¹³ Owo owarale nlaya nttotthiye ni ephome, ni ntjina nawe onihaniya Molumo a Muluku. ¹⁴ Anakhotto a wirimu yanintthara ni ikhavalo tjottela, awaralene ikuwo tjorika, tjottela ni tjorera. ¹⁵ Mwano mwawe en'nikhuma ekatana yothokolowa ni yeyo Owo on'nikwakwanyulana ilapo. ¹⁶ Owo onarowa owettiherya ni ekopo ya yuma ni onanyakela onanariya wa Muluku Owerya Tjotene. Owo ohana ntjina nlepiya vanlayani vawe ni vatarani vawe: Mwene a mamwene ni Pwiya a mapwiya. ¹⁷ Koweha nlaikha nemelalene, Vantjuwani, akhuwelela axinuni a wirimu ni ntju nulupale iraka: ''Nwe, nthukumane wira mwirele mphantti eceya ya Muluku. ¹⁸ Nwe ni nlye enama ya mamwene, enama ya aholeli, ni enama ya alopwana owerya, enama ya ikhavalo ni anakhavalo aya ni enama ya alopwana otene, ootaphuwa, ipottha, akhini ni alupale''. ¹⁹ Kahiweha nsenani mamwene a elapo ya vathi ni anakhotto aya. Awo yanilakiherya wira yawane ni Ole ettiha ekhavalo ni anakhotto awe. ²⁰ Nsena nahivariya ni, ni nlo, profeta owootha apaka ithonyeryo oholo waya. Ni ithonyeryo iya owo ohavoka ale yakhenle ithonyeryo ya nsena ni ale yakokhorela elatarato aya. Owenli aya yahittikheliya yonaka nlittini mumpatta ni enxofre. ²¹ Akina yahinviya ni ekatana yakhuma mwano mwawe Ole ettiha ekhavalo. Axinuni otene yahirupala ni inama tjaya.