¹ Bulano khulwo khubeera Kirisito yasandisibwa mumubiri kwaye, eng'we mwesi mwefwale ebilwaniro mulichomo liene elio; khulwo khuba ula owasandisibwa mumubiri yalekhana nende chimbi; ² khukario omuundu oyo khasi akhoyere okhuchiririra khumenya mubwekombi bwa baandu, mubikha biaye ebio khumenya musialo muno, arali akhoyere khumenya mulienya lia Nasaye. ³ Khulwo khuba ebikha biefwe ebiabira biayera okhukhola elienya liabanasialo; okhuchiira mubukarangaranu, nende obwekombi, nende obumeesi, nende ebiserero ebio kuliira, nende ebiindu biokhumeesia, nende imiisa yebifwanani eyirafukirirwa; ⁴ amakhuwa kababonanga mbwe kaukisia nimurachira alala ninabo mubukarangaranu obubula esikero, khandi nibabalomalomakho amabi. ⁵ Khandi bachia khurusia bubali khu ula oli mwerekekhe okhukhalakira abaandu balamu nende abafu. ⁶ Khulwo Khubeera abafu bosi bayalirwa ifanjili khulwe sifune siene esio, mbwe bakhalakirwe mumubiri kori ngabaandu bakhalakirwanga; arali babe abalamu kori nga Nasaye ali mulamu. ⁷ Arali obumalirikhi bwamakhuwa koosi busudire ambi; khulwako, mube nende amakesi, mube meeso mumalaamo. ⁸ Mube nende esinani esio khukherana khukhirakho ebiindu bioosi; khulwo khubeera okhukherana khufunikhaanga obungi bwechimbi. ⁹ Mwingisanie eng'we bene khu bene, mukhurekanyirisia. ¹⁰ Buli muundu akhalabanire owasie khulondana nende kori nga yanyoola esianwa; kori nga abakholi bobukoosia bwa Nasaye bukabukhane. ¹¹ Omundu nalomaloma, lekha alomalome amakhuwa ka Nasaye; omuundu nakhola mirimo lekha akhole nende amaani ka Nasaye amubereesie; mbwe Nasaye anyoole khufumisibwa mumakhuwa kosi khubirira mu Yeso Kirisito. Oluyaali nende obunyala buli ninaye chinyanga chiosi. Amina. ¹² Abakheerwa, murabona amateemo komuliro akabecheere okhubateema okhuba kori nga elikhuwa likeni, obeera ori elikhuwa libekholekhanire nelikeni: ¹³ Arali musangale, kori ngolwa mwambana mukhusaanda khwa Kirisito, mbwe munyoole okhusangaala mubufunuli bwaye obwoluyaali. ¹⁴ Muli nende chikhabi nimukholerwa amabi khulwe liira lia Kirisito; khulwo khuba Roho wa Nasaye khandi owoluyaali ali akulu weng'we. ¹⁵ Arali omuundu weng'we yeesi arasandisibwa kori ngomwiri, kose kori ngomwibi, kose kori ngomukholi wa mabi, kose kori ngomuundu owingiriranga amakhuwa ka baandu bandi. ¹⁶ Ne omuundu nasandisibwa khubeera mbwe ni mukirisito, arabona echisoni khaba; arali afumie Nasaye khulwa kene ako. ¹⁷ Khulwo Khubeera ebikha biolere ebio bukhalaki bukhoyere okhuchakira munyumba ya Nasaye: ne nbili mbwe buchaaka ninafwe, obumalirikhi bwa bala abarasubira ifanjili ya Nasaye buchia khuba burie? ¹⁸ Khandi nibili mbwe nibidinyu khu balungifu khuonisibwa, ne bala abaralimo obunasaye alala nende abakholi bechimbi bachia khuba barie? ¹⁹ Khulwako lekha bala abasandisibwa khulondana nende elienya lia Nasaye, bamuberesie emioyo kiabwe mukhukhola malayi, kori ngabakholera omulongi wabwe.