¹ Khandi mungeri yene eyo, eng'we bakhasi murie abasaacha beng'we; nende lichoomo mbwe nibili mbwe baliwo bala abarasubira likhuwa, banyoole khurerwa khubirira khu bikhole biabakhasi babwe, kata nibirali khulwe likhuwa lila; ² nibalola ingeenda yeng'we indafu eye siriibwa. ³ Okhwerona khweng'we, khuraba khwerona okhwerwanyi, kori khusuuka lifwiri; nende okhwerakho idakhabu, nende okhufwala abiefwalo; ⁴ arali khube okhwomumwoyo, okhurabonekhana, mukhwerona okhurabonekhana; kori ngomwoyo kwobwedemberefu nende bubulerefu, okuli nende obukusi bukhongo imberi wa Nasaye. ⁵ Khulwo khuba abakhasi bakhale abatakatifu abesika Nasaye nende okhuria basaacha babwe beronanga bario. ⁶ Kori ngolwa Sara yaria Ibraimu, namulaanga ari, omwami; nang'we muli abaana baye, nimukhola amalayi, khandi murarisibwakho nende oburi bwosi bwosi. ⁷ Khandi eng'we basaacha mwesi, mumenye nende abakhasi beng'we mumakesi; nimuberesia mukhasi esiriibwa kori nga esilonge sidekhere; khandi kori bala abokhunyoola obulaame bwobukoosia obwobulamu alala ninang'we, mbwe amalaamo keng'we karekalirwa. ⁸ Elikhuwa limalirikha nilio lino; mube nende elichomo elala, abokhwelalikhire abasieng'we, abokhukheerana kori nga abakheerwa, abokhwesindukha, abokhweduduya,; ⁹ abaandu abarakalusia elibi khu libi, kose elinyeko khu linyeko, arali abokhwanira chikhabi; khulwo khubeera ako niko akamwalangirwa mbwe munyoole obulaame bwechikhabi. ¹⁰ Khulwo khubeera ula okheera obulamu nende okhubona chinyaanga chindayi, yekalire olulimi lwaye khulomaloma amabi, ne omunwa kwaye kuraboola obubacha. ¹¹ Alekhe amabi mani akhole malayi; akoonye muleembe, khandi alondane ninakwo. ¹² Khulwo khuba echimoni chio Mwami chilingerenga abalungifu, khandi amarwi kaye karekersianga amalaamo kabwe; arali obweni bwo Mwami buli akulu wabakholi bamabi. ¹³ Niwina ochia okhubakholera mabi nimuba nende esinani esio khukhola malayi? ¹⁴ Arali kata nimusandisibwa khulwo khukhola malayi, muli nende chikhabi. Muraria okhurisia khwabwe, kose murakanakana. ¹⁵ Arali mure Mwami mumioyo kieng'we: Mube abarekekhe chinyaanga chiosi okhukalusia buli muundu obareeba khulondana nende elisuubira liri mukari mweng'we, mubwedemberefu nende buri: ¹⁶ mube nende amapaaro malayi; mbwe kata nibabalomalomakho amabi, bala abanyekanga okhuchiririra khweng'we khulayi mukirisito banyoole okhwambisibwa chisoni. ¹⁷ Khulwo khuba ni bilayi khusandisibwa khulwo khukhola malayi, nibili mbwe nilio elienya lia Nasaye, khukhira okhukhola amabi. ¹⁸ Khulwo Khubeera Kirisito yesi yasandisibwa lulala khulwe chimbi, owobulungifu khulwa bala abarali balungifu, mbwe anyoole khururera khu Nasaye; omubiri kwaye kwerwa, ne omwoyo kwaye nakwo kwalamusibwa: ¹⁹ okwayachirakho khuyalira emioyo kiali nikiaboywa musiboye; ²⁰ abaandu abararia ebikha biokhwesimirisia khwa Nasaye khwali nikhusiri khulindire echinyaanga chia Noa, ngolwa isafina yali niyoombakhwa; eya Nasaye yaonisiriamo abaandu badiidi, emioyo munane nikio ekiaonisibwa khurula mumaachi. ²¹ Esilolero siamakhuwa ako nobubatisibwi, obubaonianga kata bulano, (khasi ni khulwo khwosibwa omubiri khaba, arali ni likalusio elia mapaaro malayi khu Nasaye,) khubirira okhulamusibwa khwa Yeso Kirisito: ²² owachia mwikulu, niyekhala mukhono mulungi kwa Nasaye; ne malayika nende obunyala nende amaani bagengwa asi waye.