¹ Khulwako mure indulo amabi kosi, nende ikhiinda, nende obwekaadi, nende esikhalikhali, nende buli inomanoma imaanu. ² Kori nga abaana badiidi abebulwe, mwekoombe amabeere malafu akelikhuwa, mbwe munyoole okhukhusibwa mubuonia; ³ nimubwene mbwe Omwami ni wesisa. ⁴ Mwiiche khuniye oli elikina lilamu, elia baandu bakhaya, arali Nasaye yaliloboola khandi niliobukusi, ⁵ eng'we mwesi muli kori ngamakina malamu, mumbakhibwa okhuba inyuumba yomwoyo, obukukhani butakatifu, khulwo khurusia abisakhiro biomumwoyo, ebia Nasaye afukirira khubirira mu Yeso Kirisito ⁶ Khulwo khuba kaandikwa mbwe, lingeera, ndi khurao elikina elio mukoona musayuni,elilobole, eliesiriibwa, ne bulimuundu omusubira khasi achia okhwambisibwa echisoni khaba. ⁷ Bulano esiriibwa sino sili khweng'we abasubira: arali khu bala abarasubira, elikina liabombakhi bakhaya, liekhola okhuba elikina likhoongo elio mukoona. ⁸ Khandi ni likina elio khwegumulakho okhukulu, olwanda lwokhukwisia. khulwo khuba begumulanga khulikhuwa lila, ne khasi balisuubira, khandi bagengwao khulwe sifune mbwe banyoole akene ako. ⁹ Arali eng'we muli abaandu balobole, obukukhani bwoburuki, esialo sitakatifu, abaandu ba Nasaye; mbwe munyoole okhusalasia makhuwa makhongo kaye ,owabalanga mbwe murule musirima mani mwingire mubulafu bwaye obwokhuukisia; ¹⁰ Eng'we khasi mwali baandu mubikha biabira, arali bulano muli baandu ba Nasaye: khasi mwali mwanyoola esisa, arali bulano mwanyoola esisa. ¹¹ Abakheerwa, baboolera kori abakeni khandi ababira nibabwao, mbwe muraba nende obwekoombi bwomubiri, obukhuyananga nende mwoyo; ¹² Khukeenda khweng'we akari wabanasialo khukhoyere khuba nende esiriibwa: mbwe nibabakhikhirao mbwe muli abakholi bamabi, nibalingeera bikhole bieng'we bilayi banyoole okhufumia Nasaye inyaanga eyichia okhwicha. ¹³ Murie buli likhuwa eliamubolerwa khurula khu baandu khulwo Mwami: nali Mwami, kori ula oli nende amadaara aka akulu; ¹⁴ nibali abakhoongo, kori nga bala abayaruma mbwe banyoole khuberesia abakholi bamabi omurungo nende okhufumia abakholi bamalayi. ¹⁵ Khulwo Khubeera elio nilio elienya lia Nasaye, mbwe munyoole khwikalira eminwa kiobusiru ekia baandu basiru khubirira khu khukhola malayi; ¹⁶ Kori ngabaandu balekhule, ne khasi bekhonyera obulekhule wabwe khulwo khukisa amabi, arali kori abakholi ba Nasaye. ¹⁷ Muberesie baandu boosi esiriibwa. Mukheere abakheerwa. Murie Nasaye. Muberesie omuruki esiriibwa. ¹⁸ Abakholi, murie abami beng'we nende oburi bwoosi; muraria sa bala abali balayi nende abedemberefu, arali kata nende abalulu boosi. ¹⁹ Khulwo khubeera bikhoyera birio, omuundu niyesimirisiria esibeera khulwo khwichulisia Nasaye, nasandisibwa mungeri eyirakhoyera. ²⁰ Khulwo Khubeera khuli nende ifuma sina nimukhola imbi, ne mumala mwesimirisia nimusandisibwa? Arali nimukholere amalayi nimumala munyakhana nimuberesibwa esinyasio, nibio ebikhoyera ifuma imberi wa Nasaye ²¹ Khulwo khuba akene ako niko akamwalangirwa; Kirisito yeesi yasandisibwa khulwo khubeera eng'we, namala nabalekhera esilolero, mbwe obusenero bwaye. ²² Ye khasi yakhola imbi, kose obubacha khasi bwanyolekhana mumunwa kwaye. ²³ Ngolwa yanyekwa, khasi yakalusia manyeko khaba; ngolwa yasandisibwa, khasi yarisia khaba; arali yelekhuula khu ula okhalakiranga mubwadieri. ²⁴ Ye mwene yabukula echimbi chiefwe mumubiri kwaye akulu womusaala, mbwe khube abafu mumakhuwa kechimbi, arali khube abalamu mumakhuwa kobulungifu; khandi mwaonisibwa khubirira khu makhubake kaye. ²⁵ Khulwo Khubeera mwali mwakora kori amakoondi; arali bulano mwakalukha khu mwayi khandi omuliindi we mioyo kieng'we.