¹ Esie oli omukofu khandi omuloli wa manyakhano ka Kiristo khandi omwambani woluyaali oluchia khufunulwa, saba abakofu abali akari weng'we mbwe: ² mwaye amakoondi ka Nasaye akali akari weng'we, nimukhola emirimo kio khwimirira, ne khasi nimukhuyikwa khaba, arali mukhufukirira; khandi khasi ni khulwo khunyoola amapesa kechisoni, arali ni khulwa mapaaro marekekhe. ³ Murekhola kori bala abekholanga abaami mumadaala kabwe, arali mube ebilolero khu makoondi. ⁴ Ne omwayi mukhongo nachia khubonekhana, muchia khunyoola esianwa sioluyali esiralibwayo. ⁵ Khandi eng'we baraaga mwesi murie abakofu, muwefwale okhweduduya, mani munyoole khwekholera mirimo abene khu bene; khulwo khubeera Nasaye yekaliranga abaandu beyisunga, arali aberesianga bukoosia abaandu bokhweduduya. ⁶ Khulwako mweyikhie asi womukhono kwa Nasaye okwa maani mbwe anyoole okhubakingula mubikha biaye; ⁷ nang'we nimumuberesia ameenya keng'we koosi, khulwo khubeera ye akhalabaniranga makhuwa keng'we koosi. ⁸ Mube nende esikero, khandi mube meeso; khulwo khuba Sietani obasitakanga, akendanga nabodokhana nakoonya omuundu wokhumira. ⁹ Eng'we nang'we mumukhaye, mube nende amaani mubusubiri, nimumanyirisia mbwe abakheerwa basieng'we abali musialo bosi bali khubirira mumanyakhano kori ako. ¹⁰ Arali Nasaye wobukoosi bwoosi, owabalanga mbwe mwingire muluyaali olwe chinyaanga chioosi mukirisito, omwene achia khubosirisia, nende okhubafukirira, nende okhubaberesia amaani, nimwakhamala khusandisibwa khulwe bikha bidiidi. ¹¹ Obunyala buli ninanaye obumeri nende bumeri. Amina. ¹² Khubirira khu mukhono kwa Silwano, omusiani wefwe mwesikwa khulondana nende kori ngamubona, esie baandikire mubwimbikiri, okhubakeraka nende khubarusiria obuloli mbwe buno nibwo bukoosia obwobwadieri. Mweme sirungi mubwene obwo. ¹³ Elikanisa eliri Babeli, elialobolwa alala ninang'we libakhesia, alala nende Mariko omusiani wange. ¹⁴ Mukhesanie mungeri yo khuchunjunana khwo bukheeri. Omuleembe kube ninang'we mwesi abali mukirisito. Kabe kario.