¹ Ahabhalilo, he Uyesu lwe ahajendaga, ahamwenya umuntu utonko kufuma kupapwa kwakwe. ² Abhasundikwa bhakwe bhahamubhuzilizya, ''Mwene, wunanu we abhombile imbihi, umuntu uno pamo abhapafi bhakwe, pe apapwe wu tonko?'' ³ Uyesu ahabhatamula, ''Te wewuno umuntu pamo abhapafi bhakwe bhebhabhomvile imbibhi, loli mbombo zya Mulungu zihondeye ziloleshe ukujendela mu mwakwe. ⁴ Tuhondeye kubhomba imbombo zyakwe wuyo wansontelezizye ahabhalilo lwekushili musanya. Ubhusiku bhukwinza ahabhalilo he nawumo wangabhwezya kubhomba imbombo. ⁵ Ahabhalilo he ndipo munsi, ine ne bhuzeru bhwa nsi.'' ⁶ Lwe Uyesu ayanga amazwi iga, ahaswila pa nsi, ahabhiha intope ku mati, pe ahamsyema umuntu wula muminso ni tope lila. ⁷ Ahamubhuzya, bhalaga ugeze pa shifula isha Siloam (kwe kuti inza vwe akutumile').''Pe ubhwo uyo umuntu ahabhala, ahasukusula, pe ahabhwela, akwenya. ⁸ Abhapalamani bha muntu wula na bhala bhebhamubhwenyi pabhwandilo ngati wa kupempa bhahati, Pe! uno te wewula umuntu we atendamaga na kupempa?'' Bhamo bhahati, ''We wuyo.'' ⁹ Nabhamo bhahati, ''Hagha, loli akuholana nawo.'' Loli pe ahatinji, ''Ne nene.'' ¹⁰ Bhahamubhuzya, ''Isalizi aminso gaho gigulilwe bhulibhuli?'' ¹¹ Ahatamula, umuntu webhakuti Uyesu ahahanda itope na kumpahamuminso gane na kumbuzya, 'Bhalaga ku Siloam ubhale usukusule.' Pe ubhwo nabhazile, pe nasukusuye, pe nabha nu kwenya habhili.'' ¹² Bhahamubhuzya, ''ali kwiyi?'' Ahatamula, ''Ntamanyile.'' ¹³ Bhahamutwala umuntu wula wamali wutonko ku Bhafarisayo. ¹⁴ Lyope lyali lisiku lya Sabato lwe Uyesu peahagomba intope na kugagubutula aminso gakwe. ¹⁵ Pe habhili Abhafarisayo bhahamubhuzilizya uhapona bhulibhuli. Ahabhabhuzya, ''Abhisile intope mu minso gane, penasukusuye, nisalizi kubhwezya kwenya.'' ¹⁶ Pe bhamo Abhafarisayo bhahati, ''Umuntu uno atafumile kwa Mulungu kwekuti atakuyilema Isabato.'' Abhamwabho bhahati, ''Yingabhuli umuntu uwa mbibhi kubhomba ivimanyilo inzi vwo?'' ¹⁷ Pe ubhwo kuhabha na kugabhinkana pakasi yabho. Pe bhahamubhuzilizya wula utonko habhili, ''Ukuti bhuli pa pakwe panogwa agagubutuye aminso gaho?'' Utonko ahati, ''Wu mukubhwi.'' ¹⁸ Pe ahabhalilo iha Abhayahudi bhatahasubhila kuti amile wutonko wope apata kwenya mupaka lwebhabhitizya abhapafi bhakwe uwene we akwenya. ¹⁹ Bhahabhabhuzilizya abhapafi bhakwe, Pe, uno mwana winyu wemukuti apafilwe wutonko? abhwezya bhuli kwenya?'' ²⁰ Pe abhapafi bhakwe bhahamtamla, ''Tumanyile kuti uno mwana witu nakuti apafilwe wutonko. ²¹ Ukuti akwenya bhulibhuli, tutamanyile, nu wene wa mgubutula aminso gakwe, tutamumanyile. Mubhuzilizyi uwene. Muntu wusongo. Ahondeye ukuyanjila wuyo." ²² Abha pafi bhakwe bhahayanga iga, panongwa bhahanyila Abhayahudi. Pe bhala Abhayahudi bhahinza bhivwana hali ukuti, inga wowonti ayitiha kuti Uyesu nu Kirisitu, bhamwefwe Mushibhanza. ²³ Panongwa ino, abhapafi bhakwe bhahayanga, "Umuntu usongo, mubhuzilizye wuyo." ²⁴ Ingalumo kulya bhubhili bhahamuholela wula umuntu we amali untonko nukumubhuzya, "Mupe Umulungu ubhumwamu. Tumanyile ukuti umuntu uno wa mbibhi." ²⁵ Pe wula umuntu ahamula, "Lwe we mubhomba mbibhi, ine ntamanyile. Ishintu shoka she shimanyile: Namile ne ntonko, ni salizi nkwenya." ²⁶ Pelelo bhahamubhuzya, "Akubhombeye ishoni? Ahigula bhulibhuli aminso gaho?" ²⁷ Ahamula, "Mbabhuzizye hari, nimwe mutakutejelezya! shoni she mukwanza kutejelezya sona? Nimwe mutakwanza kubha bhasundikwa bhakwe bhope, te mumo? ²⁸ Bhahamuliga nukuyanga, "Iwe we musundikwa wakwe, loli iswe swe bhasundikwa bha Musa. ²⁹ Tumanyile kuti Umulungu amayanzile nu Musa, loli ku muntu uno, tutamanyile kula kweafumiliye." ³⁰ Wula umuntu ahamula nu kubhabhuzya, "Shoni, ili shintu sha kusukumizya, ukuti mutamanyile kwe afumiliye, loli amashili ayiguye aminso ginyu. ³¹ Tumanyile ukuti Umulungu atakubhatejelezya abhambibhi, loli penga umuntu wowonti akumuputa Umulungu peakubhomba nu kwanza kwakwe, Umulungu akumwivwa. ³² Kufuma ubhwandilo bhwa nsi yitahafumila nalumo ukwivwiha ukuti wowonti ayigiye aminso gamuntu weamapafilwe untonko. ³³ Penga umuntu uno atafumile kwa Mulungu, nge atabhomvile shoshonti." ³⁴ Bhahamula nukumubhuzya, "Wapafilwe mumbibhi nzila, pe iwe kuti utusambilizya iswe?" Pe bhahamushimbizya kufuma mushibhanza. ³⁵ Uyesu ahivwa ukuti bhamwefizye mushibhanza. Ahamwaga nu kumubhuzya, "Ukumusubhila Umwana wa Muntu?" ³⁶ Ahamula nu kuyanga, "Pe wunanu, Mwene, ingape nine ihondeye kumusubhila?" ³⁷ Uyesu ahamubhuzya, "Umubhonyi hari wope weukuyanga nawope uwene wewuyo." ³⁸ Wula umuntu ahayanga, "Mwene , Kusubhila."Pe ahamusugamilila. ³⁹ Uyesu ahayanga, "Kubhulonzi ninzile munsi ino ingape kwekuti bhala bhebhatakwenya bhahondeye bhenye na bhala bhebhakwenya bhabhe bhebha ntonko." ⁴⁰ Bhamo mu Bhafarisayi bhebhamile poka nawo bhahivwa amazwi igo nu kumubhuzilizya, "Pe niswe wope bhewumo untonko ?" ⁴¹ Uyesu ahabhabhuzya, "Inzavwe mwenile mwe bhantonko, nge mutamile ni mbibhi. Pe bhwebhulo, izisalizi mukuyanga, 'Tukwenya,' imbibhi yinyu yikutendama."