¹ Subhila, Subhila nkubhabhuzya, wula weatakwinjila mukujendela umulyango wi bhiji lya ngole, loli akuzubha kwidala ilinji, umuntu uyo mwibha pe mugozi. ² Uwene weakwinjila mulyango mudima ngole. ³ Kukwakwe musirikali wa mulyango akumwigulila. Ingole bhakutejelezya izwi lyakwe nukuzitaha ingole zyakwe kumazina gakwe nukuzifumwa kunzi. ⁴ Penga azifumwa kunzi izyo zye zyakwe, zikumulongolela ningole zikumulandata, panongwa zilimanyile izwi lyakwe. ⁵ Zitangamulandata umujeni loli uwene zikumushimbila, panongwa zitabhamanyile amazwi gabhajeni." ⁶ Uyesu ahayanga ishiholanyo ishi kukwabho, loli bhatahazimanyinsanya ivintu ivi vweamamile ahayangaga kukwabho. ⁷ Uyesu ahayanga nabho sona, "Subhila, subhila, nkubhabhuzya, Ine ne mulyango wa ngole. ⁸ Bhonti bhebhandongoleye pebhibha pe bhagozi, loli ingole zitahabhatejelezya. ⁹ Ine ne mulyango. Wowonti weakwinjila kujendela mumwane, alipona; aliyinjila mukasi nu kufuma, wope alivwaga ivwakulya. ¹⁰ Umwibha atakwinza loli kwibha, kugoga, nu kulovwa. Ninzile ingape ukuti bhabhwaje ubhulanzi pe bhabhe nabhwope shima. ¹¹ Ine ne mudimi umwinza. Umudimi umwinza akwefwa ubhulanzi bhwakwe panongwa ya ngole. ¹² Umubhomvi weakulipwa, te mudimi we ingole te shumwa shakwe, akubhenya abhahabhila bhakwinza nu kubhaleha nu kuzishimbila ingole. ¹³ Nu habhila akuzilema nukuzisasanya. Akushimbila panongwa mubhomvi wa kulipwa peatakusajila ingole. ¹⁴ Ine ne mudimi umwinza, pe mbamanyile bhebhane, wope bhebhane bhamanyile ine. ¹⁵ Utata amanyile ine, mumanyile Utata, nime nkuyifumwa ubhulanzi bhwane panongwa ya ngole. Ndinazyope ingole izinji zye te zyibhiji ili. ¹⁶ Izyo zyope, zihondeye kwinza, wope bhaliyivwa izwi lyane ingape ukuti pabhe nu bhwinji bhwoka nu mudimi woka. ¹⁷ Ino ye nongwa Utata anganile: Nefwe ubhulanzi bhwane pe imbweje sona. ¹⁸ Nawumo weakubhwega kufuma kukwane, loli ine kubhufumwa nemwenesho. Ndinago amaha ga kufumwa, ndinagope amaha ga kubhwega wope. Imposheleye inkomelezyo ino kufuma kwa Tata." ¹⁹ Kugabhinkana sona uhafumila pakasi ya Bhayahudi panongwa ya mazwi iga. ²⁰ Abhinji mumwabho bhahayanga, "Yenya ipepo nu shipena. Shoni she mukumutejelezya?" ²¹ Abhanji bhahayanga, "Aga te mazwi ga muntu weayubhine nipepo. Ipepo lihondeye kumwigula aminso untonko?" ²² Peyihinza ichaka Ishakubhiha Ubhufinjile Yerusalemu. ²³ Hamile habhalilizyo ha bhuhatazu, nu Yesu amamile ahajendanga mushibhanza mukasi mutanda bhwa Solomoni. ²⁴ Pe Abhayahudi lwe bhamuzyungulila nu kumubhuzya, "Paka lii utubhishe mu kwendelezya? ingape iwe we Kirisitu, tubhuzyaje pabhuzelu. ²⁵ Uyesu ahabhamula, "Mbabhuzizye hali loli mutakusubhila. Imbombo zye kuzibhomba mwizina lya Tata wane, Zyope zikusimishizya papane. ²⁶ Inza bhwebhulo mutakusubhila panongwa imwe te mwe ngole zyane. ²⁷ Ingole zyane zikwivwa izwi lyane; Mbamanyile, wope bhakundandata ine. ²⁸ Mbapiye ubhulanzi bhwa shima; bhatalilovwa nalumo, pe atalipo ingawoka alibhasompola kufuma muyobhe zyane. ²⁹ Utata wane, weamampiye abho, we mupiti kushila abhanji bhonti, pe nawumo ingawoka we ahondeye nukutusompola kufuma munyobhe zya Tata. ³⁰ Ine nu Tata twe bhali bhoka." ³¹ Bhahega amabhwe inga pe bhamutinze sona. ³² Uyesu ahabhamula, "Imbalolesizye imbombo inyinji inyinza kufuma kwa Tata. Ku mbombo zyoni mukasi mwizo mukwanza kuntinza na mabhwe?" ³³ Bhayahudi bhahamwamula, "Tutakukutinza na mabhwe kumbombo zyozyonti zye nyinza, loli ku musamu, panongwa iwe, we muntu , ukuyibhiha we Mulungu." ³⁴ Uyesu ahabhamula, "Litasimvilwe mu nkomelezyo zyinyu, 'Inkayanga, "Imwe mwe bhamulingu""?" ³⁵ Penga ahabhitizya mwe bhamulungu, kubhala bhe Izwi lya Mulungu lihabhizila (ninkomelezyo zitahondeye kuvunziha), ³⁶ mukuyanga pazyawula we Utata ahamufumwa nu kumutuma munsi, 'Ukusamula , ' panongwa inkayanga , 'ine ne Mwana wa Mulungu'? ³⁷ "Penga ntakubhomba imbombo zya Tata wane, mutahasubhile. ³⁸ Pe bhulo, inga ntakubhomba, inga inzavwe mutakusubhila, musubhile imbombo ingape ukuti muhondeye nukumanya ukuti Utata ali mumwane nime indimumwakwe mwa Tata." ³⁹ Bhahayezya sona kumulema Uyesu, loli ahepa papabho kufuma munyobhe mumwabho. ⁴⁰ Uyesu ahabhala kubhunji sona kwiswila lya Yorodani bhuzilo bhwe Uyohani amamile ahabhozyaga pabhwandilo, nu kutendama kunuko. ⁴¹ Abhantu abhinji bhahabhala kwa Yesu bhahajendelela kuyanga, "Uyohani nalyoli atahabhomba ishimanyilo shoshonti, loli zyonti izyo zyeaziyanzile Uyohani pazyuno umuntu zye zyanalyoli." ⁴² Abhantu abhinji bhahamusubhila Uyesu pepala.