¹ Pe umuntu woka izina lyakwe Lazaro amamile mubhinu. Amafumiliye Bethania, munsi ya Mariamu nu mukulu wakwe Martha. ² Amamile Umariamu wula we amamusyumuye Umwene na mafuta muvina vwakwe ku sinsi zyakwe, we umujenzi wakwe amamile mubhinu. ³ Pe abhamukulu abha bhahatuma amazwi kwa Yesu nukuti, "Mwene, yenya wula wu umuganile abhinile." ⁴ Uyesu lweayivwa ahayanga, "Ubhubhinu ubhu te bhwa bhufwe, loli, uwe na panongwa ya bhumwamu bhwa Mulungu ingape ukuti Umwana wa Mulungu ahondeye kushindikwa mu bhwo Ubhubhinu." ⁵ Uyesu ahamugana Umartha nu mukulu wakwe nu Lazaro. ⁶ Lweayivwa ukuti Ulazaro mubhinu, Uyesu ahatendama isiku zibhili kushila pabhuzilo peamile. ⁷ Pe lwe lyashila ili ahabhabhuzya abhasundikwa bhakwe, "Tusogolaje Kubhayahudi sona." ⁸ Abhasundikwa bhahamubhuzya, "Mwene, Abhayahudi bhamile bhahanzaga kukutinza na mabhwe, niwe ukwanza kugalushila kwekula sona?" ⁹ Uyesu ahabhamula, "Ahabhalilizyo hamusanya te lishumi lyoka na tubhili (12)? Umuntu peakujenda umusanya atahondeye kuyipunula, panongwa akwenya ubhuzelu bhwa musanya. ¹⁰ Inza bhwebhulo, inga alijenda ubhusiku, aliyipunula panongwa ubhuzeru nabhumo mukasi yakwe." ¹¹ Uyesu ahayanga zyonti izi lwe zyashila izi, ahati, "Umujenzi witu Ulazaro akasite, loli nkusogola ingape ukuti yihondeye kumugamusya kufuma mutulo." ¹² Pe abhasundikwa bhahamubhuzya, "Mwene, inzavwe akasite , alidamuha. ¹³ Ahabhalililzyo iha Uyesu amamile ahaabgaga amazwi agamfwa ya Lazaro, lilo bhahasibhaga akuyanjila pazya kusupilwa utulo. ¹⁴ Pe akuyanjila nabho pa bhuzeruzeru, "Ulazaro amfwa. ¹⁵ Nkuseshela panongwa yinyu, ukuti ntalipo kula ingape kuti muhondeye kusubhila. Twendaje kukwakwe." ¹⁶ Pe Utomasi, amali lipasa, ahamubhuzya abhasundikwa abhamwabho, "Niswe tusogolaje wope tufwe poka nu Yesu." ¹⁷ Ahabahalilizyo Uyesu lweayinza, ahaga ukuti Ulazaro akasite hali isiku zine mushilibha. ¹⁸ Yope Bethania yapalamine ni Yerusalemu inzavwe mayili 45 bhwelele. ¹⁹ Abhinji mukasi ya Bhayahudi bhahinza kwa Martha nu Mariamu pakushesya panongwa ya mujenzi wabho. ²⁰ Pe Umartha lwe ayivwa ukuti Uyesu akwinza, ahabhala kuhomana nawope, loli Umariamu ahajendelela kutendama munyumba. ²¹ Pe Umartha ahamubhuzya Uyesu, "Mwene, inzavwe nge walipo apa, umuyemba wane ngeatafuye. ²² Nisalizi bhulo, imanyile ukuti lyolyonti lye ungalabha kufuma kwa Mulungu, angakupa." ²³ Uyesu ahamubhuzya, umuyemba waho akuzyuha sona." ²⁴ Umartha ahamubhuzya, imanyile ukuti alizyuha muluzyuho lya siku zya bhumalilo." ²⁵ Uyesu ahamubhuzya, "Ine ne luzyuho nu bhulanzi; uwene eakusubhila, pe nga akufwa, bhwebhwebhulo alibha nubhulanzi; ²⁶ nuwene we akutendama nu nkusubhila ine atalifwa. Ukusubhila ili?" ²⁷ Ahati, "Nalyoli, Mwene nkusubhila ukuti iwe we Kirisitu, Mwana wa Mulungu, uwene we akwinza munsi ." ²⁸ Lweamala kuyanga izi, ahabhala kukwakwe nukumuholela umukulu wakwe Mariamu kulubhazu. Ahati, "Musambilizi alipanapa akukwita." ²⁹ Mariamu lweayivwa izi, ahabhuha lubhilo nukubhala kwa Yesu. ³⁰ Wope Uyesu amamile kwinza amashili mukasi ya nkaya, loli amamile amashili pabhuzilo peahomanile nu Martha. ³¹ Pe Abhayahudi bhebhamile nu Mariamu munyumba yabhala bhebhamile bhahamusubhazyaga, lwe bhamwenya akubhuha lubhilo nukufuma kunzi, bhahamulandata; bhasibhaga ukuti akubhala kushilibha ingape abhale alilaje kunuko. ³² Pe Mariamu, lweafiha pala Uyesu peamamile ahamwenya, peahagwa pansi ya vinama vwakwe nukumubhuzya, "Mwene, inzavwe ingawalipo panapa, umujenzi wane ngeatafuye." ³³ Uyesu lwe amwenya ahalila, na Bhayahudi bhebhahinza nawope poka bhamile bhahalilaga wope, bhahashesyaga mwa mupepo nu kuswimililwa; ³⁴ ahayanga, "Mumukasizye kwi? bhahamubhuzya, Mwene, nzaga wenye." ³⁵ Uyesu ahalila. ³⁶ Pe Abhayahudi bhahayanga, "Yenya vweamuganile Ulazaro!" ³⁷ Loli abhanji mumwabho bhahayanga, "Te wewuno, umuntu weahagigula aminso gawula weamile untonko, atahanza ukuti uno umuntu atahafwe?" ³⁸ Pe Uyesu, amamile ahashesyaga mukasi yakwe sona, ahabhala kwekushilibha. Salizi lyamile impaho, yibhwe lya bhishilwe papakwe. ³⁹ Uyesu ahayanga, "Lyefwe ibhwe." Umartha, nu mukulu wakwe nu Lazaro, weamafuye, ahamubhuzya Uyesu, "Mwene, kuhabhalilizyo iha, umubhili wupezile wubhozile, panongwa kufuma mufwe kusiku zine." ⁴⁰ Uyesu ahamubhuzya, "Ine ntahabhabhuzya ukuti, inzavwe ungasubhila, uliyenya ubhumwamu bhwa Mulungu?" ⁴¹ Penga lumo bhahefwa ibhwe. Uyesu ahenya aminso gakwe kumwanya nu kuyanga, "Tata, nkunkusalifwa pakuti ukunivwa. ⁴² Imanyile ukuti ukunivwa ulwinji, loli panongwa ya bhwinji bhwe bhwimiliye kuzyungulila ukuti nkuyanga iga, ingape bhahondeye bhasubhile ukuti wewe usontelezizye." ⁴³ Lwe ayanga aga, ahalila kwizwi ipiti, "Lazaro, fuma kunzi!" ⁴⁴ Umufwe afumila kunzi amapinyilwe inyobhe ni vinama nishitambala sha kusyilila, na paminso gakwe apinyilwe na hatambala." Uyesu ahabhabhuzya, "Musatule mumuleshele asogolaje." ⁴⁵ Pe Abhayahudi abhinji bhebhinzile kwa Mariamu nu kwenya Uyesu she abhomvile, bhahamusubhila; ⁴⁶ loli bhamo mumwabho bhahabhala ku Bhafarisayi nu kubhabhuzya zyonti zye Uyesu abhomvile. ⁴⁷ Pe abhapiti bha shiputo na Bhafarisayi bhahabhungana poka pabhuzilo bhwa kuyanga, "Tubhombe ishoni? Umuntu uno akaubhomba ivimanyilo ivwinji. ⁴⁸ Pe nga tungamuleha bhwebhulo weka, bhonti bhakumusubhila; Abharoma bhaliyinza kwega vwonti pabhuzilo bhwitu ni nsi yitu." ⁴⁹ Pe bhwebhulo, umuntu woka mumwabho,Kayafa, we amali mupiti wa Washiputo umwaha uho, ahati, ⁵⁰ "Mutamanyile shoshonti nzila. Mutakusibhilila ukuti yihondeye panongwa yinyu ukuti umuntu woka ahondeye kufwa panangwa ya bhantu kushila insi yonti kulobha." ⁵¹ Iga atagayanzile panongwa yakwe wuyo, lwe,nape amile mupiti wa shiputo ku mwaha hula, ahakubhwa ukuti Uyesu alifwa panongwa ya nsi; ⁵² pe te kwe munsi yiyo yeka, loli Uyesu ahaondeye bhwebhulo kubhabhunganiha abhana bha Mulungu bhe bhanyampine ubhuzilo shahashaha. ⁵³ Pengalumo kufumila isiku ilyo nukujendelela bhahayanzanya izya kumugoga Uyesu. ⁵⁴ Uyesu atahajenda nalumo pabhuzelu zelu Mubhayahudi, loli ahepa apo nukubhala kunsi yeyamile papipi nu lugwa munkaya yizina Efraimu. Ipo ahatendama na bhasundikwa bhakwe. ⁵⁵ Lwe Ichaka sha Bhayahudi shamile shasejeleye, na bhinji bhahazubha kubhala Yerusalemu mulubhazu ya munkaya lwe Ichaka yashli ingape bhahondeye kuyizelufwa bhabho bheka. ⁵⁶ Bhamile bhakumulondola Uyesu, nukuyanga wonti wula pebhamile bhimiliye mushibhanza, "Mukusibhilila ishoni? Ukuti ataliyinza muchaka?" ⁵⁷ Aha bhalilizyo iha abhapiti bhashiputo na Bhafarisayi bhamile bhafumizye inkomelezyo penga wumo angamanya Uyesu kweali, ahondeye ayanje kweali ingape ukuti bhahondeye bhamuleme.