¹ Isiku 6 lweashili kufiha Ichaka, Uyesu ahabhala Bethania, pamaliopo Ulazaro, uwene weahamuzusya kufuma ku bhafwe. ² Pebhahamuleshela ishakulya isha hamazubha uko, nu Martha ahamutumishila, ahabhalilo iho Ulazaro amali woka bhalipo bhala bhebha tendamaga kushakulya poka nu Yesu. ³ Kufuma apo Umariamu ahanyatula paundi ya mafuta gegagomvilwe kumahanji amazelu, aga pamwanya nkani ahamupaha Uyesu muvinama , nukumusyumula mivinama munsisi zyakwe; inyumba yonti yihizula umunsi wa mafuta. ⁴ Uyuda Isikalyoti, woka mubhala abhasundikwa bhakwe, we wula wealimuhana Uyesu, ahati, ⁵ "Shoni she amafuta aga nkegakazwa kumadinali imiya zitatu pe bhahabhapa abhapina?" ⁶ Wope ahayanga igo, tekwekubhenyezya ubhwila abhapina, loli panongwa amali mwibha: uwene we amalemile ishifuko sha hela na pe ahegaga vimo vwe vili mukasi umo panangwa yakwe wuyo. ⁷ Uyesu ahayanga muleshe abhishe shealinasho panongwa ya siku lya kusyila gane. ⁸ Abhapina mulinabhope isiku zyonti; loli te mubhe nine isikku zyonti." ⁹ Pe ubhwinji bhwa Bhayahudi bhahinza bhamanya ukuti Uyesu aliko, bhope bhahinza, te panongwa ya Yesu bhwebhulo, loli bhamwenye nu Lazaro we Uyesu ahamuzusya kufuma kubhafwe. ¹⁰ Bhope abhapiti bhashiputo hayanjizyanya nukusibhilila pe bhamugoje Ulazaro; ¹¹ shekuti panongwa yakwe abhinji mu Bhayahudi bhahepa na pe bhaha musubhila Uyesu. ¹² Isiku lya bhubhili lyakwe ubhwinji ubhupiti bhahinza ku ckaka. Pe bhahivwa kuti Uyesu akwinza ku Yerusalemu, ¹³ bhahega utusamba twa makwi ga mitende nu kufuma panzi kubhala kumuposhela pe bhahoma ahalanga, "Hosana! Ashindikwaje uwene we akwinza kwi zina lya Mwene, Umwene wa Iziraeli." ¹⁴ Uyesu ahamwaga umwana-dogomi ahamuzubha; inzavwe lyasimvilwe, ¹⁵ "Utahanyile, mulindu Sayuni; yenya Umwene waho akwinza, azubhile mwana-ndogomi." ¹⁶ Abhasundikwa bhakwe bhatahagamanya aga apo suti; loli Uyesu ashindikwe, pe bhahinza bhakumbuha ukuti iga gasimvilwe nu uwene ukuti bhabhomvile iga kukwakwe. ¹⁷ Pelila ubhwinji bhwa bhantu bhebhalipo poka nu Yesu pe bhahamuholela Lazaro kufuma mushilibha, bhahasimishizya ku bhanji. ¹⁸ Pe shali panongwa ili lyope ukuti ubhwinji bhwa bhe bhahasogola ku poshela ningwa bhahivwa lya kuti abhomvile ishimalo isho. ¹⁹ Amafarisayi bhahazanya bhabho bhene, "Yenya, isalizi mutahondeye kubhomba lyolyonti; yenya, insi yasogola kukwakwe." ²⁰ Pe bhamo Muyunani bhalimo mukasi mubhala bhe bhahasogolaga kubhala kuchaka. ²¹ Abha bhahabhala kwa Filipo, weamafumile Bethsaida ya Galilayi, bhahamulabha bhahayangaga, "Mwene, iswe tukunonwa kumwenya Uyesu." ²² Filipo ahabhala ahamubhuzya Andurea; Andurea nu Filipo bhahabhala nu kumubhuzya Uyesu. ²³ Uyesu ahabhamula ahati, "Isalizi hafiha panongwa ya Mwana wa Muntu kushindikwa. ²⁴ Subhila, subhila, nkubhabhuzya, ulusanga lwa muzimwa lutakugwa munsi nukufwa, lukubha ahabhele hehanaho heka lulo lweka; loli pe nga lwafwa, lukuhoma isanga inyinji. ²⁵ Wula we akwanza ubhulanzi bhwakwe alibhutezya; loli wula we akubhuhalalila ubhulanzi wakwe munsi umu alimwinjizya mubhulanzi bhwa shima. ²⁶ Umuntu wowonti akumbombolela ine, pe andandate; nine pendili, pewope nu mubhomvi wane alibha. Umuntu wowonti akumbombela, Utata alimushindiha. ²⁷ Isalizi umoyo wane wayimba: nine injanje eshi? 'Utata, umposhe muhabhalilizyo iha'? Loli mukwanza uku nafishila ahabhalilizyo aha. ²⁸ Utata, ulizuvwe izina lyaho." Pe izwi lihinza kufuma kumwanya nukuyanga, "Indizyvizye nine ndililizuvwa habhili." ²⁹ Pe abhantu bhe bhimiliye papipi nawuyo bhahivwa, bhahati ukuti twivwa ulubhuno. Abhanji bhayanga, "Uhabhizya ahayanga nawope." ³⁰ Uyesu ahamula nukuyanga, ''Izwi ili litinzile panongwa yane , loli panongwa yinyu. ³¹ Isalizi ukulongwa kwa nsii ino kulipo: Isalizi umupiti wa nsi ino alisumbilwa kunzi. ³² Nine namile pamwanya pansi, nkubhakwesa bhonti kukwane ." ³³ Ahayanga izi kulolesya ifwa yoni yekuti afwe. ³⁴ Abhantu bhahamwamula, "Iswe twivuye munkomelezyo izyakuti Kirisitu alitendama shima. Lwe kuyanga ashi, 'Umwana Muntu ukuti ashindikwaje pamwanya'? Uno Umwana wa Muntu wu nanu?" ³⁵ Pe Uyesu ahabhabhuzya, "Ubhuzelu pe bhulipo nimwe ahabhalilizyo hansi. Sogolaga pemushili mulumu bhuzelu ingape ishisi shitahabhigalile. Wula akujenda mushisi atamanyile kwe akubhala. ³⁶ Pe mushili mulinubhuzelu, musubhile ubhuzelu ubhwo ingamubhanje mwe bhana bha bhuzelu," Uyesu ahayanga izi pe kufuma apo ahasogola kuwunji ahavwama bhahamwenye. ³⁷ Lwe Uyesu ahabhomba ivimanyilo ivwinji vwonti ivwo pilongolela lyabho, bhashili bhatahasubhila ³⁸ pililu njisye izwi lya mukubhwi Isaya, ahayanga : "Mwene, pe wunanu weakuzyitiha amazwi gitu? Pe inyobhe zya Mwene azibhonyi unanu?" ³⁹ Pe nongwa abhene bhatahasubhil, pe Uisaya ahayanganga sona, ⁴⁰ "Abhefizye aminso, agomvile ubhugomo amoyo gabho, bhatahinze bhenya kuminso gabho bhagazimanyisyana kumoyo gabho nukupinduha nine nkabhaponwa." ⁴¹ Uisaya ahayanga amazwi ago pakuti ahenya ubhupiti bhwa Yesu pe ahayanga ubhupiti bhwa mazwi gakwe. ⁴² Nashe, ngazyali bhwebhulo abhapiti abhinji bhamusubhiye Uyesu; loli panongwa ya Mafarisayi, bhatahitiha ingape bhatahinze bhahabhefwe mushibhanza. ⁴³ Bhahanzaga umushinzi wa bhana muntu kulusya umushinzi we wukufumila kwa Mulungu. ⁴⁴ Uyesu ahahola izwi nu kuyanga, "Wula weakusubhila ine, atakusubhila nene bhwelele loli nu wene weantumile ine, ⁴⁵ wope akunenya ine akumwenya uwene we antumile. ⁴⁶ Ine ninzile inzavwe bhuzelu bhwa nsi ipenga umuntu akusubhila ine atalibha mushisi. ⁴⁷ Penga umuntu wowonti wula akugivwa amazwi gane loli atahalemaje, ine ntankumulonga; pentahinza kuyilonga insi, loli iposhe insi. ⁴⁸ We ankunkana ine naweatakugitiha amazwi gane, alinawope uwa kumulonga: izwi linilyo lye ndiyanzile lyelilimulonga isiku lya bhumalilo. ⁴⁹ Pe ine ntayanzile ine nene neka. Loli Utata wa ambisile, uwene wuyo weka andanjizizye zyendiziyanga pe nagendiyangaga. ⁵⁰ Nine manyile ukuti ulunkomelezyo lyakwe lwa bhulanzi bhwa shima; pe aga genkuyanga ine -inzavwe Utata amambuzizye, vwekuyanga kukwabho."