¹ Pisinda pa ganaga Uyesu ahazyungula mu Galilayi, panongwa atahazyaga kubhala Kubhayahudi panongwa kubhayahudi bhamile kubhomba isibho izya kuti bhamugoje. ² Isalizi ichaka ya Bhayahudi, ichaka ya mutusansa, yapala miye. ³ Pe lwe abhajenzi bhakwe lwe bhamubhuzya, "Yepa pabhuzilo apa usogole ku Bhayahudi, pe abhasundikwa bhabho bhope bhulo bha zyenye imbombo zye kubhomba. ⁴ Litalipo lye abhomvile kubhwila pamo wuyo weka akwanza aloleshe pa bhuzelu. Inga pe kubhomba zinizi , uliyilolesya weka kubha munsi." ⁵ Na bhajenzi bhakwe bhulo bhatahamusubhila. ⁶ Pe Uyesu ahabhabhuzya, "Ahabhalilo hane hatafisile hashili, loli bhabhalilo hinyu hafisile hali. ⁷ Insi yitahondeye kubha halalila imwe, loli yikunkalalila ine panongwa nkuhomelezya ukuti imbombo zyakwe mbibhi. ⁸ Zubhaga kubhala kuchaka; ine ntakubhala ku chaka ishi panongwa ahabhalilo hane hashili kufiha." ⁹ Lwe aziyanga zinizi ku kwabho, ahasyala Galilayi. ¹⁰ Pe lwe abhajenzi bhakwe lwe bhasogola kuchaka, pe wope ahasogola, te pepabhuzelu loli ku kwiru. ¹¹ Abhayuda bhahanda kumulondola mu chaka nu kuyanga, "Ali kwiyi?" ¹² Kwamile ni zyakuyanjizyanwa inyinji mukasi mu bhantu izyakwe. Bhamo bhahayanga, "Umuntu mwinza." Abhinji bhahayanga, "Awe, akubhagombaniha abhantu." ¹³ Pe bhwebhulo atalipo we ahayanganga pa bhuzelu izyakwe kwe pa kubhanyila Abhayuda. ¹⁴ Lwe ichaka shafiha pakasikasi, Uyesu ahazubha kubhala mushibhanza mu kwanda kusambilizya. ¹⁵ Abhayahudi bhahanda kusukumila nu kuyanga, "Pe bhulibhuli umuntu uno amanyile ivintu ivwinji? Atasambiliye nalumo." ¹⁶ Uyesu ahabhamula nu kubhabhuzya, "Ivisambilizyo vwane te vwane, loli vwakwe wula we antumiye. ¹⁷ Uno wowonti akwanza kubhomba ukwanza kwakwe wuyo, atamanye izya visambilizyo ivi inzavwe gakufumila kwa Mulungu, pamo inzavwe nkuyanga kufumila ku kwane nene neka. ¹⁸ Wonti we akuziyanga gafumile ku kwakwe wuyo akwanza ubhumwamu bhwakwe, loli wonnti weakwanza ubhumwamu bhwakwe uwene weamutumile, umuntu uyo wewa bhwanalyoli, pe mukasi mumwakwe nabhumo ubhu bhomba ubhugolosu. ¹⁹ Umusa atahabhapa imwe inkomelezyo? Loli atalimo na woka mumwinyu we akubhomba inkomelezyo. shoni she mukwanza ukugona? ²⁰ Uluhomanu bhahamula, "Ulinipepo. Unanu we akwanza kukugoga?" ²¹ Uyesu ahamula nu kubhabhuzya, "Nabhomba imbombo yoka, nimwe mwenti mwasukumizya panongwa yakwe. ²² Umusa ahabhapa kuholwa (te kwekuti yifumile kubhasokulu), na munsiku zya sabata muku mubhola umuntu. ²³ Penga umuntu aposhela ukubholwa mukasi mu nsiku zya Sabata inga kuti inkomelezyo zya Musa yitahananjishe, shoni she mukunkalalila ine panongwa na muponiya umuntu abhe apona ahinza mukasi mu Sabata? ²⁴ Mutahalonje mwezibhanje na haloleshele, loli mulonganaje mu bhugolosu. ²⁵ Bhamo mumwabho kufuma Yerusalemu bhahayanga, "Te wuyo webhakumulondola kumugoga? ²⁶ Pe yenya, aliyanga pa bhuzelu bhuzelu, pe bhatakuyanga shoshonti papakwe. Zitahondeye nga bhanga abhalongozi bha manyile ubhunalyoli ukuti uno Kirisitu, zihondeye kubha? ²⁷ Tumanyile uno umuntu akufumila kwiyi. Ukirisitu ingayinza, inza bhwe bhulo, nawumo we alizimanya kwiyi akufumila." ²⁸ Uyesu ahaholaga izwi lyakwe mushibhanza, ahasambilizyaga nukuyanga, "Imwe mwenti mumanyile ine mumanyile kweifumile. ²⁹ Ntahinza nene neka, loli wula weamantumile we wanalyoli, pe mutamumanyile uwene." ³⁰ Bhahanzaga kuninjizya kumulema, loli atalipo inga woka weahayenya inyobhe yakwe papakwe panongwa ahabhalilizyo hakwe hashili kufiha. ³¹ Pe bhwebhulo abhinji nuluhomano bhahamusubhalila. Bhahayanga Kirisitu inga ayinza, alibhomba ivimanyilo ivwinji kushila zye abhomba umuntu uno?" ³² Amafarisayi bhahivwa ishilundiho shikunong'onezya ivintu ivi izya Yesu, pe abhapiti bha shiputo na Mafarisayi bhahasontelezya abhalongozi inape bhamuleme. ³³ Pe Uyesu ahayanga, "Isuti kuli ahabhalilizyo ahansi kuti tubhe swenti, pe pilongolela lya nkusogola kukwakwe uwene we amantumile. ³⁴ Muli ndondola pe mutalinenya; kula kwe nkusogola, mutahondeye kwinza,. ³⁵ Pe Abhayahudi bhahayazyanwa bhene bhene umuntu uno akubhala kwiyi kwekutahondeye kumwenya? Akubhala kubhe bhasobheleye mukasi ya Bhayunani nu kubhasambilizya Abhayunani? ³⁶ Pe lizwi lyoni ili lye aliyanga, 'Kuti muhondele pe temunaje; kula kwe nkubhala mutahondeye kwinza?" ³⁷ Pe pisiku ilya bhumalilo, isiku ipiti ilya chaka, Uyesu ahimilila ahahola izwi, ahati, ''Inga wowonti ali ni shinyota, pe ayinze kukwane amwele. ³⁸ Uwene we asubhiye ine, inza vwe amazwi gakuyanga, kufuma mukasi yakwe galisululuha amajenje ga minzi ga bhulanzi.'' ³⁹ Loli ahagayanga aga ukwa Mupepo, we abhene bhebhakumusubhila bhalimuposhela; Umupepo ashili kwinza panongwa Uyesu amashili kushindikwa. ⁴⁰ Pe bhamu abhaluhomano, lwe bhivwa amazwi aga, bhahati, ''Nalyoli uno wumukubhwi.'' ⁴¹ Abhanji bhahayanga, ''Uno wu Kirisiti.'' Loli bhamu bhahati, ''shoni, Kirisiti angabhwezya kufuma ku Galilaya? ⁴² Amazwi gatayanzile kuti Ukirisiti alifumila mukasi mu nkolo ya Deveti nukufumila ku Bethelehemu, munsi ye u Deveti amalipo? ⁴³ Ubhwo, pala wuhabhuha ukugabhinkana pakasi ya bhantu panongwa yakwe. ⁴⁴ Abhanji mukasi yabho nge bhahamulema, loli atalipo we agolosizye inyobhe yakwe pamwanya yakwe. ⁴⁵ Pebhala abhalongozi bhahagaluha ku bhapiti bha shiputo na Bhafarisayo, bhope bhahabhabhuzya, ''Pe shoni shemutamulesite?'' ⁴⁶ Abhalongozi bhahatamula, ''Nawumo umuntu ahayanga inza uno lwe ashili.'' ⁴⁷ Pe Abhafalisayo lwe bhabhatamula, ''Ni mwe bhulo msyovilwe? ⁴⁸ Kuli na wowonti mukasi ya bhumwene we amusubhaliye, uwe wowonti uwa Bhafarisayo? ⁴⁹ Loli abha abhankomano bhebhatamanyile indajizyo- bhabhunilwe.'' ⁵⁰ Unikodemo ahabhabhuzya [uwene wahamubhalila u Yesu hali, amali woka wa Mafarisayo]. ⁵¹ ''Pe inkomelezyo yitu yikumlonga umuntu lwe mushili kumutejelezya suti nukumanya sheakushibhomba?'' ⁵² Bhahamutamuha nu kumubhuzya , ''Niwe bhulo ukufumila ku Galilaya? Londola na uyenye kuti nawumo umukubhwi we ahafumila ku Galilaya.'' ⁵³ (Yenya; Gamo amazwi aga Yohani 7: 53-8: 11 gatalipo mu mkalata inyinza izya hali') .Pe wowonti umuntu ahabhala kunkaya yakwe.