¹ Lwe zyashila izi, Uyesu ahabhala ulubhazu lwi jenje lya Galililayi, wope izina lijenje lya Tiberia. ² Luhomano ulupiti lwamile luhamulandataga panongwa amamile ivisukumizyo vweamavibhomvile kubhebhabhinile. ³ Uyesu ahazubha pamwanya paka palubhazu lwa pamwanya ulwigamba nu kutendama uko na abhasundikwa bhakwe ⁴ (Ni pasa, ichaka sha Bhayahudi shamile shasejele). ⁵ Uyesu lwe ayenya aminso gakwe pamwanya nukwenya abhantu abhinji bhakwinza kukwakwe, ahamubhuzya Ufilipi, "Tubhale kwiyi kukala mikati ingape abha bhahondeye kulya"? ⁶ (Loli Uyesu ahayanga izi kwa Filipo ukwa kumuyezya kwekuti wuyo weka amamanyile shekuti ashibhombe). ⁷ Filipo ahamwamula, "Ni mikati ya bhupiti bhwa dinali 200 gatangakwila pope umuntu woka pope kutwaga utunsi." ⁸ Andrea,woka mubhasundikwa bhakwe abhajenzi bhakwe Simoni Peteri ahamubhuzya ⁹ Uyesu, "Kuli umwavuli apa alini mikati misano ni swi zibhili, loli ino yihondeye kubhantu abhinji bhunubhu? ¹⁰ Uyesu ahabhabhuzya, "Bhihazye abhantu pansi" (pamile ni sole ilyinji pabhuzilo bhula). Pe abhanavuli bhamile5,000 bhahatendama pansi. ¹¹ Pe Uyesu ahega yila imikati misano ahasalifwa ahabhapa bhala bhebhamile bhatendime. Bhwebhulo ahabhapa iswi inzavwe bhahanzilaga. ¹² Abhantu lwebhikusi, ahabhabhuzya abhasundikwa bhakwe, "Vibhunganishe utulanga twetuswaye, ukuti shitahateje na shimoshimo." ¹³ Pe bhahabhunganiha nu kwizuzya iviseje 12, utulanga twa mikati gasano lya shayiri- utubhulubhusya vwe vwa sangine na bhala bhebhaliye. ¹⁴ Pe abhantu lwe bhenya ishisugo ishi she amabhomvile bhahayanga, "Nalyoli uno wewula umukubhwi weakwinza munsi." ¹⁵ Uyesu lweamanya ukuti bhebhamile bhahanzaga kumulema ingape bhamugombe abhe umwene wabho, ahayisabhula, sona ahabhala mwigamba wuyo weka. ¹⁶ Lwe shabha ha mazubha, abhasundikwa bhakwe bhahiha kubhala kwijenje. ¹⁷ Bhahinjila mwivotii pe bhamile bhahalambaga kubhala Kapernaumu. (Ishisi shamile shihinjilaga nu Yesu amali amashili kwinza kukwabho). ¹⁸ Ahabhalilizyo iho inkungu inkali yamile yihavugulaga, ni jenje lyamile kunanjiha. ¹⁹ Sona abhasundikwa bhakwe bhamile bhayilesile imayili inzavwe amashumi gabhili na gasano pamo amashumi gatatu, bhahamwenya Uyesu akujenda pamwanya ya minzi ukusejelela kwivoti, pe bhahatetema. ²⁰ Loli ahabhabhuzya, "Ine nene! Mutahateteme." ²¹ Pe lwe bhahayisenganyaga kujenda mwivoti, pe lubhilo ivoti lihafiha pansi ingomo pabhuzilo bhwebhahasogolaga. ²² Isiku lyeliha landata, abhantu bhebhamile bhimiliye ulubhazu lwijenje bhahenya ivoti nalimo uwunji loli wula we Uyesu na bhasundikwa bhakwe bhamile bhatinjiye loli abhasundikwa bhakwe bhamile bhabhazile kukwabho bheka. ²³ (Ingape, galimo na gamo amavoti gegafumiliye Tiberia papipi nu bhuzilo pebhaliye mikati lwe Umwene ahafumwa ulusalifwo). ²⁴ Ahabhalilo he inkomano lwe bhamwanya kuti te wu Yesu pamo abhasundikwa bhakwe bhebhalipo kula, abhene bhahinjila mwi voti bhahasogola ku Kapernaumu bhahamulandata Uyesu. ²⁵ Lwe bhamwaga isyila ilinji ilya mwijenje bhahamubhuzilizya, ''Mwene uhinza liyi uku?'' ²⁶ Uyesu ahamutamula, ahabhabhuzya, Subhila, subhila, mukunanza ine, tekwekuti panongwa muhashenya ishimanyilo, loli panongwa muhalya ubhugali nu kwikuta. ²⁷ Leshi kushibhombela imbombo ishakulya she shikunanjiha, loli mshibhombele imbombo ishakulya she shikubha shima na shima she umwana wa Adamu alibhapa, kwekuti Umulungu Utata abhisile ishimanyilo papakwe.'' ²⁸ Pe bhahamubhuzya, ''Pe shoni tukwanzibhwa kubhomba inga kuzibhomba imbombo zya Mulungu?'' ²⁹ Uyesu ahatamula, ''Ino ye mbombo ya Mulungu: ukuti mumusubhile uwene we ahamsontelezya.'' ³⁰ Pe bhahamubhuzya, ''Pe vimanyilo vwoni kuti ubhombe, kuti tungabhwezya kuzyenya na kusubhila? Kubhombe shoni? ³¹ Abhatata bhitu bhahalya imaana mulugwa, inza vwe yisimbilwe, ''Ahabhapa ubhugali kufumila kumwanya inga bhalye.'' ³² Pe Uyesu ahabhatamula, ''Subhila, subhila, te wu Mose wahabhapa ubhugali kufuma kumwanya, loli Utata wane we akubhapa ubhugali bhwa nalyoli kufuma kumwanya. ³³ She kuti ubhugali bhwa Mulungu bhwebhula bhwebhukwiha kufuma kumwanya na kubhupa ubhupuma munsi. ³⁴ Pe bhaha mubhuzya, ''Mwene tupe ubhu ubhugali ahabhalilo honti.'' ³⁵ Uyesu ahabhabhuzya, ''Ine ne bhugali bhwa bhupuma, uwene wa kwinza kukwane tahabhe ni nzala nu wene wakunitiha tahenye ishinyota nalumo.''' ³⁶ Lwe mbabhuzizye kuti, mwanenya, na mshili mutakusubhila. ³⁷ Bhonti bhe Utata akumpa bhaliyinza kukwane, nawowonti wa kwinza kukwane tenkamsumbe kunzi nalumo. ³⁸ Kwe kuti nishile kufuma kumwanya, te nongwa ya kubhomba ukugana kwane, loli kugana kwakwe weahansontelezya. ³⁹ Nishi she shikunzi shakwe we ahansontelezya, kuti mutahamutezye inga woka wa bhala bheampiye, loli ndibhazusya isiku lya bhumalilo. ⁴⁰ She kuti ishi she shikunzi sha Tata wane, kuti wowonti wakumwenya Umwana nakumsubhila abhe nubhupuma bhwa shima; nine ndimzusya isiku lya bhumulilo. ⁴¹ She Abhayahudi bhahasyongana mu wene panongwa ahayanga, ''Ine ne bhugali bhwe bhuhiha kufuma kumwanya.'' ⁴² Bhahati, ''Uno te Uyesu umwana wa Yosefu, we utata wakwe nu nyina wakwe tumumanyile? Yabha bhuli lelo akuti, 'Niha kufuma kumwanya'?'' ⁴³ Uyesu ahatamula, ahabhabhuzya, ''Mtahasyonganaje mumwinyu mwemwe mweka. ⁴⁴ Nawumo umuntu wakwinza kukwane inga atakweswa nu Tata wane wansontelezizye, nine ndimuzyusya isiku lya bhumalilo. ⁴⁵ Pe lisimvilwe mu bhamkubhwi, 'Bhalisambilizwa nu Mulungu.' Wula we ayivuye pe amanyile kufuma kwa Tata, akwinza kukwane. ⁴⁶ Te kwekuti alipo umuntu we ahamwenya Utata, loli we amafumiye kwa Mulungu- amubhonyi Utata. ⁴⁷ Subhila, subhila wula wa kusubhila abhwazile ubhulanzi bhwa shima. ⁴⁸ Ine ne bhugali bhwa bhupuma. ⁴⁹ nabha tata bhinyu bhahalya maana mulugwa, pe bhahafwa. ⁵⁰ Ubhu bhwe bhugali bhwebhukwiha kufuma kumwany, inga kuti umuntu abhulye ubhulanzi bhwakwe inga atahafwe. ⁵¹ Ine ne bhugali bhwa bhulanzi bhwe bhwisile kufuma kumwanya. Inga umuntu wowonti alya ulubhazu lwa bhugali ubhu, alitendama shima. Ubhugali bhwendifumwa bhwe mubhili wane panongwa ya bhulanzi bhwa munsi.'' ⁵² Abhayahudi bhahahalala bhabho ku bhabho pe bhahanda kudalinkana bhahatinji, ''Umuntu uno akubhwezya bhuli kutupa umubhili wakwe tuwulye?''

⁵³ Pe Uyesu ahabhabhuzya, ''Subhila, subhila, inga mtalya umubhili uwa Mwana wa Adamu nu kulimwela ibhanda lyakwe, temuhabhe nubhupuma mukasi yinyu. ⁵⁴ Wowonti we akuwulya umubhili wane nakulimwela ibhanda lyane alunubhupuma bhwa shima, nine ndimuzyusya isiku lya bhumalilo. ⁵⁵ Kwe kuti umubhili wane she shakulya sha nalyoli, ni bhanda lyane shakumwela shanalyoli. ⁵⁶ Uwene weakughulya umubhili wane nu kulimwela ibhanda lyane akutendama mukasi yane, nine mukasi yakwe. ⁵⁷ Inzavwe Utata mwene bhulanzi vwe antumile, ninza vwe nkutendama panongwa ya Tata, nu wope alitendama panongwa yane. ⁵⁸ Uno we mukati wewisile kufuma kumwanya, te inzavwe abhatata bhahalya nu kufwa. Uwene we akulya uno alitendama shima. ⁵⁹ Uyesu ahagayanga iga mukasi musinagogi pe ahasambilizyaga uko Kapernaumu. ⁶⁰ Pe abhinji bha bhasundikwa bhakwe lwebhivwa aga bhahayanga, "Ili lisambilizi igomo unanu ahondeye kuziposhela?" ⁶¹ Uyesu panongwa ahamanya ukuti abhasundikwa bhakwe bha sibhilila bhahasikitiha imbombo ini, ahabhabhuzya pe izwi ili lya bhahalalizya? ⁶² Pe zilibha bhuli inga mwinza mwamwenya Umwana wa Muntu akwiha kufuma kwe amali lwe ashili? ⁶³ We Mupepo weakufumwa ubhulanzi. Amazwi ge nkayanga kukwinyu ge mupepo nu bhulanzi. ⁶⁴ Pe bhalipo bhamo mukasi yinu bhe bhatasubhiye." panongwa Uyesu amanyile kufumila pa bhwandilo wula we atahondeye kusubhila na wula we amamuhanile. ⁶⁵ Ahamubhuzya, panongwa ili nkabhabhuzya kuti atalipo umuntu we ahondeye kwinza kwane lole apeliwe nu Tata." ⁶⁶ Lwe gashila aga abhasundikwa bhakwe abhinji bhahagalushila mwisinda pe bhata hajenzanya nawope sona. ⁶⁷ Uyesu ahabhabhuzya bhala ishumi na bhabhili," Pe nimwe mukwanza kwepa?" ⁶⁸ Simoni Peteri ahamwamula, "Mwene tujendaje kwa nanu pe iwe uli na mazwi ga bhulanzi bhwa shima na shima, ⁶⁹ pe tusubhiye nu kumanya ukuti iwe wemufinjile wa Mulungu." ⁷⁰ Uyesu ahabhabhuzya, "Pe ine ntabhasevile imwe, pe woka winyu mukwalanzi? ⁷¹ Isalizi lwe akuyanga izya Yuda, mwana wa Simoni Isikariote, kwekuti amali wuyo amali mu bhala mushumi lwoka na bhabhili, amali wuyo nga ahamuhana Uyesu.