¹ Inzanchi isiku ilya bhwando ya juma; lwe kwashili nishisi, u Mariamu Magdalena ahinza kwi pumpa; alyenya lila ibhwe lyefizwe pi pumpa. ² Pe ubhwo ahashimbila kubhala kwa Simoni Peteri na kughula umusundikwa uwamwabho we Uyesu amuganile, pe ahabhabhuzya, ''bhamunyetuye Utata mwi pumpa, nitwe tutakumanya kula kwebhamukasizye.'' ³ Pe Upeteri na wula umusundikwa uwamwabho bhahafuma, kubhala kwi pumpa. ⁴ Bhonti bhahashimbila poka; wula umusundikwa uwamwabho ahashimbila kuhalambana nkani ya Peteri nukufuha pi pumpa wa bhwandilo. ⁵ Ahimilila pe ahenya mwipumpa; ahawenya umwenda nulukusa vikasite, loli atahinjila mukasi. ⁶ Pe Usimoni Peteri wope ahafiha ahinjila mukasi yi pumpa. Ahawenya umwenda nulukusa vikatile pala ⁷ pe nahatambala he hali kwitwe lyakwe hatakatile poka na gala amenda nulukusa loli yakasite palubhazu yeka. ⁸ Pe wula umusundikwa uwamwabho wope lwe ayinjila mukasi yi pumpa; ahenya nukusubhila. ⁹ Pe kuti muhabhalilizyo aho bhashili bhatagamanyile amazwi kuti yamuhondeye Uyesu azyushe habhili mu bhafwe. ¹⁰ Pe abhasundikwa bhahabhala habhili kunkaya zyabho. ¹¹ Inza bhwebhulo, Umariamu amamile amimiliye papipi ahalila, vwe amamile amajendeleye kulila, ahimilila pe ahenyelezya mushilibha. ¹² Ahenya abhahabhizya bhabhili abhavweni ivizelu bhatendime woka kwitwe nu bhunji kuvinama pabhuzilo pe Uyesu amamile amakasite. ¹³ Wope bhahamubhuzya, "Mwantanda, shoni she ukulila?" Wope ahabhabhuzya, "Pepa nnongwa bhamwejile Umwene wane, nine ntamanyile kwebhamubhisile." ¹⁴ Lwe amala kuyanga zininzi izi, ahagalunkana nu kumwenya Uyesu lwe ayimiliye. Loli atahamumanya inzavwe wuyo amali Uyesu. ¹⁵ Wope Uyesu ahamubhuzya, "Mayi, shoni she ukulila?" Wope uku ahasibhaga ukuti musunjilila busitani ahamubhuzya, "Mwene, inzavwe wewe umwejile, mbuzye kweumubhisile, nine imbale imweje." ¹⁶ Uyesu ahamubhuzya, "Umariamu." Wope ahagalunkana wuyo weka nukumubhuzya kwa Kiaramu, "Raboni," ino kwekuti yanga, "Musambilizi." ¹⁷ Uyesu ahamubhuzya, "Utahampalamasye, peshili kubhala kwa tata; loli ubhale kubhajenzi bhane ubhabhuzye ukuti indibuluha kubhala kwa Tata wane we wope Utata winyu Umulungu wane nu Mulungu winyu." ¹⁸ Umariamu Magadalena ahinza kubhabhuzya abhasundikwa, "Imubhonyi Umwene," nu kuti amubhuzizye zyonti izi. ¹⁹ Pe lwe yafiha ishamabhwila, isiku ilyo, isiku lya bhwandilo bhwabhusano namalayango gamile gafungilwe pabhuzilo abhasundikwa pebhalipo kubhogopa Abhayahudi, Uyesu ahinza nukwimilila pakasi yabho nukubhabhuzya, "Ubhwihalo bhubhe kukwinyu." ²⁰ Lweamala kuziyanga izi ahabhalolesya inyobhe zyakwe ni mbazu zyakwe. Bhope abhasundikwa lwebhamwenya Umwene bhahaseshela. ²¹ Pe Uyesu ahabhabhuzya sona, "Ubhwihalo bhubhanje nimwe. Inzavwe bhulo Utata zyeantumile ine, bhwebhulo nine kubhatuma imwe." ²² Uyesu lweamala kuyanga izi, ahabhalimbilizya ahabhabhuzya, poshelaji Umupepo Umufinjile. ²³ Wonti muhobhoshelanaje imbibhi, bhahobhoshelilwe; na bhala bhemulibha kunga bhalikungwa." ²⁴ Thomaso, woka mubhala ishumi lyoka na bhabhili, weamali Didimas, Atamile na bhasundikwa abhamwabho Uyesu lwe ayinza. ²⁵ Bhala abhasundikwa abhanji bhahabhabhuzya pilongolela, "Twamwenya Umwene." Wope ahabhabhuzya, "Inzavwe ingantenya iviholanyo vwa miumali munyobhe zyakwe, nukubhiha itasalala twane muviholanyo, penine kubhiha inyobhe zyane mulubhazu lwakwe ntalisubhila." ²⁶ Lwezyashila isiku ziisano na zitatu abhasundikwa bhamile mukasi sona, wope Uthomaso amamile poka nawope. Ahabhalilizyo amalyango gamile gafunjilwe Uyesu ahumilila pakasi yabho. nukuyanga, "Ubhwilalo bhubhanje nimwe." ²⁷ Pe ahamubhuzya Uthomaso, leta asamba haho pewenye inyobhe zyane; leta apa inyobhe zyaho nubhisahe mulubhazu lwane; pamo atahabhe musita kusubhila loli umusubhile." ²⁸ Wope Uthomaso ahamula nu kumubhuzya, "Mwene wane nu Mulungu wane." ²⁹ Uyesu ahamubhuzya, kwekuti wanenya, wasubhila. Bhalotwe abho bhebhankusubhila, pasita kunenya." ³⁰ Pe Uyesu ahalolesya ivimanyilo ivwinji pilongolela lwa bhasundikwa, zye zitahasmbwa nalumo mwa karata uno; ³¹ loli izi zisimvilwe ingape ukuti muhondeye ukusubhila ukuti Uyesu we Ukirisitu, umwana wa Mulungu, nu kuti pemukusubhila mubhe nu bhulanzi mwizina lyakwe.