¹ Pe Upilato ahamunyetula Uyesu nu kumusyempa. ² Bhala abhasikari bhahazinga aminvwa nu kugomba ishipambwi. Bhahayibhiha pitwe lya Yesu nukumuzyalizya izwalo zya zambalau. ³ Bhahamwinzila nu kuyanga, "Iwe we mwene wa Bhayahudi! pe bhahamuhoma kunyobhe zyabho. ⁴ Pe Upilato ahafuma panzi na kubhabhuzya abhantu, ''Yenya nkubhaletela umuntu uno kukwinyu inga mumanye kuti ine ntayenya imbibhi yoyonti mukasi yakwe.'' ⁵ Pe Uyesu ahafuma panzi; azwaye ishisoti sha mimva nishizwalo ishishemamu. Pe Upilato ahabhabhuzya, ''Yenyi umuntu uno apa!'' ⁶ Pe ubhwo lwe uwashiputo usongo wa bhasongo lwe bhamwenya Uyesu, bhahahoma ahalanga nukuti, ''Muyimvwe, muyimvwe.'' Upilato ahabhabhuzya, ''munyetuli mwemwe mweka mumbemmuyimvwe, pe kuti ine ntayibhwenyi inongwa ku kwakwe.'' ⁷ Abhayahudi bhahamtamula Upilato, ''Itwe tulinayo inkomelezyo, na kunkomelezyo iyo yikumwanza afwe panongwa uwene ukuyibhiha kuti mwana wa Mulungu.'' ⁸ Upilato lwe ayimvwa amazwi aga ahonjela kogopa, ⁹ Ahinjila ku Praitorio habhili nu kumubhuzya Uyesu, ''Iwe ukufuma kwiyi? Pe nubhwo, Uyesu atahamtamula. ¹⁰ Pe Upilato ahamubhuzya, ''Pe, iwe utakuyanga nine? Pe, iwe utamanyile kuti ine ndili nukwamula ukwa kukusatula nu kwamla ukwa kukuyimvwa?'' ¹¹ Uyesu ahamtamula, ''Nge utali namaha pakasi yane inga utapelilwe kufuma kumwanya. Pe ubhwo, umuntu wanefizye kukwaho ali ni mbibhi impiti.'' ¹² Kufumila ni lyamulo ili, Upilato ahanza kumuleha musatushe, loli Abhayahudi hbhazuma ishongo nukuti, ''Inga wamleha nubhusatushe pe iwe tewe mumanyani wa Kaisari; Wonti wakuyibhiha kubha wumwene akuyanga shingunga sha kaisari.'' ¹³ Upilato lwe agivwa amazwi aga, ahamtwala Uyesu panzi pe ahatendama pa shitengo isha kulonga ulubhazu lula pepakumanyiha ngati ya mabhwe, loli ku kuheberi, Gabatha. ¹⁴ Isiku ilya kusenganwa lweyafiha, pahabhalilo ha musanya . upilato ahabhabhuzya Abhayahudi, ''Yenyi umwene winyu uno ipa!'' Bhahazuma ishongo, ''Mwefwi, mwefwi,muyimvwe!'' ¹⁵ Upilato ahabhabhuzya, ''Pe, imuyimvwe umwene winyu?''' Wope uwashiputo umupiti ahatamula, ¹⁶ ''Itwe tutali nu mwene loli Ukaisari.'' Pe Upilato ahamufumwa Uyesu kukwabho inga ayimvwe. ¹⁷ Bhope bhahamnyetula Uyesu, wope ahafuma, she anyatuye ishihobhenkanwo shakwe wuyo weka pe ahabhala ubhuzilo bhwebhakubhwita pa nsuto zyitwe, ku Shiheberi shikwitizwa Golgotha. ¹⁸ Pe bhahamuyimvwa Uyesu, poka nao nabhanavuli bhabhili, woka ulubhazu ulu nuwamwabho ulubhazu ulu, nu Yesu pakasi yabho. ¹⁹ Pe Upilato ahasimba ishiholanyo na kushibhiha pamwanya ya shihobhenkanyo.Ipo pahasimbwa; UYESU WA MNAZARETH, MWENE WA BHAYAHUDI. ²⁰ Abhinji bha Bhayahudi bhahashisoma ishimanyilo isho pe ulubhazu lula peayimvwilwe Uyesu alipapipi ni nkaya. Ishimanyilo isho shihasimbwa ku shiheberi, nakushi Roma nakushi Yunani. ²¹ Pe abhasongo bha shiputo abha Bhayahudi bhahamubhuzya Upirato, ''Utahasimbe,' Mwene wa Bhayahudi; loli uwene atili ine ne mwene wa Bhayahudi.'' ²² Wope Upilato ahabhatamula, ''Ge nsimvile lye nsimbile.'' ²³ Lwe abhasilikari lwebhamyimvwa Uyesu, bhahanyetula inzwalo zyakwe nukugabhana mu mbazu folo, wonti we musilikari ulubhazu lwoka, ubhwo bhunubhwo ni nkanzu, Pe yila inkanzu yitasonilwe loli yatabhilwe yonti kufuma pamwanya. ²⁴ Pe bhahayanzanya bhabho ku bhabho, Tutahayizepule, loli tubhazanye ulubhazyo inga kwenya yikubha kwananu.'''Ili lihafumila inga lila isimbo likwilane, lila lyelikuyangwa bhahagabhanya amenda gane, ni nzwalo yane bhahabhazya ulubhazyo.'' ²⁵ Abhasrikali bhahabhomba ivintu ivi. Unyina wa Yesu, umukulu wa nyina wakwe, u Mariamu umushi wa Kleopa nu Mariamu magdalena- abhantabda ibha pe bhimiliye papipi ni shihobhenkanyo sha Yesu. ²⁶ Uyesu lwe amwenya unyina wakwe poka nawula umusundikwa wamamuganile bhahimilila papipi, ahamubhuzya unyina wakwe, ''Mwantanda, yenya, yenya umwana waho uno ipa!'' ²⁷ Pe ahamubhuzya wula umusundikwa, ''Yenya, unipa unyina waho, ''Kufumila ahabhalilo iho wula umusundikwa ahamnyetula kubhala kunkaya yakwe. ²⁸ Lye lyashila ilyo, Ahabhele Uyesu lyeamanya kuti gonti gasila kumala inga kukwilanya amazwi, ahati, ''Kwenya ishinyota.'' ²⁹ Ishililo she shizuye Isiki shabhishilwe pala, pe bhahabhiha ishililo sheshizuye isiki pamwanya ya lutete lwa nsonya, bhahamubhishila mwilomo lyakwe. ³⁰ Wope Uyesu lwe atomola iyo, ahati, '''Yasila.'' Pe ahasulamiha itwe lyakwe, ahamupa umwoyo wakwe. ³¹ Pe bhula hali habhalilo ha masenganyo, na panongwa amabhili gatakwanzibhwa kusyala pamwanya ya shihobhenkanyo ahabhalilo aha Sabato [Pe kuti Isabato lyali lisiku lya injele], abhayahudi bhahamulabha u Pilato kuti ivinama vwabho bhala bhebhayimvwa vivunzwe, na kuti amabhili gabho giswe. ³² Pe abhasirikali bhahinza nu kudumula ivinama vwa muntu wa bhwandilo nuwa bhubhili we ayimvwilwe poka nu Yesu. ³³ Lwebhamfishila Uyesu, bhahamwaga hali amali afuye , pe ubhwo bhatahavunza ivinama vwakwe. ³⁴ Pe nubhwo, woka uwa bhasirikali ahamulasa Uyesu mumbazu ni mpalala, nalubhilo gahafuma aminzi ni bhanda. ³⁵ Wope wahenya ili afumizye ulusimishizyo, nu lusimishizyo lwakwe lwa na lyoli. Uwene amanyile kuti shashiyanzile shanalyoli inga nimwe bhulo musubhile. ³⁶ Gonti iga gali inga lila izwi lyelihayangwa libhwezye kufiha, ''Nawwumo inga woka bhwebhulivunzwa.'' ³⁷ Habhili isimbo ilyamwabho likuti,'' Bhalimwenya uwene webhahamulasa'' ³⁸ Lwe zyashila izi Uyosefu uwa Arimathaya, pe kuti ali musundikwa wa Yesu, loli kukwilu ukwa kubhanyila Abhayahudi, ahamulabha Upilato kuti awunyetule umubhili wa Yesu. Wope Upilato ahamwitishizya. pe Uyosefu ahinza kuwefwa umubhili wa Yesu. ³⁹ Wope Unicodemo we ipo pabhwandilo ahamulandata Uyesu ubhusiku wope ahinza numulembo, uwa bhumwamu bhwa mapaundi miya yoka. ⁴⁰ Pe ubhwo bhahawunyetula umubhili wa Yesu bhahawuzinga mu mwenda umuzeru poka nagala amafuta inza vwe zyamile inkomelezyo zya Bhayahudi ahabhalilo ha kusyila. ⁴¹ Ulubhazu lwe Uyesu ahayimvwa kwamile ni busitani; mkasi ya yila ibusitani pamile ni pumpa ipya lye nawumo umuntu we asyililwe umwo. ⁴² Pe, kwe kuti lyamile lisiku lya kusenganya ukwa Bhayahudi, na kubhula ipumpa lyali papipi, pe bhahamukasya Uyesu mukasi yakwe.