¹ Lwe zya shila izi Uyesu ahayanga amazwi aga, ahepa na bhasundikwa bhakwe kubhala pihombe lya Kidron, kwekwamile ibusitani, kwe uwene nabhasundikwa bhakwe bhahinkila mukasi yakwe. ² Isalizi wula Uyuda, weahanzaga kumuhana, wope amayimanyile ubhulizo ubhwo,pe Uyesu ahabhalaga ubhuzilo ubhwinji ali na bhasundikwa bhakwe. ³ Wope Uyuda, lwe abha nu bhwinji bhwa bhasirikali na bhalongozi kufumila kubhapiti bha shiputo, bhahinza bhamile ni nyale, mazondolo ni mpalala. ⁴ Wope Uyesu, sheamazimanyile zyonti zila sheshikubhala kubhombeha papakwe, ahinza pabhuzelu nukubhabhuzilizya, "Unanu we mukumwanza?" ⁵ Bhope bhahamwamula, Uyesu Mnazareti." Uyesu ahamubhuzya, "Ine wuyo" Wope Uyuda weahamuleha, amali ayimiliye poka na bhala abha sirikali. ⁶ Ingalumo lwe ahabhabhuzya, "Ine ne wuyo" bhahagalushila ishingunga nukugwa pansi. ⁷ Ahapwanizya ahabhabhuzilizya sona, "Unanu we mukumubhuzya? Bhope bhahamwamula habhili "Uyesu munazaret." ⁸ Uyesu ahabhamula, "Imbabhuzizye hali kuti ine ne wuyo; ingalumo inzavwe mukunanza nene, bhaleshe abhanji bhasogolaje." ⁹ Izi zyamile bhwebhulo ingape izwi likwilaje; pala lwe ayanga; "Mubhala bhe bhamupiye, ntahamutezya inga woka ." ¹⁰ Uwene Usimoni Peteri , amali nishipanga, ahaukula ahamudiba ikutwe ilya kundilo umubhomvi wa mupiti wa shiputo. Mwizina lyakwe umubhomvi wula ali Maliko. ¹¹ Uyesu ahamubhuzya Upeteri, "Galusya ishipanga shaho pabhuzilo bhwakwe. Shoni ntahamwele ishikombe shila amamupiye Utata?" ¹² Pe bhula ubhwinji bhwa bhasirikali nu mulongozi, na bhabhomvi bha Bhayahudi, bhahamulema Uyesu nukumupinya. ¹³ Bhope bhala bhahamulongozwa isuti paka kwa Anasi, pe uwene amali mushi wa Kayafa, weamalimupiti wa shiputo umwaha uyo. ¹⁴ Pe Kayafa uyo amabhapiye nukubhabhuzilizya Abhayahudi izya kuti zihondeye umuntu woka afwe panongwa ya bhantu. ¹⁵ Simoni Peteri ahamulandata Uyesu, na bhwebhulo nu musundikwa uwunji. Nawula umusundikwa amali amamanyisile ku mupiti wa shiputo, wope ahinjila poka nu Yesu mukasi mulubhungano mubhashiput umupiti; ¹⁶ loli Upeteri amali ayimiliye panzi ya mulyango. Pe wula umusundikwa weamamanyisile mupiti wa shiputo, ahafumila kunzi ahabhala kuyanga na wula umwantanda umubhomvi amali akugulila umulyango nukumwinjizya Upeteri mukasi. ¹⁷ Pe wula umwantanda amali ahagulilaga umulyango, ahamubhuzya Peteri, "Pe iwe we woka wa bhasundikwa wa muntu uno?" Wope ahayanga, "Ine te wuyo." ¹⁸ Na bhala abhabhomvi na bhapiti bhamile bhimiliye pabhuzilo pala; bhapemvile umwoto uwakuti kwamile ubhuhatazu, pe bhwebhulo bhamile bhahotaga umwoto pe bhaje ubhutushizu. Wope Upeteri amali nabhope ahotaga umwoto lwe ayimiliye . ¹⁹ Umupiti wa shiputo ahammubhuziizya Uyesu izya bhasunikwa bhakwe nivisambilizyo vyakwe. ²⁰ Uyesu ahamwamula, "Inkubhuzilizye Pabhuzelu insi; Ine nkasambilizyaga lumbililubhili musinagogi na muvibhanza pabhuzilo pe Abhayahudi bhabhungine. Nine ntahayanga mubhwilu. ²¹ Shoni she muhambuzilizya? Bhabhuzilizye bhebhahanivwaga yazila zyenkayangaga. Abha abhantu bhamanyile zyonti zye nkayangaga. ²² Uyesu lwe amala kuyanga izyo, woka mubhapiti weamimiliye ahamuhoma Uyesu kunyobhe yakwe peahayanga, " Pe, bhwebhulo zihondeye ukumwamula uwashiputo umupiti?" ²³ Wope Uyesu ahamwamula, "Inzavwe nayanga lyonti lila ibhibhi pe ubhe musimishizyi panongwa ya bhubhibhi, penga namwamula ahinza shoni she ukunkoma? ²⁴ Pe Anasi lwe amutwala Uyesu kwa Kayafa uwashiputo ishipiti amali apinyilwe. ²⁵ Uwene Simoni Peteri amali ayimiliye akuyipa ubhutushizu wuyo. Pe bhala bhahamubhuzya," Pe. niwe bhulo te woka mubhasundikwa bhakwe?" Ahahana ahayanga "Ine te newuyo." ²⁶ Woka mubhabhomvi bha bhashiputo abhapiti, weamali mujenzi wa wuka umwanavuli we Upeteri amamudumuye ikutwe, ahayanga, "Pe te wewe nkankwenya nawope kula busitanini?" ²⁷ Upeteri ahahana sona, patahahabha uhanda ahabhilishila. ²⁸ Pe bhahamunyetula Uyesu kufuma kwa Kayafa paka ku Praitorio.Lwali nzashi sululu. Bhabho bheka bhatahinjila yila Praitorio ingape bhatahabhombe imbibhi nukuyilya ipasa. ²⁹ Pe nga lumo Pilato ahabhajendela ahati. "Pe nkulongwa koni lwe lukumwitishizya umuntu uno?" ³⁰ Bhala bhahamwamula nukumubhuzya, "Inzavwe uno umuntu atamile mubhomba mbibhi, nke tutamulesite kukwaho." ³¹ Upilato ahabhabhuzya, "Mweje mwemwe mweka, mumulonje nkuyananwa ni nkomelezyo zyinyu." Bhope Abhayahudi bhahamubhuzya, "Inkomelezyo yitakutwitishizya iswe kumugoga umuntu wowonti." ³² Bhahayanga izi ingape izwi lya Yesu likwilane, izwi lye lyamile lyayanjilwe hali izya mfwa yakwe. ³³ Pe Upilato ahinjila ulwa bhubhili Praitorio ahamuholela Uyesu; ahamubhuzya, "Pe, iwe we mwene wa Bhayahudi?" ³⁴ Uyesu ahamula, "Pe, iwe ukumbuzilizya panongwa ukwanza kuzimanya pamo panongwa abhanji bhakutumile ingape umbuzilizye ine?" ³⁵ Wope Upilato ahamwamula, "Ine te ne Muyahudi, pamo te mumo?" Insi yaho nu washiputo umupiti bhebhakulesite kukwane; iwe ubhomvile ishoni? ³⁶ Uyesu ahamula; "Ubhumwene bhwane te bhwamunsi ino, inzavwe ubhumwene bhwamile nubhuzilo munsi ino abhasundikwa bhane ngebhandwiliye ingape ntahabhale kubhayahudi. Kubhugolosu ubhumwene bhwane bhutakufuma apa pansi" ³⁷ Pe Upilato ahamubhuzya, Pe, lwe we mwene?" Uyesu ahamula, "iwe vwe ukuyanga kuti ine ne mwene, Panongwa ino ine inkapapwa na panongwa ino ine ninzile pansi pembe ne lusimishhizyo wa bhula ubhwanalyoli. Wowonti ali wiyo ubhwanalyoli akuyivwa amazwi gane. ³⁸ Pilato ahamubhuzya, "Umwanalyoli sheshoni?" Wope lwe amala kuyanga izi ahabhala Kubhayahudi nu kubhabhuzya" Ntenya na shimoshimo mumuntu uno. ³⁹ Imwe muli na miho gemukubhombaga imuleshele umupinywa woka ahabhalilo ha Pasa. Pe mukwanza imuleshele umwene wa Bhayahudi." ⁴⁰ Pe bhahonjezya ahalanga bhayanga, te wewuno, muleshele Baraba." Wope Baraba amali mugozi.