¹ Lwezyashila izi Uyesu ahayilolesya ulwa bhubhili kubhasundikwa bhakwe Mwijenje lya Tiberia; inza bhwebhulo vwe ahayilolesya wuyo weka: ² Simoni Peteri amalipoka nu Thomaso wewu Didimas, Nathanaeli wa kana ya Galilayi, bhana bha Zebedayo na bhasundikwa abhanji bhabhili abha Yesu. ³ Simoni Peteri ahabhabhuzya, "Ine nabhala kuvubha inswi." Wope bhahamubhuzya niswe bhulo tukubhala niwe." Bhahabhala bhahinjila mwivoti, loli ubhusiku ubhwo bhonti bhatahashaga nashimo. ⁴ Pe inzashi Lwekwamile kwasha, Uyesu ahimilila pashibuma, wope abhasundikwa bhatahamanya ukuti amali Uyesu. ⁵ Pe Uyesu ahabhabhuzya, "Bhalumendo, mulinashope shonti isha kulya?" Wope bhahamwamula, "Nashimo." ⁶ Ahabhabhuzya, "Yisya utusikulo ulubhazu lwa kundilo kwivoti, nimwe kuti muzyaje nyinsi." Ingalumo bhahisya insikulo wope bhahapotwa kulikwesa ulwa bhubhili panongwa ya bhwinji bhwa nswi inyinji. ⁷ Pe wula umusundikwa we Uyesu amamuganile ahamubhuzya Peteri, "We Mwene." Wope Usimoni Peteri lwe ayivwa ukuti Mwene, ahayipinya inzwalo lyakwe(shekuti atamile atalizwaye ahinza), pe ahayisumbila muminzi. ⁸ Bhala abhasundikwa abhanji bhahinza kwi voti (pebhatamile kubhutali ni syila,ubhutali mita 100 kufuma pashibuma), wope bhamile kukwesa zila insikulo zye zyizuye inswi. ⁹ Lwebhafiha pashibuma, bhahenya umwoto uwa mazimwa pamwanya yakwe pamile inswi poka nu mukati. ¹⁰ Uyesu ahabhabhuzya, "Leta zimo munswi zye mwasikula isalizi bhulo." ¹¹ Pe Usimoni Peteri ahazubha nukusebha lula ulusikulo lwe lwizuye inswi impiti, ishipimo sha nswi 153; loli zyamile nyinji, lula ulusikulo lutazepunkana. ¹² Uyesu ahabhabhuzya, "Nzaga mushaje ishakulwa ishanzanchi" Atalipo ingawumo mubhasundikwa weahondeye kumubhuzilizya, "Iwe we nanu?" Bhamanjile ukuti amali Umwene. ¹³ Uyesu ahinza, ahega wula umukati, pe ahabhapa, ahabhomba bhwebhulo na kuzila inswi. ¹⁴ Ino yamile yabhutatu kwa Yesu kuyilolesya kubhasundikwa bhakwe kufuma azyushe kufuma kubhafwe. ¹⁵ Lwe bhigula ishakulya isha nzanchi, Uyesu ahamubhuzya Usimoni Peteri, "Simoni mwana wa Yohani pe, unganile ine kushila abha?" Peteri ahamula, "Nalyoli, Mwene; "Iwe umanyile ukuti ine nkuganile." Uyesu ahamubhuzya, "Lisyaga abhana bhangole zyane." ¹⁶ Ahamubhuzya ulwa bhubhili, "Simoni mwana wa Yona, pe, unganile?" Peteri ahamubhuzya, "Nalyoli, Mwene; iwe umanyile ukuti kuganile. "Uyesu ahamubhuzya, "Lisyaga ingole zyane." ¹⁷ Ahamubhuzya sona ulwabhutatu, "Simoni, mwana wa Yohani, pe unganile?" Wope Peteri ahaswimililwa pekuti vweamubhuzizye ulwa bhutatu, "Pe iwe unganile?" Wope ahamubhuzya, "Mwene, umanyile zyonti; umanyile ukuti inkuganile." Uyesu ahati, Lisya ingole zyane. ¹⁸ Subhila,subhila, nakubhuzya, pe wamile we mulumendo wabheleleye ukuzwala amenda weka nukubhala kokonti kweukwanza; loli pengawabha wesongo, uligolosya inyobhe zyaho, nu wunji alikuzwalizya amenda nu kukutwala kweutakwanza kubhala." ¹⁹ Uyesu ahayanga izi ingape kulolesya ukuti bhufwe bhwoni bhwe Upeteri angamutima Umulungu. Lwe amala ayanzile izi, ahamubhuzya Upeteri, "Ndandate." ²⁰ Upeteri ahagalunkana nu kumwenya wula umusundikwa we Uyesu amamuganile ahabhalandata- Uno wewula weamile amwigamiye pashifubha sha Yesu pashakulya isha hamazubha nu kumubhuzilizya, "Mwene, unanu wealikuhana?" ²¹ Peteri ahamwenya pe ahamubhuzilizya Uyesu, "Mwene, Uno umuntu alibhomba ishoni?" ²² Uyesu ahamwamula, "Inzavwe nkwanza asyale paka peninzaninza, ili likuyanga izyoni?" Ndandate." ²³ Penga lumo amazwi iga gahatangala mukasi mwabhala abhamanyani, ukuti umusundikwa uyo atalifwa. Loli Uyesu atahamubhuzya Peteri ukuti, musundikwa uno te afwe, "Inzavwe nkwanza uwene asyale paka pendiliyinza kwekuti bhuli?" ²⁴ Uno we umusundikwa weakufumwa ulusimishizyo lwazyonti izi, nuwene we asimvile zyonti izi, pe tumanyile ukuti ulusimishizyo lyakwe lwanalyoli. ²⁵ Kuli ivintu ivwinji vwe Uyesu ahavibhomba. Penga vwonti vwasimvilwe , nkusibha ukuti nsi bhulo yitanga kwilana ukubhasunga abhakarata bhe ngebhasimvilwe.