¹ Pe lwe twamile twalehana nawope, pe tuhajendaga mwijenje, tuhafiha nzilanzila munsi ya Kosi, ni ndabhi yakwe tuhafiha munkaya ya Rodo, mukufuma uko tuhafiha munkaya ya Patara. ² Lwetwayaga imeli yeyikulambila kubhala Foinike, tuhazubha tuhajenda. ³ Lwetwafiha pilongolela yijenje lya Kipro, tuhaleshela ulubhazu ulwa kumongo, tuhajenda paka Siria, tuhalambila munkaya ya Tiro, panongwa uko kwekwamile imeli yamile yefezwe amazigo gakwe. ⁴ Lwe bhaloleha abhasundikwa, tuhatendama uko insiku zisano nazibhili. Abhasundikwa abha bhahamubhuzya u Pauli ukujendela mwa Mupepo ukuti uwene atahahanye Yerusalemu. ⁵ Nape twalinginye insiku zila iswe tuhepa tuhabhala kukwitu. Bhonti poka, nabhantanda bhabho na bhana bhabho, bhahatusindishila kwidala lwitu paka petuhepa kunzi ya nkaya. Pe tuhasugamila ivisungamo pansi, tuhalabha , tuhalagana wonti woka. ⁶ Tuhazubha imeli, uko nabho bhahabhwela kunyumba kukwabho sona. ⁷ Lwetwamala ulujendo lwitu Kufuma Tiro, tuhafiha Tolemai. Pala tuhalamuha abhajenzi, nakutendama nabho kwa kusinku lyoka. ⁸ Kundabhi yakwe tuhepa tuhasogola ku Karisaria. Iswe tuhnjila munyumba mwa Filipo, mulumbilizi wa izwi, weamamile woka wa bhala bhasano na bhabhili, niswe tuhatendama poka nawope. ⁹ Umuntu uno amamile nabhalindu bhane bhebhatimalilwe bhe bhahakubhwa. ¹⁰ Lwe twatendama uko kunsiku zimo, ahiha kufuma Uyahudi umukubhwi woka izina Agabo. ¹¹ Uwene ahinza kukwitu pe ahega ulamba wa Pauli. ku bhwo ahayizinga muvinama namuyobhe zyakwe wuyo weka mukuyanga, "Umupepo Umufinjile ahati bhwebhulo," "Abhayahudi abha Yerusalemu bhalimupinya umuntu weakutendama nulamba uno, bhope bhalimupa munyobhe mwa bhantu abhamunkaya." ¹² Lwetwivwa zyonti izyo, iswe na bhantu bhebhamile bhahatendamaga pabhuzilo bhula tuhamubhuzya uPauli atahazubhe kubhala Yerusalemu. ¹³ Pe u Pauli ahamula, "Mukubhomba ishoni, mukulila nu kuvunza umwoyo wane? Shekuti nitisile, tekweku pinywa, Loli bhope kufwila uko Yerusalemu panongwa yizina lya Mwene Yesu." ¹⁴ Ilelo u Pauli atahanzaga kumupanzya, tuhaleha nu kuyanga, "Pe ukwanza kwa Mwene kubhombeshe." ¹⁵ Lwe insiku izi, tuhega amafuku gitu nu kubhala Yerusalemu. Bhamo mu bhasundikwa kufuma Kaisaria wope bhahalandatana niswe. ¹⁶ Bhahinza nu muntu woka we izina Mnasoni, umuntu wa Kipro, umusundikwa wa hali, we tuhatendama nawo. ¹⁷ Lwetwafiha Yerusalemu, mujenzi bhahatuposhela nu kuseshela. ¹⁸ Indabhi yakwe u Pauli ahabhala poka niswe kwa Yakobo, pe abhasongo bhonti bhalipo. ¹⁹ Lwe twabhalamuha, ahabhapa izwi lyoka naganji gavintu ivwa Mulungu vweabhomvile mukasi munkaya kwidala ya mbombo yakwe. ²⁰ Ahabhalilizyo lwebhivwa izyo, bhahamushindiha Umulungu, pe bhahati, "Ukwenya, bhamanyani, kuli, 1000 galinga abhasubhalilwa mukasi Mubhayahudi. Abhene bhonti bhahanzaga kulema inkomelezyo. ²¹ Bhabhuzilwe izyiwe, ukuti ukusambilizya Abhayahudi bhebhakutendama mukasi ya nkaya kulehana nu Mose, nu kuti ukubhabhuzya bhebhatakwivwila abhana bhabho, pe bhatahalandate amiho ga hali. ²² Tuhondeye tubhombe shii? Loli utahapasye bhaliyivwa ukuti iwe winzile. ²³ Ishipe bhomba shila iswe shetukukubhuzya isalizi: Tulinabhope abhantu bhane bhe bhabhishilwe lufingwi. ²⁴ Mubheje abhantu abha pe uyizelufwe wenewe poka nabhope, pe ubhafumizye vwonti wenewe, ingape bhahondeye ukwefwa amatwe gabho. Bhwebhulo wonti wula ahondeye kumanya ukuti zyonti zye bhabhuzilwe izyiwe nizya malenga. Bhalisambilizwa ukuti niwe bhulo ukulandata inkomelezyo. ²⁵ Loli kumazwi aga munkaya gebhamile abhasundikwa, twansimvile nu kufumwa inkomelezyo ukuti bhahondeye kuyefwa ni vintu vwevifumile mumputile ya shiholanyo, ni bhanda, kufumila na shila sheshanyongilwe, pe bhayefwe nu lubhembu." ²⁶ Ilelo, Pauli ahabhafumwa abhanamuli, ni siku ilya bhubhili, ahayizelufwa wuyo paka nawope, ahinjila mushibhanza, ahayanga ahabhalilozyo ahansiku zyakuyizelufwa, paka ni shabhwila shihafumwa panongwa ya wonti wula. ²⁷ Isiku izyo zisano na zibhili lwezyasejelela kusila, bhamo Mubhayahudi kufuma Asia bhahamwenya u Pauli Mushibhanza, nu bhwinji bhahalala, nu kubhanyosezya inyobhe. ²⁸ Bhamile bhahazumaga ishongo, "Abhantu abha Izirayeli, twavwe. Uno wewula muntu weakusambilizya abhantu pabhuzilo bhwonti ivintu vwe shingunga na bhantu, inkomelezyo, nubhuzilo ubhu. Wope ayinzile Abhayunani Mushibhanza na kubhanyazu pabhuzilo ubhu ubhufinjile." ²⁹ Kwekuti pabhwandilo bhamile bhamubhonyi Trofimo Muefeso amali poka nawope munkaya, bhope bhahasibhaga bhakuti u Pauli ayinzile mushibhanza. ³⁰ Inkaya yonti yihayubhana yonti yihayubhana ,na bhantu bhahashimbila kumulema Upauli. Bhahafumwa panzi iya Shibhanza, na pinyiji nalubhililo zihagalilwa. ³¹ Pe lwebhalinjizya kumugoga, intumi zya fiha kwa songo wa bhasikali wa kugulilila Yerusalemu yonti yizuye ulwisi. ³² Panapo ahabhayanyatula abhasikali na bhasongo bhabho ahabhashimbilila ipuga. Habhalilo ahabhantu bhamwenya usongo wa bhasikali na bhasikali bhahaleha kumuhoma u Pauli. ³³ Pusongo wabhasikali ahamupalamila nakumulema u Pauli pahalajizya kuti imbakunje na manyololo gabhili ahamubhuzya iwe we nanu nukubhomba ishoni. ³⁴ Abhantu bhamo pampuga bhahayanganga ishuntu ishipiti abhamwabho ishamwabho. Kwekuti usongo wa bhasikali atabhabhuzizye nashimo panongwa yaa shila ishongo, ahalajizya u Pauli bhamulete mukasi mwilinga. ³⁵ Lwe afiha pipanda, ahanyatulwa nabhasikalib pakuti ishongo sha bhantu. ³⁶ Pakuti impuga yihalema kulandata nabhahajendelela kuzuma ahalanga, "Mwefwe uno!" ³⁷ UPauli lwebhamulete mukasi yihaleme mwilango, ahamubhuzya umupiti wa bhasikali, "Ningamubhuzya shimo?" Wula usogo wa bhasikali ahati, "Pe ukuyanga ishi Ishiyunani? ³⁸ Pe, iwe te wula Mumisiri we kufuma ulwabhwandilo ahalongozwa ubhulugu na ahalinyatula abhantu 4,000 kulugwa?" ³⁹ Upauli ahati, "Ine ne Muyahudi, kufuma kunkaya iya Tarso iya Kilikia. Ine ne wamunsi munkaya yeyimanyisile. Nkubhalabha mundeshele injanje na bhantu." ⁴⁰ Pe umupiti wa bhasikali pahamupa ulwitishizyo, Upauli ahimilila pipanda ahabhahandanizya abhantu kunyobhe zyakwe. Pakwali mwaa inkani, ahayanga nabho ku Shieburania. Ahayanga,