¹ Pe ivulugu zihasila, u Pauli ahabhita ahasundikwa bhakwe nu kubhasubhalizya umwoyo. Pe kubhalaga na ahepa kubhala Makedonia. ² Wope lweashila munkaya iyo na amali akubhasubhalizya umwoyo bhasubhila, ahinjila Kuyunani. ³ Pe uwene kuti pala ku habhalilo ha mezi gatatu, poka zihagombwa pamwanya yakwe a Bhayahudi amamile apalamila kubhulendo kwidala lyi jenje kujendela Shamu, pe ipo yihanziwa kugaluha kujendela Makedonia. ⁴ Bhebhamile nawope paka Asia bhamile Sopatro, umwana wa Pirho kufuma Berea; Aristariko nu Sekundo, bhonti kufuma abhasundikwa abha Tiselonike; Gayo uwa Derbe; Timoti; Tikiko nu Trofimo kufuma Asia. ⁵ Loli abhantu abha bhapezile bhalongoleye pe bhamile bhakutugulila kula Troa. ⁶ Kwidala lyi jenje kufuma Filipi lwezyashila insiku zya mikati yeyitasangine nu bhuluzu, munsiku zisano tubhafishile uko Troa. Twatendime uko kunsiku zisano na zibhili. ⁷ Namunsiku izya bhwandilo izya bhusano, twamile twabhungine poka ingape kumensula mukati, Pauli ahayanga na bhasundikwa. Amamile amapanzile kwepa indabhiyakwe, bhwebhulo ahajendelela ukuyanga paka pakasi pabhusiku. ⁸ Kwamile ni nyale inyinji mwi gulu ilya pamwanya lye twamile twabhungine poka. ⁹ Mwi bhwindo lye ameli atendime umulumendo woka izina lyakwe Utiko, we amwamililwe nu tulo utumwamu. Nu Pauli peamamile ahalumbililaga kuhabhalilizyo ahatali, umulumendo uno amali amakasite, aguye pansi kufuma gwigulu iyabhutatu nu ahasebhwa amamile afuye. ¹⁰ Uwene Upauli ahiha pansi, ahayinyosya wuyo weka papakwe, ahamwofwa. Pe ahati, "Mutagwanje amaha, kwekuti mulanzi." ¹¹ Pe ahazubha sona kwigulu nukumensula umukati, ahalya. Lweayanga nawo kuhabhalilizyo ahatali paka inzanchi, ahepa. ¹² Bhahinza nawula umulumendo amali mulanzi bhahayivwa ahinza. ¹³ Iswe sweka tuhalongolela pilongolela lya Pauli ku meli pe tuhabhala Aso, pe iswe twapanzile kumwega u Pauli uko. Ishi she uwene wuyo ahanzaga kubhomba, panongwa ahanzaga ukubhala kujendela insi ingomo. ¹⁴ Lwe afishila uko Aso, tuhamwinjizya Mumeli tuhabhala Mitilene. ¹⁵ Lwe iswe tuhalambila kufuma uko ninsiku ilya bhubhili tuhafiha ulubhazu ulwa bhubhili kwisyila lya Kio. Isiku lye lihalandata, tuhabhala kulambila Shisamo, ni ndabhi yakwe tuhafiha munsi ya Mileto. ¹⁶ Panongwa Pauli amamile ahanzaga inzanchi kujendela Efeso, ingape ukuti atahasumbe ahabhalilizyo hohonti mu Asia; she kuti amamile amahalambine nukulambhila Yerusalemu panongwa ya chaka sha Pentekosite, inzavwe zyahondeye uwene kubhomba bhwebhulo. ¹⁷ Kufuma Mileto ahabhasontelezya abhantu paka Efeso pe ahabha holela abhasongo bha Shibhanza. ¹⁸ Lwe bhafiha kukwakwe, ahabhabhuzya, imwe mweka mumanyile kufuma isiku lya bhwandilo lwe nkajendaga ipa Asia, inzavwe namile kukwinyu ahabhalilizyo honti. ¹⁹ Imubhombeye Umwene nukuyisya nkonti na kumansonzi, na mayimba gegahanaga nindingo zya Bhayahudi. ²⁰ Mumanyile bhulibhuli inzavwe ntahayidindila nkuyanga kukwinyu ishintu shoshonti she shamile shinza, nukuti bhuli ine nkasambilizyaga pabhuzeluzelu nawope kubhala kunyumba na kunyumba. ²¹ Mumanyile bhulibhuli ine vwenajendeleye kubhabhuzya Abhayahudi na Bhayunani pizya lupinduho kwa Mulungu nu lwitiho mwa Mwene witu Yesu. ²² Ni salizi, yenyelezya, ine, namile nkwimwivwila Umupepo Umufinjile kwenyezya Yerusalemu, ntanzimanye zyonti zye zikuninzila ine uko, ²³ loli pe kuti Umupepo Umufinjile akunsimishizya ine mu munsi zyonti zila pe akuyanga ukuti amanyololo na mayimba vwevwe vikungulilila. ²⁴ Loli ine ntakusibhilila ukuti uhbhulanzi bhwane kwidala lyolyonti ilya pamwanya kukwane, ingape ihondeye kumalilizya ulujendo lwane ni mbombo yena posheleye kufuma kwa Mwene Yesu,kusimishizya amazwi ge minza aga Mulungu. ²⁵ Pe isalizi, yenya kuti bhonti, mukasi mubhala bhenkabhala kulumbilila Ubhumwene, mutalinenya paminso sona. ²⁶ Pengalumo nkubhasimishizya ilelo ili, ukuti inte nubhunanzi kwibhanda lya muntu wowonti. ²⁷ She kuti ntahayidindila kubhayanjila ukwanza nkonti ukwa Mulungu. ²⁸ Penga lumo mubhanje mwebhashevu papinyu mwenemwe mweka, na pa mwanya ya bhwinji bhwobhwonti bhwa Mupepo Umufinjile abhishilwe kukwinyu ukuti mwimilizi. Mubhanje mwebhashevu kulidima ubhwinji bhwa Mwene, we ahakala kwi bhanda lyakwe wuyo. ²⁹ Imanyile ukuti lwe nepa kukwinyu, abhahabhila abhahali bhaliyinjila kukwinyu, bhatahalyenyezye ubhwila ubhwinji. ³⁰ Imanyile ukuti namukasi mumwinyu mwenemwe bhamo mubhantu bhaliyinza nukuyanga ivintu ivigombano, ingape kubhasompola abhasundikwa bhabhalandate abhene. ³¹ Pe ngalumo mubhanje aminso. Mukumbuhaje ukuti ku maha gatatu ntahondeye kuleha kusambilizya wonti wula mumwinyu kumasonzi ubhusiku nu musanya. ³² Pe isalizi nine nkubhabhiha kwa Mulungu, na kwizwi lya bhwila bhwakwe, lye lihondeye kubhazenga nukubhapa ulupwano poka nabhope bhonti bhebhabhishilwe ubhumwamu kwa Mulungu. ³³ Ntahanzaga ifeza,zahabu, pamo inzwalo. ³⁴ Mumanyile inwe mwenemwe ukuti inyobhe izi yimpiye zyenkanzga nene nu kwanza kwabhala bhebhamile poka nine. ³⁵ Mu vintu vwonti nabhapiye iviholanyo vwa vwe yihondeye kubhavwa bhebhatakuyibhwezya kubhomba imbombo, Pe bhulibhuli muhondeye kubhakumbuha amazwi ga Mwene Yesu, amazwi ge uwene wuyo ahayanga: "Pe hinza kufumwa kushila kuposhela." ³⁶ Lwezya yangwa zinizi, ahasugamila ivisugamo ahalabha poka nabho. ³⁷ Bhonti bhahalila inkani nu kumugwila u Pauli musingo nu kumumwanta. ³⁸ Bhahaswimililwa inkani muzyonti panongwa ya shila she amamile ayanzile, ukuti nalumo bhataliwenya isheni shakwe sona. Pe bhahamusindishila mumerikebu.