¹ Muupalahajhe upalo na kutamane chana kalama hya mwojhone, jhahide chana m'pate kubhoha unabihe. ² Mahana jhwene anenajhe kwa lugha alongejhe na bhando bale alonge na Chapanga. Mahana abhijhe jwaheleghwa kwa unhalo anena mambo ghighahihike katika mwojho. ³ Lakine jhwene abhohajhe unabihe, alonge na bhando na kwachenga, kwalekela mwojho, na kwapwalije. ⁴ Jhwene anenajhe kwa lugha akichenga jhwene, lakine jhwene abhohanajhe unabihe alichenga kanicha. ⁵ Ngohe nitamane kwamba mangota mabhote nnene kwa lugha. Lakine jhahide jha ghena, nitamane jha kwamba m'bhohe unabihe. Jhwene abhahajhe unabihe ni nkolonga kuliko jhwene anenajhe kwa lugha (labuda abhajhe jwakutapachile), ile kwamba kanicha lipate kuchengwa. ⁶ Lakine ngohe, unhacha na n'domba bhango anahikite kwino na kunena kwa lugha, chanim'pwahidiha niki mangota? Nihwechajhe, chi kubhegha nilonge namangota kwa ndela jha upunuho, au kwa ndela jha mahalipa, au unabihe, au kwa ndela jha kupundicha. ⁷ Andaibhile ilebhe hyangale na uhajhe nkeme pilimbe au kinube pangabhoha chahute hibhile na tapwahute, chakitambulikana ni chombo ghane kihinwa? ⁸ Kwa mahana andaibhile balagumo chaibhohajhe chahute jhangamanyikana, ni jincheghane mundo chatambuhajhe jha kubhegha ni muda ghwa kujhihandaha kwa bhita? ⁹ Vivyo hipyo na mangota. Andam'bhahite kwa lulime lilobhe lyangale jhahile, ni jinche ghane mundo chahelewajhe cha milongele? Cham'byajhe milongele, na kibhijhe jwapalakunheleghwa. ¹⁰ Ibhijjhe chaka kwamba ibhile lugha hyamahena mbalembale dunehane, nakibhijhe hata chimo changale na mahana. ¹¹ Lakine andabhile nimanyajhe mahana gha lugha, chamajhe nang'ene kwake jhwene anenajhe, najhe anenajhe chaabhajhe ng'ene kwango. ¹² Vivyo hipyo na mangota. Kwa kubhegha mitamane chana kubhona uchihilicho ghwa mwojho, mpalajhe kwamba n'jhide chana kuchenga kanicha. ¹³ Hipyo, jhwene anenajhe kwa lugha na ajhope bham'pekehe kutapuchili. ¹⁴ Kwa mahana andanyopite kwa lugha, mwojho ghwango ujhopa, lakine malango ghango ghakwetejhe matunda. ¹⁵ Ndenda nike? Andanyopite kwa mwojho ghwango, lakine piha cha nyopa kwa malongo ghango. Chanyemba kwa mwojho ghwango, na chanyemba kwa malango ghango piha. ¹⁶ Henginehyo, andamunchipwite Chapanga kwa mwojho, jhwene jwabhile n'gene chajheketabhole "Amina" pamibhoha chukulane, ikibha aghamanyejhe ghimilongela? ¹⁷ Mahana ni kwele mwenga jhwakuchukulo bhema, lakine jhola jhonge achengwajhe. ¹⁸ Ninchukulo Chapanga kwa kubhegha ninena kwa lugha jhahide jha mangota mabhote. ¹⁹ Lakine katika kanicha ni hele nene malobhe unhano kwa upwahamo ghwango ile mbate kwapundicha bhange, jhahide jha kunena malobhe kome helupu kwa lugha. ²⁰ Unhacha na n'domba ghwango, mangabhegha mahyana katika kuholela kwino. Badala jhake, kuhuchihana na uhopu, m'byajhe nkema hyana ilemba. Lakine katika kuholela kwino makabhajhe bhanda bhajhima. ²¹ Ijhandikwe katika cheliha, "kwa bhando bha lugha jhenge na kwa milomo jha akaghene chonongelajhe na bhando bhamba wala hata hipyo chabhanyohajhe," alongela Bhambo. ²² Hipyo ndime ni ichala, chiho kwa bhibhahamine, bale kwa bhangahamine. Lakine kubhoha unabihe ni ichala, bale kwa hajile jhabhe bhibhahamine. ²³ Hajha, ikibha kanicha lyote likuchanike pamo na bhote bhanene kwa lugha na akaghene na bhangahamine bhajhingile, bho bhahwecha kulongela kwamba mina hwachimo? ²⁴ Lakine ikibha mabhote mibhoha unabihe na jhwangahamine au ng'ane akajhingila, cha chaghwichighwa na ghote ghaghajhoha. Chahukumighwa na ghote ghighilengelwa. ²⁵ Chili jha mwojho ghwake ngaihyekulighwe matokeho ghake, ngaghwile kupudepude na kuhabudo Chapanga. Ngakilitejha kwamba Chapanga jhu pakate jhino. ²⁶ Niki chakikengama bachi, unhacha na n'domba ghwango? Pamikongana pamo kila jhumo ana jhabule, mapundicho, mapunuho, lugha au tapuchile. Ntendajhe kila kilebhe ile kwamba milichenge kanicha. ²⁷ Nkema jhwajhote anena kwa lugha bhabhajhe bhabhele au bhata6to, na kila jhumo katika jhamo. Na mundo lajhima atapachile chakilongilwe. ²⁸ Lakine nkema abhijhe mundo ghwa kutapuchile, bachi kila jhumo ghwabhe atamanuho nkate jha kanicha. Bachi kila jhumo alongelajhe kanjika chake na kwa Chapanga. ²⁹ Na manabihe bhabhele au bhatato bhanene, na bhange bhajhokanakihe kwa kupambanuha chakilongilwe. ³⁰ Lakine jhwaqketite andahyekulighwe lijhambo katika huduma, jhola ambajhe akibha anena na akotokajhe. ³¹ Kwa kubhegha kila jhumo ghwino ahwecha kubhoha unabihe jhumo bahada jha jhonge ile kwamba kila jhumo ajipunje na bhote bhahweche kulekelwa mwojho. ³² Kwa kubhegha mwojho ghwa manabihe ibhile pahe jha uhangaliche ghwa manabihe. ³³ Kwa kubhegha Chapanga chi Chapanga jhwa machapuko, bale ghwa hamane. Nkema chaibhile katika makanicha ghote gha wahumine. ³⁴ Ibhapachite akakeghe bhatane nuho katika kanicha. Kwa kubhegha bhiluhuchighwajhe kulongela. Badala jhake, bhipachwa kubhegha katika unyenyekepo, nkema piha cheliha chilongela. ³⁵ Nkema kuna chachote bhitamane kujipunja, bachi bhakonyajhe akanalome bhabhe ukajha. Kwa kubhegha ni haibo kwa mukeghe kulongela katika kanicha. ³⁶ Bho, Lilobhe lya Chapanga lihumite kwino? Bho liunhikalile mangota tu? ³⁷ Nkema mundo akajibhona kubhegha ni nabihe au ghwa mwojho, im'pacha aghatambuhe mambo ghinajhandakila jha kwamba ni mahaghicha gha Bhambo. ³⁸ Lakine changhatambuha ghanga, mun'de kajhe akotokutambulighwa. ³⁹ Hipyo bachi, unhacha na n'domba ghwango mpalajhe chana kubhoha unabihe, na mangahibhalila mundo jhwajhote kunena kwa lugha. ⁴⁰ Lakine mambo ghote ghatendekajhe kwa umbone na wa utalatibo.