¹ Mumbalahajhe nenge, nkema na nenga chaninkengama Kilichito. ² Ngohe ninchipo kwa unhalo ghwa hela chamingomboka katika mambo ghote. Ninchipo kwa unhalo nighakamwile mapokelo nkema chinighaletite kwino. ³ Bachi nipala umanye jha kubhegha Kilichito ni muto ghwa kila munalome, najhe munalome ni muto ghwa mukeghe, na jhakubhegha Chapanga ni muto ghwa Kilichito. ⁴ Kila munalome jwajhopajhe au jhwabhoha unabihe akibha ahyekalile muto akihahibicha muto ghwake. ⁵ Lakine kila mukeghe jhwajhopajhe au kubho unabihe hale muto ghwake ubhile wache ahuhahibicha muto ghwake. Kwa mahana ni chaghwa chagwa na nkema akengulighwe. ⁶ Ikibha nkema mukeghe chahyekalilajhemulo ghwake, na aheketajhe majhunje ghake ghabhajhe majhipe.. Mahana anda ibhile ni hahibo mukeghe kuheketa majhunjo ghake au kukengulighwa bachi ahyekelelajhe muto ghwake. ⁷ Kwane im'pachajhe munalome kuhyekelela muto ghwake, kwa unhalo jhwene ni mpwano na utukupo ghwa Chapanga. Lakine mukeghe ni utukupo ghwa munalome. ⁸ Mahana munalome akahumitejhe na mukeghe. Bale mukeghe akahumite na munalome. ⁹ Wala munalome akahumbwitejhe kwa hajile jha mukeghe. Bale mukeghe akahumbwite kwa hagile jha munalome. ¹⁰ Jhenje ndile unhalo mukeghe apachwa kubhegha na ichala jha mamulaka panane jha muno ghwake, kwa unhalo ghwa mahoka. ¹¹ Hata hipyo, katika Bhambo, mukeghe abhijhe kanjika jhake pangale munalome, au munalome pangale mukeghe. ¹² Mahana nkema vile mukeghe akahumite kwa mukeghe. Na ilebhe hyote ihuma kwa Chapanga. ¹³ Uhukumwajhe mabhene: Bho! Ni chahihe mukeghe an'jhope Chapanga hale muto ghwake ubhile hwache? ¹⁴ Bo hata achile kanjika jhake ibhapundichajhe jha kwamba munalome andabhile na majhunjo matandamaho ni hone kwake? ¹⁵ Bo achile impundichajhe jha kwamba mukeghe anda abhile na majhunjo matandamaho ni utukupo kwake? Mahaba ghala majhunjo matandamaho nkema libhache lyake. ¹⁶ Lakine ibhile mundo jhwajhote apalakubichana panane jha lende tikwetejhe namuna jhenge, wala makanicha gha Chapanga. ¹⁷ Katika mahagicho ghighakengama, nenga ninchipiajhe. Mahana pimikuchanyika, chiho kwa pwahida bale kwa hachala. ¹⁸ Mahana kwanja, nijhola jha kubhegha pamikongana kukanicha, ubhile ghabhanyiko kate jhino, na kwa chehemo nihamine. ¹⁹ Kwa mahana ni lachima ibheghe michughuhano kate jhino, ile kwamba bhala bhibhajheketelighwe bhamanyikane kwino. ²⁰ Kwa mahana pamikongana, chamilyegha chihochakulya cha Bhambo. ²¹ Pamilyegha, kila jhumo alyegha chakulya chake jhwene kabula bhange bhanalyejhe, hata jhonjo ana njala, na jhonjo alobhile. ²² Bho nkwetejhe nyumba hya kulelela na kunywelelela? Bho milijhalaho kanicha lya Chapanga na kwapechelecha bhangale kilebhe? Nongela nike kwino ninchipo? Chaninchipwajhe katika lende. ²³ Mahana nakapokile kuhuma kwa Bhambo chela ambacho napekihe mangota jha kubhegha Bhambo Yesu, kilo ghola paachalitighwa, akatohile nkate. ²⁴ Bahada jha kuchukulo, akavunjite na kulongela, "ghongo ndile m'bhele ghwango, ubhile kwa hajile jhino Ntendajhe nahela kwa kungomboka nenga." ²⁵ Na vivi hivi ngatohila kikombe bahada jha kulyegha, na kulonge "kikombe chenje ni lilaghano lyaunyata katika mijahe jhango. Ntendajhe nahela mala jhenge kila paminywegha, kwa kungomboka nenga." ²⁶ Kwa kila mundo paalyegha nkate ghongo na kukinywegha kikombe, mitangacha mahute gha Bhambo m'paka pachahikajhe. ²⁷ Kwa hijho kila jhwaulyegha nkate au kukinywelela kikombe chene cha Bhambo ichipostahile, chabhajhe ajipekihe hatiha jha m'bhele na myahe jha Bhambo. ²⁸ Mundo ajihojajhe jhwene kwanja, na hivyo alyajhe nkate na kunywelela kikombe. ²⁹ Mahana jhwalyegha bila kuumbanula m'bhele, alyegha na kunywegha hukumo jhake jhwene. ³⁰ Jhenje ndile unhalo bhando bha mahena kati jhino ni akaghonjwa na jhahipo na bhahachi jhino bhahwile. ³¹ Lakine andatikichungwiche tabhete chatihukumighwajhe. ³² Ila chatihukumighwa na Bhambo, tibhujhighwa, ile tangahukumighwa pamo na duniha. ³³ Kwa hijho, unhacha na n'domba ghwango, pamikongana mpate kulyegha, n'dendalanajhe. ³⁴ Mundo andaabhile na njala alyajhe ukajha kwake, ile kwamba pamikonga na pamo ichighwe kwa hukumo. Na kuhucho mambo ghange ghan'jhandike, chaninhelekechajhe pambalakuhika.