¹ کاتێک فریشتەی پێنجەم کەڕەناکەی لێدا، بینیم ئەستێرەیەک لە ئاسمانەوە کەوتە سەر زەوی، و کلیلی جیهانی مردوانی پێدرابوو. ² کاتێک کردییەوە دووکەڵێک لە شێوەی دووکەڵی کوورەیەکی مەزن لێی بەرزبۆوە، و خۆر و کەشەکەی تاریک کرد. ³ لە دووکەڵەکەوە کوللە هاتە دەرەوە بۆ سەر زەوی، دەسەڵاتی وەک دوپشکیان پێدرابوو، ⁴ فەرمانیان پێدرا کە زیان بە گژ و گیای زەوی و کێڵگە و هیچ درەختێک نەگەیەنن تەنها زیان بەوانە بگەیەنن کە مۆری خودا لەسەر نێوچەوانیان نییە، ⁵ بۆ ماوەی پێنج مانگ ئەشکەنجەیان دەدات بەبێ ئەوەی بیانکوژێت، ئەو ئازارەی کە دەیاندات هاوشێوەی ئازاری پێوەدانی دوپشکە. ⁶ لەو مانگانەدا مرۆڤەکان هەوڵی ڕزگاربوون لە ژیانیان دەدەن بەڵام ناتوانن! ئەوان ئارەزووی مردن دەکەن، بەڵام مردن لێیان ڕادەکات. ⁷ ئەم کوللانە لەو ئەسپانە دەچوون کە بۆ شەڕ ئامادەکراون، ئەوەی لەسەر سەریان بوو وەک تاجی زێڕین وابوو، ڕووخساریشیان وەک ڕووخساری مرۆڤ وابوو، ⁸ قژێکی درێژیان هەبوو وەک قژی ژن، ددانەکانیان وەک ددانی شێر بوو، ⁹ سنگیان وەک قەڵغانی ئاسن بوو، دەنگی باڵەکانیان وەک ژاوەژاوی گالیسکەی ئەسپەکان بوو کە دەچنە شەڕەوە، ¹⁰ کلکیان وەک دوپشک چزوی هەبوو. دەسەڵاتی ئەوەیان هە بوو بە کلکیان زیان بە مرۆڤ بگەیەنن بۆ ماوەی پێنج مانگ. ¹¹ پاشاکەیان «فریشتەی جیهانی مردوان» بوو، بە عیبری ناوی «ئەبەدۆنە»‏، و بە یۆنانی ناوی «ئەپۆلیۆنە».‏ ¹² هاوار و نەهامەتی یەکەم تێپەڕی، و دوو هاوار و نەهامەتی تریش دێت! ¹³ پاشان فریشتەی شەشەم کەڕەناکەی لێدا، و دەنگێکم بیست کە لە چوار قۆچەکەی قوربانگا زێڕینەکەی بەردەم خوداوە هات، ¹⁴ بە فریشتەی شەشەمی دەگوت کە کەڕەناکەی پێبوو: «چوار فریشتە بەستراوەکەی لای ڕووباری گەورەی فورات ئازاد بکە». ¹⁵ ئەم چوار فریشتەیە ئامادەکرابوون بۆ ئەو کاتژمێر و ڕۆژ و مانگ و ساڵە، بۆیە ئازادکران بۆ کوشتنی یەک لەسەر سێی مرۆڤایەتی. ¹⁶ بیستم سوپاکەیان دەگەیشتە دوو سەد ملیۆن جەنگاوەر! ¹⁷ لە بینینەکەدا ئەسپەکانم بینی سواریان لەسەر بوو زرێ لەبەردا بوو هەندێکیان سووری ئاگرین، و هەندێکیان وەنەوشەیی، و هەندێکیان زەردی گۆگردی بوون. سەری ئەسپەکان وەک سەری شێر بوون، ئاگر و دوکەڵ و گۆگردیان لە دەمیانەوە دەردەکرد. ¹⁸ یەک لەسەر سێی خەڵکەکە بەهۆی ئەم سێ بەڵایە کوژران، بە ئاگر و دوکەڵ و گۆگرد کە لە دەمی ئەسپەکانەوە دەردەچوو. ¹⁹ هێزی کوشندەی ئەسپەکان لە دەم و کلکیاندا بوو، چونکە کلکەکانیان لە مار دەچوو کە سەری زیانبەخشی پێوەبوو! ²⁰ بەڵام ئەو خەڵکەی لەم بەڵایانە ڕزگاریان بوو، لە کارەکانیان پاشگەز نەبوونەوە، و بەردەوام بوون لە کڕنۆش بردن بۆ شەیتان و بۆ ئەو بتانەی کە لە زێڕ و زیو و مس و بەرد و دار دروستیان کردبوون، لەگەڵ ئەوەی نەیاندەتوانی ببینن و ببستن و بجوڵێن! ²¹ لە کوشتن و جادوو داوێنپیسی و دزی پاشگەز نەبونەوە!