¹ Zaman Howo ja fi Jerusalem, homon gerib min Bethphage wa Bethany fi jebel ta Zeton, wa Yesuah rasulu itniin min talamiz Tuo, ² Wa kelim le homon, " Ruwa takum fi kariya al gerib de. Kan intum wosulu hinak, intum bi ligo humar al lesa ma sugu. Fiku takum howo wa jebu takum le ana. ³ Iza kan ayi zol asalu itakum gali, ' leh intum shilu humar de?' Keli intum kelim, ' Rabuna yahu deiru wa tuwali bi rasulu heni.'" ⁴ Homon ruwa wa homon ligo humar de rubutu barafi taraf sika, wa homon fiku humar de. ⁵ Fi baad min nas wogifiin hinak wa kelim le homon, " Intum gi amulu shunu? Malu intum gi fiku humar de?" ⁶ Homon kelim le nas de ze ma yesuah kelim le homon, wa nas de sibu homon ashan b ruwa. ⁷ Homon jebu humar de le Yesuah wa homon kutu malabis tomon fi ras humar de, wa Howo geni fogo. ⁸ Nas ketir ferisu gumashat tomon fi sika, wa nas taniin ferisu awrak ta shejera fi sika. ⁹ Nas ruwa wa nas al gi wara Tuo gi kore gal, " Hoshana! mbarak le zol al ja bi isem ta Rabuna. ¹⁰ Mubarak le mamlaka ta Daud al gi ja! Hoshana fi al ali!" ¹¹ Biga Yesuah dakalu fi Jerusalem wa ruwa fi al Haikal zaman Howo ainu hawli hajat kulu. Kan wokit biga ashiya wa mutaakir, Howo ruwa fi Bethany ma talamiz Tuo al itnashar. ¹² Fi yom al tani zaman Howo gi tala bara min Bethany, Howo kan biga jeyan. ¹³ Howo ainu min beyed fi shejera ta teen al fugo auwrak, Howo ja gerib le shejera de ashan Howo bi ligo fugo samar al bi akulu, wa zaman Howo ja gerib, Howo ma ligo haja ila bes auwrak, ashan kan de ma zaman ta teen ashan bi weledu. ¹⁴ Howo kelim le shejera de, " Mafi ayi zol bi akulu min samar taki tani mara." Wa talamiz Tuo gi asuma. ¹⁵ Homon ja fi Jerusalem, wa zaman Yesuah dakalu fi Haikal wa bada turuju nas al kan gi beyu wa gi ishteri fi Haikal. Howo gelibu tarebiza ta gurush wa kursi ta Tajir ta beyu hamam. ¹⁶ Howo ma deiru ayi zol min Tujar deel ashan bi tala min Haikal ma hajat tomon. ¹⁷ Howo alimu homon wa kelim, " Ma katibu gal, 'Bet tai le salawat le nas kulu'? Lakin intum amulu howo mahal ta haramiya." ¹⁸ Reis ta Kuhana wa Kataba asuma kalam al Howo kelimu de, biga homon gi fetisu sika ashan bi katulu Howo. homon kan gi kafu Howo leanu nas kulu kan mustagarabiin min talim Tuo. ¹⁹ Zaman wata biga mesa homon tala min medina. ²⁰ Zaman homon gi duwuru fi sabah, homon ainu shejera teen de yabis lahadi irik tuo. ²¹ Pitar zekeru wa kelim, " Rabbi, Ainu! Shejera ta teen al inta laanu de yabis lahadi fi juzur tuo." ²² Yesuah juwabu homon, " Keli intum indu imaan fi Allah. ²³ Al hagiga ana kelimu le intum inu iza kan ayi zol kelimu le jebel, 'gum wa ruwa jada nefsak fi juwa bahar; wa iza kan howo ma indu shak fi gelba tuo lakin howo amin inu hajaal howo kelim de bi hasil, de yahu haja al Allah bi amulu. ²⁴ Ashan keda ana kelim le intum: Ayi haja al intum seli wa asalu, amin takum inu intum bi ligo, wa bi kun takum. ²⁵ Kan intum wogifu wa gi seli intum lazim keli afi ayi zol al intum amulu batal le homon, ashan Abu takum al fi sama kaman bi afi katiya takum." ²⁶ Wa iza intum ma afi kaman Abu takum al fi sama ma bi afi intum. ²⁷ Homon ja fi Jerusalem tani mara, Ze ma Yesuah gi duwuru fi Haikal, reis al kuhana, wa al kataba, wa al sheyuk ja le Howo. ²⁸ Homon kelim le Howo, " Inta gi amulu hajat de bi yatu sulta, wa munu yahu wodi le inta sulta de?" ²⁹ Yesuah kelim le homon, " Ana bi asalu intum wahid su-al. juwabu takun ana wa ana bi wori le intum bi yatu suta ana bi amulu hajat deel. ³⁰ Hal mamudiya ta Yuhanakan, min sama wala min nas? Juwabu takum ana." ³¹ Homon nakishu fi bein tomon wa homon fekeru wa kelim, " Kan nina kelim, Min sama,' Howo bi kelim gal, ' Teib leh nina ma aminu?' ³² Lakin iza kan nina kelim gal min insan,'...." Homon kan gi kafu min nas, leanu ayi zol kan mugtene inu Yuhana kan Nebi. ³³ Biga homon juwabu Yesuah gali, " nina ma arufu." Yala ".Yesuah kelim le homon " kaman ana ma bi wori le intum bi ayi sultan ana gi amulu hajat deel