¹ Biga Yesuah bada alimu homon bi amsal. Howo kelim, " Fii Rajil zara karma, howo amulu hosh hawili karma de, wa howo abinu burj yala howo selimu le muzariin deel ( karimin). wa howo safir. ² Fi zaman al kwes, howo rasulu kadam le mahal zara hinak wa bi jebu samarta karma de. ³ Lakin homon amsuku howo, wa dugu howo wa turuju howo bidun haja. ⁴ Tani mara howo rasulu kadam tani le homon, wa kaman homon awugu howo fi ras wa amulu howo batal. ⁵ Howo lesa rasulu kadam tani, wa homon biga katulu kdam de. Homon azibu nas ketir bi nefsa teriga, wahidiin dugu, wa bagiin katulu. ⁶ Howo lesa indu zol wahid tani al bi rasulu, wa kan howo indu jena al wahid al howo gi hibu. howo rasulu jena al akir al howo indu, a howo kelim, ' inu homon bi ihterim jena tai de.' ⁷ " Lakin al al karamiin kelim le baad tomon,' De yahu al warisa taal takum, keli nina katulu howo ashan warisa de bi kun le nina.' ⁸ Homon gubudu howo, wa homon katulu howo, wa jada howo ara min mahal zara de. ⁹ Biga, sedu mahal zara de bi amulu shunu? howo bi ja wa bi demeru karamiin deel wa bi wodi mahal zara de le nas taniin. ¹⁰ Hal intum am agara kalam al muktub de? ' Al hajer al Banaiin aba yahu biga hajer al zawiya. ¹¹ De kan min Rabuna, wa ajeib fi uyon ta nina .'" ¹² Baad keda nas al kubar ta yahud katitu ashan bi gubudu Yesuah leanu homon fahim inu Howo kelimu bi amsal did homon. Lakin homon an gi kafu min nas al kan ketir de. homon sibu Howo wa homon ruwa. ¹³ Biga homon rasulu le Howo baad min Phariseen wa Herodiin ashan bi jeribu Howo be kelimat. ¹⁴ Zaman homon ja, homon kelim le Howo, "Ya Mualim, nin aarufu inu inta zol al adi, wa inta ma kutu bala fi kalam ta ayi zol, wa inta ma gi ferigu nas. Inta gi alimu sika ta Allah al hak. Hal howo ganuni ashan nina bi dafa daraib le Caesarwala la? keli nina dafa wala ma dafa?" ¹⁵ Lakin Yesuah arufu shukul kebra tomon wa kelim le homon, " Leh intum gi jeribu ana? Wodi takum le ana denar ashan ana bi ainu." ¹⁶ Homon jebu wahid le Yesuah. Howo kelim le homon " sura de wa ketaba de ta munu?" Homon kelim le Howo, " Ta Caesar." ¹⁷ Yesuah kelim , " Wodi le Caesar hajat ta Caesar, wa wodi le Allah hajat ta Allah." homon kan istagarab min Yesuah. ¹⁸ Biga al Sadduceen, al gi kelimu inu mafi geyama, ja le Howo. Homon asalu Howo, gal, ¹⁹ " Ya Mu-alim, Musa katibu le nina inu, 'Iza kan zol indu Aku mutu wa howo sibu mara, lakin mara de ma indu jena, Aku tuo bi shelu mara de, wa bi weledu ma hiya iyal le Aku tuo.' ²⁰ Yala Akuwana tuo de kan fi saba; Al aweil shilu mara de yala howo mutu, wa ma weledu ma mara de. ²¹ Wa Aku nemra itniin kaman shelu hiya wa mutu, wa ma weledu ma hiya kaman, wa nemra talata de kaman ze de. ²² Kulu homon al saba de ma weledu ma mara de, Akir tuo, mara de kaman mutu. ²³ Kan homon ja gum, fi yom ta geyama, mara de bi kun ta munu? ashan hiya kan mara ta saba Akuwana deel." ²⁴ Yesuah kelim, " De yahu teriga al intum bi woduru, ashan intum ma arufu kutub, wa la guwa ta Allah? ²⁵ Kan homon gum min mutu, wa la homon bi juwzu wa la bi juwzu homon, lakin homon bi kun ze malaikat fi sama. ²⁶ Lakin fi kaam ta nas al mutu wa gum, hal intum ma agara fi kitab ta Musa, al kan nar wala fi gaba, Allah kan kelim le howo kef, wa gal, ' Ana Howo Allah ta Abraham wa Allah ta Isaaka wa Allah ta Yacob'? ²⁷ Howo ma Allah ta nas al meitiin, lakin Howo Allah ta nas al hayiin. Intum nas al woduru." ²⁸ Fi wahid min kataba ja wa asuma wonusa tomon; howo ainu Yesuah gi juwabu homon tamam. howo asalu Yesuah, " De yatu wosiya yahu muhim al fiti kulu?" ²⁹ Yesuah juwabu, " Al muhim de yahu, 'Asum, Ya Israel, Rabuna ta nina Allah, Howo wahid. ³⁰ Inta lazim keli hibu Allah taki ma kulu geliba taki, ma kulu nefsa taki, ma kulu fekira taki, wa ma kulu guwa taki.' ³¹ Wosiya al tani yahu ze de, ' Inta lazim keli hibu jeran taki ze nefsa taki,' mafi wosiya tani al akbar min wasaya deel." ³² Wahid min kataba de kelim le Howo, " De tamam, Ya Mu-alim!Hagiga inta kelimu inu Allah wahid,wa mafi Allah tani ila Howo baru. ³³ Ashan inta bi hibu Howo bi kulu gelba wa kulu fekira, wa ma kulu guwa, wa ashan inta bi hibu jeran ze nefsa taki howo afdal min kulu harau zabaih wa tegdema." ³⁴ Zaman Yesuah ainu inu howo juwabu juwab ta hikma, Howo kelim le howo, " Inta ma beyed min malukut ta Allah." baad dak mafi ayi zol tani deiru asalu Howo ayi sualat tani mara. ³⁵ Zaman Yesuah gi alimu fi haikal, Howo kelim, " Kef kataba kelim gal Al mesi Howo jena ta Daud? ³⁶ Daud bi nefsa tuo, fi Al Roho Al Kudus, Kelim gal, Rabuna kelim le Rabuna tai, " Geni fi iden yemin tai lahadi ana bi kutu adu taki tehet kuraiin taki.'" ³⁷ Daud bi nefsa tuo gi nadi Howo 'Rabuna; yala kef Al mesi bi kn jena ta Daud?" wa kan nas gi asuma Howo bi farah. ³⁸ Fii talim Tuo Yesuah kelim, " Amulu hisab takum min kataba,al homon gi hibu ashan bi duwuru ma jalalib al tuwaliin wa gi selimu homon fi mahalat ta aswak, ³⁹ Wa gi kutu homon fi karasi al gedam fi mujama wa fi mahalat al muhtaram fi ihtefalat. ⁴⁰ Wa homon kaman gi akulu fi beyut ta aramil, wa gi seli salawat al tuwil ashan nas keli ainu homon. Nas deel bi ligo hukum al shedid." ⁴¹ Biga Yesuah geni tehet jambu sanduk ta ataya fi haikal; Howo kan gi ainu nas zaman homon gi jada gurush tomon fi sanduk ta ataya. Nas ketir al ganiyaniin jada gurush ketir. ⁴² Biga fii mara armala meskin ja wa jada itniin gerish, al indu faida kebir. ⁴³ Howo nadi talamiz Tuo wa kelim le homon, " Hagiga ana gi kelim le intum, Mara al armala al meskin de jada fi sanduk ta ataya de aktar min nas kulu al jada. ⁴⁴ Nas deel kulu wodi min gurush tomon al ketir. Lakin Mara al armala de ma shukul meskin ta hiya de, ".wodi kulu min gurush al kan hiya gi ish mi fogo