¹ Hasa ya Israel asma takum le ganoon wa wasya al ana bi ruwa deriso le itakum, ashan itakum bi amulu; ashan itakum bi ish wa bi ruwa wa bi weriso beled al Yahwah; Ilah ta abuhat takum, bi wedi le itakum. ² Matakum ziddu haja fi kelimat al Ana wesi itakum, wa wele kede itakum masa haja, ashan itakum bi ageder hafiso wesia ta Yahwah Ilah takum al ana der wesi le itakum. ³ Uyon takum ayinu haja al Yahwah amulu be kalam ta Baal Gagu; lanu kulu delin al tabi wara ta Baal Fagur, Yahwah Ilah takum demiro umon min nus takum. ⁴ Lakin itakum al lesegu le Yahwah Ilah takum itakum haiin aleela, kulu wahid min itakum. ⁵ Aynu takum, Ana derisu le itakum gawanin wa hukum, ze ma Yahwah Ilah tai wesi ana, inu ana bi amulu kida fi nus ta beled al itakum bi ruwa weriso. ⁶ Ashan kida hafiso takum umon; amulu takum umon; ashan de yao hikima takum wa faham takum fi ena ta nas al bi ruwa asuma an gawanin de kulu wa bi kelim, 'Hagiga shaab de azim de, hakimin wa nas al bi fahim.' ⁷ Lanu de yatu shaab tani al indu ilah gerib ma umon, ze Yahwah Ilah ta nina al anina bi nadi Huwo fi ayi zaman? ⁸ De yato shaab azin tani, al indu gawanin wa hukum addil ze gawanin al ana kutu gidam takum aleela? ⁹ Bes kede ita kutu bala wa hariso badun takum tamam, ashan itakum ma bi nisitu hajat al ena taki ayinu, ashan umon ma bi tala min geliba taki fi kulu ayamat ta haya taki. Lakin kede deriso le iyal taki wa iyal iyal taki. ¹⁰ Fi yom al ita wegif gidam ta Yahwah Ilah takum fi Horeb, wekit Yahwah kelim le ana, 'Limu le Ana shaab, wa Ana bi kutu umon asuma kelimat tai, ashan umon bi alimu kafu Ana kulu ayamat al umon bi ish fi ard, wa kaman umon bi deriso iyal tumon.' ¹¹ Itakum ja gerib wa wegif tihit Jebel. Jebel kan gi tala nar wa dukhan le sama, sihab wa duluma shedid. ¹² Yahwah wunuso le itakum min nus nar; itakum asuma sout de be klima tuo, lakin itakum ma ayinu shikil; itakum bes asuma sout. ¹³ Huwo alino le itakum ahat tuo ashan itakum bi nefisu, wasaya al ashara. Huwo katibu umon fi itnin lohu min hajer. ¹⁴ Yahwah wesi ana fi zaman dak kede derisu itakum gawanini wa nuzum, ashan itakum bi amulu umon fi beled al itakum bi ruwa shil. ¹⁵ Ashan kida kutu takum bala kues le badon takum, lanu itakum ma ayinu shikil fi yom al Yahwah wunuso ma itakum fi Horeb min nus nar ¹⁶ inu kede itakum ma karabu badun takum be amulu sura ta ayi haja, fi shikil ta mara wele rajil, ¹⁷ wele sura ta ayi hiwan fi wata, wele sur ta ayi ter al bi tiri be jinah fi samawat, ¹⁸ wele sura ta ayi haja al bi juru badon fi turab, wele sura ta ayi samaga al fi juwa moyo tihit wata. ¹⁹ Kede ita ma arfa uyon taki fuk le sama wa ayinu shemis, wa gamara wele nujom wa kulu junud ta samawat- wa dengir ashan bi abidu umon hajat al Yahwah Ilah takum wedi le nas kulu tihit samawat. ²⁰ Lakin Yahwah shilu itakum wa tala itakum bara min furun ta hadid bara min Masir, ashan itakum bikun le Huwo shaab miras tuo, ze ma itakum aleela. ²¹ Yahwah kan zalan min ana be sabab takum; Huwo halifiu inu ana ma bi mururu fi Urdon, wa wele ana bi wusulo ard al kues, al Yahwah Ilah takum bi ruwa wedi le itakum ze werisa. ²² Lakin, ana lazim bi mutu fi wata de; Ana ma ruwa fi Urdon ta kulu kulu; lakin itakum bi ruwa wa imtelik wata al kues de. ²³ Kutu takum bala le badun takum, ashan itakum kede ma nisitu ahhad ta Yahwah Ilah takum, al amulu ma itakum, wa itakum bi amulu le nefus takum timsal fi sura ta ayi haja al Yahwah Ilah takum abusu itakum kede ma ma amulu. ²⁴ Lanu Yahwah Ilah takum Huwo nar al bi akulu, de girra ta Allah. ²⁵ Kan weledu iyal wa iyal iyal, wa itakum biga geni fi wata de zaman tuwil, wa kan itakum karabu wa amulu le itakum sanam fi shikil ta ayi haja, wa amulu sher gidam ta Yahwah Ilah takum, ashan bi kutu Huwo tala zalan, ²⁶ Ana bi nadi sama wa ard ashan bikun shuhud did itakum aleela inu gerib itakum bi mutu fi beled al itakum gi ruwa fugu gata bahar ta Urdon; umor takum ma bi kun tuwil, lakin bi demiro itakum ta kulu kulu. ²⁷ Yahwah bi shetetu itakum fi nus ta nas, wa itakum bi kun besitin fi nus ta Umam, al Yahwah bi wedi itakum fugu. ²⁸ Hinak otakun bikun kadamin ta rabunat tanin al amulu be iden ta insan, kasham, wa hajer, al ma bi ayinu wele bi asuma, ma bi akulu, wa ma bi shumu. ²⁹ Lakin kan itakum fetisu Yahwah Ilah takum, ita bi ligu Huwo, kan ita fetishu Huwo ma geliba wa nefsa taki kulu. ³⁰ Kan ita waga fi mushkila wan hajat de hasil le inta, fi akir ayam ita bi rija le Yahwah Ilah taki wa bi asuma le sout tuo. ³¹ Ashan Yahwah Ialh taki Huwo Ilah rehim; Huwo ma bi sibu ita wele bi demiro ita, ma bi nesitu waad ta abuhat taki al waidu umon. ³² Asalu an ayam al awel, al kan gubal zaman taki, min zaman al Allah kalagu insan fi wata, asalu min bidaya ta sama le nihaya, lu kan seei fi haja azim ze de, aw lu fi ayi haja asumau ze de? ³³ Seei hasil gubal kida insan asuma sout ta Allah bi wunuso min nus ta nar, ze ma itakum asuma wa ish? ³⁴ Wele hal Allah hawil shilu le nfsa tuo shaab minn nus ta shaab tanin, be tajarib, be ayat, wa ajayib, wa harib, wa be guwa, wele be idden al guwi, wele be makawif, ze kulu haja al Yahwah Ilah takum amulu le itakum fi Masir gidam uyon takum? ³⁵ Hajat de kan amulu, ashan ita bi arufu inu Yahwah Huwo Allah, wa mafi tani ze huwo. ³⁶ Huwo kutu ita asuma sout tuo min sama, ashan Huwo bi wejihu ita; fi wata Huwo sibu ita ayinu nra tuo al azim; ita asuma kelimat tuo min nus nar. ³⁷ Ashan Huwo hibu abuhat taki wa iktar iyal tumon baad umon, wa tala ita bara min Masir be hudur tuo wa guwa al azim; ³⁸ ashan be turuju min gidan taki shaab azim wa guwi min ita, wa bi jibu itakum wa bi wedi le itakum beled tumon ze werisa, ze fi yom ta aleela. ³⁹ Kede ita arufu aleela, wa kutu fi geliba taki, inu Yahwah Huwo Allah fi sama fuk wa fi ard tihit; mafi tani. ⁴⁰ Ita kede hafiso ganoon wa wasaya al ana wedi le ita, ashan bikun kues ma ita wa ma iyal taki baad ita, wa ayamat taki bi kun tuwil fi beled al Yahwah Ilah taki bi wedi le ita lel abad.'' ⁴¹ Yala Mosa hazilu talata mudon safa sherik ta Urdon, ⁴² ashan ayi zol bi jere fugu kan Huwo katulu zol budon gasit, al ma adu tuo gubal kida. Kan Huwo jere le wahid min mudon de Huwo bi naja. ⁴³ Umon kan: Basir fi sahara ta beled ta Raubiin; Ramos fi Jalaad le Jalaadiin; wa Jolan fi Basahn, beled ta Manassiin. ⁴⁴ De ya ganoon al Mosa kutu gidam ta shaab Israel; ⁴⁵ De yao Ahjam wa nuzum wa gawanin al huwo wunuso le shaab ta Israel wekit umon tala bara min Masir, ⁴⁶ zaman umon fi safa sherik ta Urdon, Mugabil wadi Baal Fagur, fi ard Sihon, melik ta Amoriin, al kan geni fi Hashbon, al Mosa wa shaab ta Israel gilibu zaman umon tala bara min Masir. ⁴⁷ Umon shilu beled tuo ze miras, wa beled ta Oj melik ta Bashan, de yao itnin muluk ta Amoriin, al fi gat bahar ta Urdon le safa ta sherik. ⁴⁸ Manatig bi ruwa min Arwir al fi nihaya ta wadi Arnon, le jebel Siyon (aw jebel Harmon). ⁴⁹ wa kulu wata ta Bahar Urdon, safa sherik gata bahar ta Urdon, le safa ta Nahar .Arabah, le nenzila ta jebel Fisjah