¹ Mosa nadi Israel wa kelim le umon, ''Asma takum, ya Israel, le gawanin wa nuzum al ana bi wunuso fi adanat takum aleela, ashan itakum bi arufu wa hafiso umon. ² Yahwah Ilah tanina amulu waad ma nina fi Horeb. ³ Yahwah ma amulu Ahaad de ma Judud tanina, lakin ma nina al kulu haieen hena aleela. ⁴ Yahwah wunuso ma itakum usa be usa fi jebel min nus ta nar ⁵ (Ana wegif bainu Yahwah wa itakum fi zaman dak, ashan bi weri le itakum kilima tuo; kanu itakum kan gi kafu min nar, itakum ma arkab fi ras jebel). Yahwah kelim, ⁶ Ana Yahwah Ilah takum, al tala itakum bara min beled ta Masir, bara min bet ta abudia. ⁷ Matakum amulu le itakum aliha tanin gidam tai. ⁸ Matakum amulu le itakum sura ta sanam wele sura ta ayi haja al fi sama min fuk, wele fi wata min tihit, wele delin al tihit moyo. ⁹ Matakum dengir tihit le umon wele kadimu umon, lanu Ana Yahwah Ilah taki, Ana Ilah ta gira. Ana bi sibu katiya bta abuhat bi wusulo le iyal tumon wa le jiel tumon al nimra arba ta delin al bi karahu Ana, ¹⁰ wa bi weri rahma le alaf, ta delin bi hibu Ana wa bi hafiso wasaya tai. ¹¹ Mata nadi isism ta Yahwah Ilah taki sakit, lanu Yahwah ma bi kutu zol al nadi isim tuo sakit tala beri. ¹² Hafiso yom sebit wa kadisu yom de, ze Yahwah Ilah taki weri le ita. ¹³ Ita bi ishtakal le sita yom wa amulu kulu shukulat taki; ¹⁴ lakin yom nimra saba de yom Sebit ta Yahwah Ilah taki. Ita ma bi amulu ayi shukul fi yom de - wele ita, wele weled taki, wele biniya taki, wele kadam taki abu rajil, wele kadam taki abu mara, wele tor taki, wele humar taki, wele ayi wahid min haiwanat taki, wele ayi ajinebi al bi geni fi abuwab taki. De ashan kadamin taki abu rujal wa nusuwan bi ligu raha wa kaman ita. ¹⁵ Zekiri ita kan abid fi Masir, wa Yahwah Ilah taki tala ita bara min hinak be guwi wa be iden al guwi. Ashan kida Yahwah Ilah taki amirro ita kede hafiso yom Sebit. ¹⁶ Akrimu abu taki ma uma taki, ze Yahwah Ilah taki weri le ita kede amulu, ashan ita bi ish zaman tuwil fi beled al Yahwah Ilah taki bi wedi le ita wa ashan kaman bikun kues ma ita. ¹⁷ Mata katulu. ¹⁸ Mata amulu zinna. ¹⁹ Mata Serego. ²⁰ Mata shahidu be kidib le jeran taki. ²¹ Mata ishtehi mara ta Jeran taki, mata ishtehi bet ta jeran taki, wele mahal zara tuo, wele kadam tuo abu rajil, wele kadam tuo abu mara, tor tuo, wele humar tuo, wele ayi haja ta jeran taki.' ²² Kelimat de Yahwah wunuso wadih fi limu takum fi jebel min nus nar, min sihab, wa duluma shedid; Huwo ma ziddu ayi kelimat ketir. Huwo katibu umon tihit fi itnin luho ta hajer wa wedi umon le ana. ²³ Hasil wekit itakum asuma sout min nus ta duluma ligu jebel bi wala, itakum bada ja gerib le Ana - shiuk takum kulu ma mugedimin ta gabayil takum. ²⁴ Itakum kelim, 'Yahwah Ilah tanin zahiru le nina mejid tuo wa azama tuo, wa anina asuma sout tuo min nus ta nar; anina ayinu aleel inu Allah bi ageder wunuso ma nas, wa umon bi ish. ²⁵ Lakin le anina bi mutu? Lanu nar ala azim de bi aragu anina; kan asuma sout ta Yahwah Ilah ta nina tani, anina bi mutu. ²⁶ De munu ger anina fi nus ta nas kulu al asuma sout ta Allah al hai gi wunuso min nus ta nar wa fadulu hai, ze anina amuliu? ²⁷ Kede ita yao ruwa wa asuma le kulu haja al Yahwah Ilah ta nina bi kelim; wa ita bi ja werii le anina ayi haja al Yahwah Ilah tanina kelim le ita; anina bi asuma wa teii.' ²⁸ Yahwah asuma kelimat takum zaman itakum wunuso le ana. Huwo kelim le ana, 'Ana asuma kelimat ta nas de, haja al umon kelim le Ana. Kalam al umon kelim de kues. ²⁹ Ya rat lu geliba tumon kan ze de fi juwa umon, hata umon bi kafu wa bi hafiso wasaya tai kulu, ashan bi kun kues ma umon wa iyal tumon lel abad! ³⁰ Ruwa weri le umon, ''kede rija fi kiyam tumon.'' ³¹ Lakin le ita, wegif hini ma Ana, wa Ana bi weri le ita kulu wasaya al, wa gawanin, wa nuzum al Ana bi deriso umon, ashan umon bi hafiso umon fi beled al Ana bi wedi le umon.' ³² ' Kutu takum bala, ashan bi hafiso, haja al Yahwah Ilah taki weri le ita; mata lefet yemin wele shamal. ³³ Kede ita duoru fi sikat al Yahwah Ilah taki weri le ita, ashan ita bi ish, wa ashan bikun kues ma ita, wa bi ziddu umor taki .fi beled al ita bi ruwa shilu