¹ 1Musa kan ruwa wa kelim le israel kulu, ² Howo kan kelim le umon,”Umur tai hasa mia wa ishiri sena; ana ma bi agder tani tala bara wa dakalu juwa; yahwah kelim le ana kalas, inta ma bigata urdon. ³ Yahwah Rabuna takum, huwo bigata gidam taki, huwo bi demir nas ta mahal dak gidam takum, wa intum bi shilu umon. Yashua, huwo biruwa wa bigata gidam bitak, ze yahwah kan wonusu. ⁴ Yahwah bi amulu le umon ze huwo kan amulu le sihon wa Og, muluk ta Amoriin, wa bilad tomon, al huwo kan demir, ⁵ Yahwah bi selim umon le intum, wa intum bi amulu le umon hasab kulu wosiya ana kan wosi intum ⁶ Keli intum geni gowin wa be shujaa, mata kum kafu wa mata kum kafu umon, le anu yahwah Rabuna takum huwo biruwa ma intum, huwo ma bisibu intum fashil, wa ma bi sibu intum ⁷ Musa kan nadi yashua wa kan kelim le huwo gidam israel kulu, keli inta geni gowi wa shujaa, le anu inta bi ruwa ma nas de le beled al yahwah kan halif bi wodi le judud tomon, inta bikutu umon bishilu huwo. ⁸ Yahwah yau biruwa gidam takum, huwo bikun ma inta, huwo ma bi sibu inta waga, walaa bi shibu inta, mata kafu wa mata tala kaslan. ⁹ Musa kan katibu gaanun de wa kan wodi le kahana, iyal ta leawi, al kan gi arfa sanduk ta itifagiya ta yahwah, huwo kaman kan wodi suwar ta ganun dee le kulu shiyuk ta israel ¹⁰ Musa kan amiru umon gali,”Fi nihaya ta kulu saba sena, wa fi zaman al sabitu ashan bi masau diyun, zaman ta eid al mazala, ¹¹ zaman al kulu israel beja gidam yahwah Rabuna takum fi mahal al huwo bi azilu ashan bikun mahal ta ibada, inta bi agara ganun de fi adana ta kulu israel, ¹² Limu nas, rujal, nuswan, iyal sukeirin, wa ajnebi al fi abwab ta medina takum, ashan umon bi asma wa bi alim, wa ashan umon bi ehterim/karim yahwah Rabuna bitak wa hafisu kulu kelimat ta ganun de. ¹³ Amulu de ashan iyal tomon al kan ma aruf, bi asma wa bi alimu keif umon bi karim yahwah Rabuna bitum, fi kulu zaman al intum bi geni fi arid al intum gi ruwa gata nahar urdon wa geni fogo. ¹⁴ Yahwah kan kelim le Musa, ayinu, yom bija al inta bi mutu, nadi yashua wa wogif takum fi keima ta ijtma, ashan ana bi wodi le huwo wosia, musa wa yashua kan ruwa wa wogif fi keima ta ijtima. ¹⁵ Yahwah kan zahir fi keima ta ijtima fi shikil ta amud ta sihab, amud ta sihab kan wogif fog bab ta keima. ¹⁶ Yahwah kan kelim le musa, ayinu, inta binum tehet ma abuhat bitak, nas del bigum wa bi amulu ze zol ta zina al gi ruwa wara rabunat gerib al moujud fi nus tomon fi beled al umon gi ruwa fogo. Umon bisibu ana wa bikasuru itifagiya tai al ana kan amulu ma umon. ¹⁷ Biga, fi yom dak, zalan tai bi wala deed umon wa bi akulu umon. Ana bidusu usa tai min umon, wa bi akulu umon. Kawaris wa mashakil ketir bi ligo umon, biga umon bikelim yom dak, kawaris de ma ja le nina ashan Rabuna ta nina biga mafi fi nus ta nina. ¹⁸ Ana hagiga bi dusu usa tai min umon fi yom dak ashan kulu hajat al batal al umon biruwa amulu, ashan umon gilibu le rabunat tanin ¹⁹ Hasa baad de, kafibu guna de le nefsa takum wa alimu nas ta israel, kutu fi kasmat tomon, ashan gona de bikun shuhud le ana deed nas ta israel ²⁰ Le anu fi zaman al ana bijibu umon fi arid al ana kan halif ashan bi wodi le judud tomon arid al malian ma leben wa asel, wa fi zaman al kalas umon akulu wa biga shabaaniin, najah, biga umon bi agilibu le rabunat tanin wa umon bi akdim umon wa bi alisu ana, kaman bi kasuru itifagiya tai. ²¹ Laman hajat batal wa mashakil ketir bija le nas de, guna de bikun shedid fi wasat tomon ze shudud(Ashan ma bi nesitu huwo min kasmat ta ajiyal tomon) ashan ana taktitat al umon gi amulu alela, hata gubal lisa ana ma jibu umon fi arid al ana kan halif le umon. ²² Musa kan katibu guna de wa alimu nas ta israel fi nefsa yom. ²³ Yahwah kan wodi le yashua wosia gali, geni gowi wa be shajaa kwes, leanu inta bijibu nas ta israel le arid al ana kan halif le umon, wa ana bikun ma inta, ²⁴ Kan hasil laman musa kan kalasu katibu ta kelimat ta ganun fi kitab. ²⁵ Huwo kan wodi talimat le lawiin al kan gi arfa sanduk ta tifagiya ta yahwah wagal, ²⁶ Shilu takum kitab ta ganun de wa kutu takum jambu sanduku ta tifagiya ta yahwah Rabuna takum, ashan bikun hinak ze shahid deed intum. ²⁷ . Le anu ana aruf tamarud takum wa gelba gowi takum; ayinu, zaman al ana lisa hai ma intum hata alela, intum kuntum mutameridin deed yahwah, bikun godur shunu kan ana mutu ²⁸ Limu takun le ana kulu shiyuk ta gabael takum, wa mosoulin bitakum, ashan ana bi wonusu kelimat del le adanat tomon wa binadi sama wa arid ashan bikun shahid deed umon, ²⁹ Le anu ana aruf baad mutu tai intum bi fasid nufus takum wa bi agilib beid min sika al ana kalas wosi intum; karisa bija le intum fi ayam al baadu. De bi hasil ashan intum bi amulu haja batal fi ena ta yahwah, ze ma intum bi fetisu zalan too bi wasit shokol ta idenat takum ³⁰ Musa kan gi kerir wori be muk kelimat ta gona de fi .adana ta nas ta israel kula, lahadi kan kalasu