¹ Wodi adana, inta samawat, wa keli ana wonusu, wa keli arid asma le kelimat ta kasma tai, ² Keli taalim tai naga tehet ze motoro, wonusa tai keli kati ze dul, ze motoro tegil fi gesh, wa ze rashat ta moya fi hajat ta ziira ³ Le anu ana bi alinu isim ta yahwah, wa bi wosif azama ta Rabuna ta nina. ⁴ Huwo hajer al gowi, shokol too kamil, le anu sikat too kulu adil, huwo Rabuna al amin, huwo ma gi amulu haja al ma adil, huwo adil wa ta nesia, ⁵ Umon amulu fasaf deed huwo, umon ma iyal too. De fadiya, umon jil al ruwa bara wa al ma adil ⁶ Hal beteriga de intum bi awidu yahwah, intum ya nas/shaab al belitin wa al ma negit? Huwo yau ma abu takum, al kan kalagu intum? Huwo yau al amulu intum wa asisu intum ⁷ Zekir takum ayamat al gedim, fekir takum sinin ta ajiyal al fat, asalu takum abuhat takum, umon bi beinu le intum, wa shiyuk takum bi wori le intum ⁸ Laman al fok al futu kulu kan wodi le nas kulu fi wata al bikun tomon. Zaman dak huwo kan gesim nas kulu, wa kan kutu hudud bita nas hasab adad ta iyal ta israel ⁹ Le anu nas ta yahwah umon kas le huwo, Yacoub yau gesimu le Rabuna ze worisa ¹⁰ Huwo kan ligo Yacoub fi beled al sahara, wa fi gaba al kaab wa fadi, huwo kan kati huwo wa ayinu wara too, huwo kan hafisu huwo ze juwa eina too ¹¹ Ze sogur gi ayinu juwa too, bi geni fi nus iyal too, huwo bi fata jinahat bitoo wa limu umon, huwo bi nizam umon be jinahat too ¹² Yahwah barau kan shilu huwo, kan mafi rabuna ajnebi ma huwo ¹³ Huwo kan kutu arfau huwo fi mahalat al fok fi beled, wa huwo kan akilu huwo ma simar ta zeraa, wa asel min hajer/jebel, wa zeit min hajer al moshagag ¹⁴ Huwo kan akulu zibda min bagara wa kan ashrab leben min ganam, wa shaham min korufan wa tiyus ta Bashan wa gemeh al ahsen, min dom ta einab huwo kan ashrab merisa. ¹⁵ Lakin Orshelim raba semin wa solutu inta kan akulu shaban-huwo kan aba Rabuna al kan kalagu umon, wa kan aba hajer ta kolasa too ¹⁶ Umon kan kutu yahwah zalan magira ashan rabunat tomon al gerib umon kutu huwo kan zalan ashan fadiya tomon de. ¹⁷ Umon kan wodi zabihat le arowah, al kan ma Rabuna, rabunat al umon kan ma aruf, rabunat al zahir gerib de, rabunat al abuhat takum kan ma kafu ¹⁸ Intum kan sibu hajer gowi al kan abu takum, wa nesitu Rabuna al kan weledu intum. ¹⁹ Yahwah kan ayinu ze de wa kan aba umon, ashan awolad too wa banat too kan fetisu huwo ²⁰ Ana bidusu usa tai min umon, wa ana bi ayinu nihaya tomon bikun keif ashan umon jil al batal, iyal al ma indu amana. ²¹ Umon wodi le ana gira ma haja al ma rabuna, umon kutu ana zalan ma hajat tomon al ma indu faida, ana bi sibu nas taniin bikun indu gira le umon, ma nas al belidin ana bikutu umon zalanin. ²² Le anu nar ta zalan tai wala, wa bi haragu lahadi mahal al tehet fi sheel, huwo bi demiru arid ma intaj bitoo, wa gi haragu asasat ta jibaal. ²³ Ana bi limu damar fogo umon wa ana bi durubu neshab le humon, ²⁴ humon bekun batal ma jian wa mutu min hariga ta sakana wa karab al mur, ana birasulu le umon asnan ta hayiwanat al batalin, ma sim ta hayiwanat al gi juru nefsa fi turab ²⁵ Bara seif bi kalasu wa fi serir ta num kouf bi amulu ze de kaman, bi demiru shabab wa banat al azra, iyal al gi rada, ma ajusin ²⁶ Ana kan kelim, ana bi shetet umon beid wa ana bi keli ma bi zekiru umon fi nus ta nas ²⁷ Iza kan ana ma gi kafu kasma gowi ta nas adu, al bikutu adu tomon bihukum be galat, wa umon bikelim gali, iden ta nina naja, ana kan bi amulu kulu hajat al batal. ²⁸ Le anu israel beled al ma indu moshoura wa umon ma gi fahim. ²⁹ Oh, lou kan umon indu hikma, ashan bi fahim kalam de, wa bi aruf nihaya tomon ³⁰ Zal wahid bi turuju alf, wa etnein bi kutu ashara alf jere, ile iza kan hajer al gowi tomon beyu umon, wa yahwah kalas selim umon le adu ³¹ Le anu hajer al adu ta nina ma ze hajer bita nina, hata nas adu tanina arif kalam de ³² Le anu sejera karma tomon ja min shera karma ta sodom wa min mazra ta amora, wa einab tomon gi weledu sim wa furuo tomon mur ³³ Shejerat tomon sim ta dabaeb, wa sim ta dabaeb al bi katulu ³⁴ Hal kuta de ana yau ma dusu be sir wa katim fi kazinat tai? ³⁵ Shokol takiyan de tai wa ana yau bi wodi ikab, fi zaman al kurein tomon bi zeletu, le anu karisa le umon biga gerib, wa hajat al bija le umon bija guwam." ³⁶ Leanu yahwah bi wodi adala le nas too, huwo bikun indu hanan le abiid bitoo huwo bi ayinu guwa tomon kalas biga ma fi, wa mafi wahid al fadulu, la abiid wala nas al hur. ³⁷ Biga huwo bi kelim, wenu rabunat tomon al hajer al umon kan jere le umon? ³⁸ Rabunat al kan akulu sahm ta zabihat tomon, wa ashrab merisa ta tegdimat ta shirab tomon? Keli umon gum fok wa saidu intum, keli umon yau geni himaya takum ³⁹ Ayinu takum ana hasa, ana yau Rabuna, wa mafi rabuna tani geir ana; ana bi katulu, wa ana bi wodi haya, ana bi wodi dabara wa ana bi aliju, mafi zol al bi agder ankiz intum min ida tai al gowi ⁴⁰ Le anu ana bi arfa ida tai fi sama wa bekelim, ze ana hai ila al abad. ⁴¹ Laman ana bi seninu seif tai al lamaa de, laman ida tai bi bada jibu adala, ana wodi zalan tai le nas adu tai, wa ana bi dafa fogo del al gi akrah ana. ⁴² Ana bi keli nishabat tai bi ashrab dom, seif tai bidemir gisim ma dom ta meyitin wa del al bigobudu fi dusuman, wa min kayadat al mosoulin ta nas adu. ⁴³ Afrah takum, intum umon, ma nass ta Rabuna le anu huwo bi dafa dom ta abiid too, huwo biwori zalan/intikam too le nas al adu too, wa huwo bi dafa le beled/arid wa nas bitoo. ⁴⁴ Musa kan ja wa agara kulu kelimat ta guna de fi adana ta nas, huwo wa yoshua jena ta nun ⁴⁵ Musa kan kalasu agara kulu kelimat del le israel kulu ⁴⁶ Huwo kan kelim le umon, sabit takum fi fikira takum kulu kelimat al ana kalas wori le intum alela, ashan intum bi wosi iyal takum keli hafizu umon, kulu kelimat ta ganun de ⁴⁷ Le anu de ma kalam sakit le intum, ashan huwo haya takum, wa bowasat hajt de intum bikun indu ayam towil fi beled al intum gi ruwa shilu fi jiha tani ta urdon." ⁴⁸ Yahwah kan wonusu le Musa fi nefsa yon dak gali ⁴⁹ Ruwa fok fi silsila ta jibal ta abarim, fok jebel nebo, al fi arid ta moab, aks ta Ariha. Inta bi ayinu beled ta kanaan, al ana bi wodi le shaab ta israel ze haja tomon. ⁵⁰ Inta bi mutu fi jebel al inta ruwa fok, wa inta bi lemu le nas taki, ze Aaron sabi taki min Israelite al mutu fi Jebel Hor wa kan lemu le nas to. ⁵¹ De bi hasil ashan intum ma kan aminin le ana fi nus ta nas ta israel fi moyat ta meribah fi kadesh, si sahara ta zin, ashan intum ma kan ishtakal le ana be karama wa ehteram fi nus ta nas israel ⁵² Le anu inta bi ayinu beled de gidam bitak, lakin inta ma bi dakalu hinak, fi beled al ana gi ruwa wodi le shaab ta israel