¹ Del yau kilimat al yahwa kan kelim le Musa keli wori le shaab ta Israel fi arid ta moab, kilimat al kan zidu fi ras at itifagia al huwo kan amulu ma umon fi Herob. ² Musa kan nadi Israel kulu wa kelim le umon, “intum ayinu hajat kulu al yahwa kan amulu gidam ena takum fi beled ta masir ma faraun, ma kulu umal towo, Kaman ma kulu beled bitowo. ³ Taab al kebir al intum ayinu ma uyun takum, alamat, wa ajaeb al kebir. ⁴ Lakin lahadi alela yahwa lisa ma wodi le intum geliba ashan bi aruf, uyun ashan bi shuf, au adana ashan bi asma. ⁵ Ana sugu intum le muda arbein sena fi sahara, gumasat takum kan karabu fi jisim takum, wa jezmat takum kan makalasu fi kurein takum. ⁶ Intum kan ma akulu ai eish, wa intum kan ma asurub ai merisa wala al gowi ashan bisakaran intum, ashan intum bi arufu gali anaa yau yahwa Rabuna takum. ⁷ Zaman kan intum wosulu fi mahal se, ssihon, melik ta Hishbon, wa Og, melik ta Bashan, ja bara ashan bishakil anina, anina kan demiru umon. ⁸ Anina kan shilu beled tomon wa wodi ze worisa le Rubeniina, wa le Gadiin, wan as tani le geliba ta manasi. ⁹ Ashan kida hafizu takum kilimat ta itifagia de wa amulu takum umon, ashan binaja fi kulu hajat al intum bi amulu. ¹⁰ Intum gi wogif alela, kulakum gidam yahwa Rabuna takum, ma satatin takum, gabilat takum, shiyuk takum, wa asakir takum, kulu rujal al fi Israel, ¹¹ Iyal takum, nusuwan takun, wa ajnebi al fi nus bita mahal al intum gaidin, min zol al gi gata le intum kasab le zol al gi juru le intum moya. ¹² Intum hini ashan bi dakalu fi itifagiaa yahwa Rabuna takum, wa halifa yahwa Rabuna takum gi ruwa amulu ma intum alela, ¹³ Ashan huwo bi amulu intum nas bitowo alela, wa huwo bikun Rabuna le intum, ze huwo kan kelim le intum, wa Kaman ze huwo kan halifu le judud bitakum, le Abraham, le Ishak, wa le Yacoub. ¹⁴ Huwo Kaman ma bes ma intakum ana gi amulu itifagia wa halifa de. ¹⁵ Lakin ma kulu wahid al gi wogif hini gidam yahwa Rabuna ta nina, Kaman ma del al mafi hini fi nus ta nina alela. ¹⁶ Intum aruf keif anina kan geni fi masir, wa keif anina kan ja fi nus ta shaab ta bilad ketir wa kan futu min nus tomon. ¹⁷ Intum kan ayinu asnam ta kidib al amulu min kashab, hajer, fidda, wa dahab, al kan fi nus tomon. ¹⁸ Keli intum kun muta akidin mafia i zol fi nus bitakum, kan rajil, kan mara, kan usura sukeir wala kebir geliba, al geliba towo bi gilibu bara min yahwa Rabuna takum alela, ashan biruwa abidu rabunat ta nas ta bilad del, keli intum kun muta akidin mafi zol fi nus bitakum indu gelba batal al bishilu juzur al bitatau simar ta sim wa ta sejera al mur. ¹⁹ Laman zol dak bi asma le kelimat ta laana de, huwo bi bariku nefsa towo juwa gelba towo, wa bikelim, ana bikun indi salam, hata iza kan ana gi douru wara gelba tai al batal, de bi demiru mahal al leyin wa al yabis. ²⁰ Yahwa wa bi raham huwo, lakin zalan ta Rabuna wa geira towo bi dofugu le zol zede, wa kulu laanat al katibu fi kitab de bi ja fogo huwo, wa yahwa bi masa isim ta zol de bara min tehet sama. ²¹ Yahwa bi kutu huwo barau le karaba bara min kulu gabael ta Israel, bikutu kulu laanat ta halifa al katibu fi kitab ta ganun. ²² Iyal al bija, iyal takum al bigum wara bitakum, wa ajnebi al min beled beid, bi wonusu iza kan umon bi ayinu hajat batal / balaya fi beled de wa amrad al yahwa kalas kutu. ²³ Laman humon bi ayinu beled kulu biga kibirit, wa hariga, laman mafi haja bizarau, wala biweledu simar, mahal al mafi kudar biraba, ze waga ta Sodom wa Amora, Admah, wa zeboyim, al yahwa kan demiru ma zalan wa takiyan bitowo. ²⁴ Umon bikelim sawa ma bagi bilad, “lei yahwa amulu kalam de le beled de? Sakana ta zalan al kebir de mana towo sunu? ²⁵ Biga nas bigul, de ashan umon sibu itifagia ta yahwa Rabuna ta judud tomon, al huwo kan amulu ma umon zaman al huwo tala umon bara min beled ta masir. ²⁶ Wa ashan umon kan ruwa ashan bi akim rabunat tani wa abidu umon, rabunat al umon kan ma bi arufu wa al huwo kan ma wodi le umon. ²⁷ Ashan kida zalan ta yahwa kan wala did beled de, ashan bijibu fogo kulu laanat al kan moktub fi kitab de. ²⁸ Yahwa kalas agila umon min beled tomon be zalan, be takiyan, wa geira kebir, wa kalas jada umon fi beled tani ze alela. ²⁹ Hajat ta sir bi fadulu le yahwa Rabuna ta nina, lakin hajat al bi zahir de tanina le abad, wa le iyal ta iyal ta nina. Ashan anina amulu kulu .kalamat ta sharia de