¹ Iza kan intum asma beraa le sout yahwa Rabuna takum ashan bihafizu kulu wasaya al ana gi wosi intum alela de, yahwa Rabuna takum bi arfa intum fok kulu nas al fi ardi ta dunia. ² Barakat del kulu bija le intum wa bi dofugu intum, iza kan intum asma le sout ta yahwa Rabuna takum. ³ Intum bikun mobarikin fi medina wa mobarikin fi mazra takum. ⁴ Baraka bikun le iyal al gi tala min batna takum, simar ta wata takum, simar ta bagarat takum, wa ziyada fi ganamayat takum, wa korufan takum. ⁵ Gufa takum bikun mobarak sawa ma kojoron ta ajin takum. ⁶ Intum bikun mobarikin kan intum gi dalaku, wa mobarikin kan intum gi tala. ⁷ Yahwa bidurubu nasadu takum al deir shakila intum gidam takum, umon bija did intum fi sika wahid, lakin umon bijere gidam intum fi saba sikat. ⁸ Yahwa binadi Baraka keli ja fi makazin takum wa fi kulu hajat al intum bikutu iden takum fogo. Huwo bi bariku intum fi beled al huwo gi ruwa wodi le intum. ⁹ Rabuna bi asisu intum ze shaab bitowo al kasisu le huwo, ze huwo kan halifu le intum, iza kan intum hafizu wasaya ta yahwa Rabuna takum, wa douru fi sikat towo. ¹⁰ Nas kulu ta aridia bi arufu gali Rabuna yau kan nadi intum, wa umon bikafu intum. ¹¹ Yahwa bizidu simar ta batna takum aktar, fi simar ta bahaem takum, wa fi simar ta turab al fi beled al huwo kan halifu le abuhat takum ashan biwodi le intum. ¹² Yahwa bi fata makazin towo al fi samawat ashan bi wodi le intum matara fi zaman monasib, wa ashan bi barik kulu shokolat ta iden takum, intum bi wodi deyin le bilad ketir, lakin intum ma bi deyin min umon. ¹³ Yahwa bi keli intum ras, ma danaba. Intum bikun bes fok, wa intum ma nenzil tehet, iza kan intum asma le wasaya ta yahwa Rabuna takum al ana gi wosi intum alela, ashan intum hafizu wa amulu umon. ¹⁴ Wa iza kan intum matala bara min ayi kalamat al ana gi wosi intum alela, fi shamal wala fi yemin, ashan intum biruwa wara rabunat tannin wa ishtakal le umon. ¹⁵ Lakin iza kan intum ma asma le sout ta yahwa Rabuna takum, ashan bi hafizu kulu wasaya wa gawanin al ana gi wosi intum alela, biga kulu laanat del bija le intum wa bi dofugu fogo intum ¹⁶ Intum bikun molounin fi medina, wa molounin fi mazra takum. ¹⁷ Laana bikun fi gufa takum wa hala ta ajinu takum. ¹⁸ Laana bikun fi simar ta batna takum, simar ta arid takum, bagarat, wa korufan takum. ¹⁹ Intum bikun molounin fi dukul, wa molounin kan gi tala bara. ²⁰ Yahwa birasulu intum laana, lakbata, wa fashal fi kulu hajat al intum bikutu ida takum fogo, lahadi bidemiru intum, wa intum bimutu guwam ashan sher fi amael takum al kutu intum sibu ana. ²¹ Yahwa bikutu ayan ta mutu bilesegu wara takum, lahadi bidemiru intum bara min beled al intum biruwa gwni fogo. ²² Yahwa bi hajimu intum bi ayanat de, be huma, be warmat fi jisim, be jafaf, be hargan fi hibub, harara shedid, be iltihabat, hajat del bi ruwa wara takum lahadi intum bimutu. ²³ Sihab al fok intum bikun nihas, wa arid al bikun tehet intum bikun hadid. ²⁴ Yahwa bikutu matara ta beled takum budra wa rumad, huwo bija le intum tehet min samawat, lahadi bi demiru intum. ²⁵ Yahwa bikutu bi dugu intum tehet ma nas adu takum, intum bitala did umon bi wahid sik, lakin intum bijere min umon fi saba sikat, kulu mamalik ta duniya bi lizu intum min hini le hinak. ²⁶ Meyit takum bikun akil le kulu tiyur ta samawat wa le hayuwanat al batal ta arid, ma bikun fi zol al bikoufu umon. ²⁷ Yahwa bidurubu intum be gurha ta masir, wa haragan, wa bawasir, wa hasasiya, al intum ma bi agder aliju. ²⁸ Yahwa bidurubu intum be junun, wa amiyan, wa lakbata fi muk. ²⁹ Intum bi fetisu mahal be nahar ze zol al amiyan bi fetisu bileil fi duluma, wa intum ma bi naja fi sikat takum, daiman bi asuru intum wa biseregu intum, wa mafi zol al bi ankiz intum. ³⁰ Zol minakum bi hajisu biniya al mara, lakin rajil tani yau bigobudu wa num ma hiya, intum bi abinu beit lakin ma bi num fogo, intum bizarau shejera karma lakin ma bi akulu simar towo. ³¹ Bikatulu bagara takum lakin intum ma bi akulu laham towo, bishilu himar bitak be guwa gidam taki wa ma rijau le inta, korufan bitak biwodi le nas al adu taki, wa mafi zol al ankizu inta. ³² Awolad wa banat taki biwodi le nas tannin, uyun taki bi ayinu le umon yom kulu, wa inta bi ishtag le umon, lakin inta ma bikun indu guwa fi ida taki. ³³ Netija ta wata wa kulu shokolat ta ida taki shaab al inta ma arufu bi akulu umon kulu, bidagitu wa bidudu inta daiman, ³⁴ Ashan inta bikun mojnun min hajat al inta bi ayinu biashil. ³⁵ Yahwa bidurubu inta fi kura ma rukuba be warmat ta mida al inta ma bi ligo ilaj, min tehet kuraa taki te fok ras taki. ³⁶ Yahwa bishilu intum wa melik al intum bi azilu le intum fi beled al intum kan ma aruf, al intum wala judud bitakum, hinak, intum bi abidu rabunat tomon, al min kashab wa hajer. ³⁷ Intum bikun sabab kouf, missal, wa taalis fi nus ta nas kulu mahal al yahwa bi shilu intum. ³⁸ Intum bi shilu teirab ketir ashan bizara, lakin intum bilimu besit, jarad bi akulu hajat tazira de. ³⁹ Intum bizara ashjar ta karma, lakin intum ma bi asurub merisa towo, wala hata akulu walimu simar tomon, le anu dud bi akulu umon. ⁴⁰ Intum bi indu ashjar ta zeitun fi mahalat takum kulu, lakin intum ma bi masa nefsa takum ma zeit, ashan simar ta zeitun bi waga gubal ma nigitu. ⁴¹ Intum bi weledu awolad wa banat, lakin umon ma bi geni le intum ashan umon bikun masajin. ⁴² Kulu ashjar wa intaj arid takun, bi akulu ma jarad. ⁴³ Ajanib al bi geni fi nus takum bi arfau fok wa fok, wa intum be nenzil tehet le tehet. ⁴⁴ Intum be shilu dein min umon, lakin umon ma bi shilu min intum, wa umon bikun ras wa intum bikun danab. ^{46 45} Kulu laanat del bija le intum wa bi ruwa wa intum Kaman bi mala fogo intum, lahadi bi demiru intum , de bihasil ashan intum kan ma asma le sout ta yahwa rabuna takum, ashan binafizu wasaya wa gawanin al ana gi wosi intum, Laanal de be kun le intum ze alamat wa ajaeb, wa le iyal ta iyal takum ila al abad ⁴⁷ Ashan intum ma kan abidu yahwa rabuna takum be farah wa niya zama al intum kan mortahin. ⁴⁸ Ashan kida, intum bikun kadamin ta nas adu al yahwa birasulu did intum, intum bi ishtakal le umon be jaan, be afshan, be ariyan, wa be meskin, umon bikutu hadid ta arfa hajat fi ragabta takun, lahadi bi inta ikatulu intum. ⁴⁹ Yahwa bi jibu nas min beled beid did intum, min niyay ta arid, ze sogur gi alagu dehya towo, beled al nas al intum ma bifahim luga towo. ⁵⁰ Nas al indu usa al bi kwafu, al ma ehterim ajus, wa ma be hiin le zol shab. ⁵¹ Umon bi akulu bagara takum al subiyanin wa intaj al bi tala min iden takum fi arid lahadi bi demiru intum umon ma bi sibu le intum gemeh, merisa jeidi, zeit wala le bagara, wala koruf lahadi umon bi sibu intum mutu. ⁵² Uumon bi hasiru intum fi kulu abwab ta medina lahadi aswar bitakum al fou kalis wa go wi bi waga min kula mahal ta beled al yahwa Rabuna takun kan kalas wodi le intum. ⁵³ Intum bi akulu simar ta jisim takum, laham ta awolad wa banat takum, al yahwa Rabuna takum kan wodi le intum, fi hasir wa fi deig al nas adu takum bi deigu intum. ⁵⁴ Rajil al kan meskin wa hanin biga bikun takiyan le aku bitowo, wa le mara al howo gi hibu, wa le yatu iyal al fadulu le huwo. ⁵⁵ Huwo ma bi wodi le ayi whaid min umon laham ta iyal botowo zotu al huwo bi ruwa akulu, le anu ma bi fadulu ma ayi haja le nefsa towo fi hisar wa deig al nas adu gi deigu intum fi kulu abwab ta medina. ⁵⁶ Mara al ta jisim hilu wa jemila fi nus takum, al ma gi rudu kutu batna kurain towo fi turab ashan jamala wa jisim jiyafa towo, bikun takiyan le rajil towo zatu, le weled towo, wa le biniya towo, ⁵⁷ Wa le jena al hiya weledu jedid al tala bein kurein ta hiya, wa le iyal al hiya bi weledu, hiya bi kulu umon be sir, ashan mafi ayi haja tani al bi akulu, fi zaman ta hisar wa fi deig al nas adu takum bi deigu intum fi abowab ta medina. ⁵⁸ Iza kan intum ma hafizu kulu kalamat ta sharia al katibu fi kitab de, ashan karimu isim al indu mejid wa kwafu, yahwa Rabuna takum, ⁵⁹ Yahwa bi jibu le intum darabat ta ayan al kaab, wa le iyal ta iyal takum, darabat de bikun gowi wa ta kwafu, wa bikun le zaman toeil, wa ayanat al kaab Kaman al bisilu zaman towil. ⁶⁰ Huwo bijibu le intum tani mara ayanat ta masir al intum kan kafu, umon bi lesegu le intum. ⁶¹ Kaman kulu darabat wa amrad al ma katibu fi kitab ta sharia de, yahwa bi jibu le intum lahadi bi demiru intum. ⁶² Intum bi fadulu besit, hata low intum kan ketir ze adad ta nujum ta samawat, ashan intum kan ma asma le sout ta yahwa Rabuna takum. ⁶³ Ze yahwa kan fi zaman tani wara ta moksut ma intumwa amulu le intum kwes, wa fi zidu adad takum, Kaman huwo bikun moksut ma intum ashan intum bi ligo azab wa demiru intum. Bi agilau intum bara min beled al intum bi rwa ashan bigeni fogo. ⁶⁴ Yahwa bi fertek intum fi nus ta kulu nas min jiha wahid ta wata, hinak intum bi abidu rabunat taani al intum kan ma aruf, la intum wala jidud takum, rabinat al min kasab wa hajer. ⁶⁵ Fi nus ta nas del intum ma biligo amni, wa ma bikun fi raha le batna kurein takun, yahwa bi wodi le intum gelba al gi rogus, wa uyun al taban, ma nefs al haznan. ⁶⁶ Haya takum bikun mualag be shukuk, intum bikun fi fouf bilil wa nahar, wa intum ma bikun muktenein fi haya takun. ⁶⁷ Fi sabah intum bigul, ana kan deir wokit de yekun bileil, wa fi leil intum bigul, ana kan deir wokit de sabah, ashan kouf al fi gulub takum, wa hajat al uyun takun biayinu. ⁶⁸ Yahwa bi le masir tani be sufun, be sika al ana kan kelim le intum, “intum ma bi ayinu masir tani mara, hinak intum bi wodi nufus takum le biyu le nas al adu takum ze abidal rujal wa .nusuwan, lakin mafi zol al bi isteri intakum