¹ Mafi rajil al jism towo ta rajil molejin wala gatau bara bidakalu fi nus ta jama ta yahweh. ² Mafi jana al weledu be zina bikun tab le jama ta yahweh, lahadi jil nimira ashara min iyal ta yahweh’ ³ Zol min amoriin wala min moabiin ma bikun taabe le jama ta yahweh lahadi jil nimira ashara, mafi zol bikun taabe le jamaa ta yahweh. ⁴ De ashan humon kan ma istagbil intum be eish wa moya fi sika zaman al intum kan tala min masir, wa ashan humon kan ajiru balaami weled ta beor min pethor fi aram naharim did intum, ashan bi laanu intum . ⁵ Lakin yahweh rabuna takum kan ma asma le balaami ,lakin yahweh rabun takum kan gilibu laana le Baraka le intum, ashan yahweh rabuna takum biribu intum. ⁶ Keli untum ma fetisu salam ma humon wala ruwa wara keirat tomon fi haya takum kulu. ⁷ Mata kum aba adomiin ashan humon akana ta kum, wa intum ma bi akrah masriin ashan intum kan ajanib fi beled tomon. ⁸ Iyal ta jil nimira talata tomon bikun taabe le jamaa ta yahweh. ⁹ Laman intum bitala bara ze jeish ashan dusuman ma aada bitafizu nefsa takum min kulu hajat al batal. ¹⁰ Iza kan fi ayi rajil fi nus bitakum biga ma nedif ashan nuwo ayinu hilim ma kwes, huwo bitala bara min moaskar ta jeish, huwo ma birija le moaskar. ¹¹ Kan wata biga ashiya huwo bi beredu ma moya, kan shemis waga, huwa biga birija wara fi moaskar. ¹² Intum bikun indu mahal bara min moaskar al intum bi douru fogo. ¹³ Wa intum bikun indu haja ta hafura wata, ka zol gi dengir ashan bisaidu nefsa towo, indu bi hafura ma nafara de wa birija kati ma turab wasaka al tala min intum. ¹⁴ La anu yahweh rabuna takum gi douru fi nus ta moaskar ashan biwodi le intum nusra wa wodi adu takum fi iden ta kum,ashan kida moaskartakum keli yakun mokadasa. Ashan huwo keli ma ayinu ayi haja al waskan fi nus takum wa agilib beid min intum. ¹⁵ Keli intum ma rijau abid al jere min sidu towo le sidu. ¹⁶ Keli huwo geni le intum, fi ayi medina al huwo deir, matakum azib huwo. ¹⁷ Ma bikun fi momarasat ta zina fi nus ta banat ta Israel, wala momarasat ta zina fi nusnta awoled ta Israel. ¹⁸ Intum ma bijibu makasab ta zol al zani wala kelib al zani ze atayal takadima fi beit ta yahweh rabuna takum, ashan humon kulu nijis le yahweh rabuna takum. ¹⁹ Keli intum ma wodi deyin be rebeh /makassb le akwana takum al min Israel –faida gurush, faida ta akil, wala faida ta ayi haja al bidiyinu be faida. ²⁰ Le ajnebi inta bi deyinu be fadia, lakin le aku taki Israel intum ma bi deyinu be fadia, ashan yahweh Rabuna takum bi bariku intum fi kulu hajat al iden takum fi beled al intum gi ruwa geni fogo ²¹ Iza kan intum halifu ashan bi wodi haja le yahweh Rabuna takum, matakum akir ashan bikamilu halifa takum, ashan yahweh Rabuna takum behagiga bi asalu haja de min intum. Huwo bikun katia le intum kan intum makamilu wodi taki. ²² Lakin kan intum ma halifu, huwo ma bikun katia le intum. ²³ Kalamat kan tala min kasma lisan takum, itum lazim bihafizu wa amulu ze ma intum kan halifu le yahweh Rabuna takum. Ayi haja al intum kan waadu behuriya beniya wa be kasma takum. ²⁴ Iza kan intum ruwa le shejera ta karamta einab ta jeiran takum, intum keli akulu kifaya ze intum bi agder, lakin intum ma keli kutu tani fi gufa takum. ²⁵ Iza kan intum dakalu fi mahal zara ta gemeh ta jeiran takum, keli intum legetu gata gemeh ma iden takum, lakin matakum gata gemeh al .nigitu ta jeiran taki ma menjel