¹ mata ayinu bagara wala koruf ta aku taki Israel gi woduru wa ma bikutubbala fogo, keli inta hawil ashan birijau umon le sidu. ² iza kan aku taki al Israeli de ma gerib ma inta,awu inta ma biarufu huwo, inta bijibu umon le beit taki, umon bigeni ma inta lahadi sidu bifetisu, biga inta birija le huwo ³ Inta lazim bi amulu zede le himar bitowo wa Kaman ma gumasat towo, inta biamulu zede ma ayi haja al woduru wa inta ligo, mata dusu nefsa taki. ⁴ Mata ayinu himar ta akutaki Israeli awu bagara towo waga fi taraf sika wa dusu nefsa taki min umun, inta bisaidu wa gowumu hayiwan de ashan bigum tani. ⁵ Mara ma bilibisu gumas al rajil gi libisu, wa Kaman rujal ma keli libisu gumas ta nuswan. Zol al amulu hajat al mokroh min Yahweh Rabuna takum. ⁶ Iza kan inta ayinu beit ta ter gidam sika taki, aufi shejera, aufi wata, wa fogo beidat au iyal ta ter fogo, wa uma de gi geni fi ras beidat au iyal ta ter de, mata shilu uma de. ⁷ Kede inta sibu uma de keli ruwa, lakin inta bishilu iyal ta ter de. Ehterim kalam de ashan bikun kwes ma inta, wa ayam taki bikun towil. ⁸ Iza kan inta abinu juwa jedid, keli inta amulu hoss al bikati beit taki, ashan zol keli ma waga juwa wa zamb ta dom ta zol de bikun fi ras taki. ⁹ Inta keli ma zarau fi mazara taki itnen shikil ta bizira fi mahal / hufura wahed, ashan keli ma demiru karabu hajat al binijitu min mazra taki de wa bi kadisu le kahana. ¹⁰ Inta kaman ma bi kuruju ma itnen shikil ta haywan, bagara wa himar fi mahal wahid sawa. ¹¹ Inta keli ma libisu gumash al amulu min suf wa katan sawa. ¹² Intum bi jemilu arkan ta malabis al intum bi libisu. ¹³ Kan rajil jouzu mara wa geni ma hiya, wara de huwo aba mara de, ¹⁴ Wa taham mara de gali hiya amulu fadiya, wa karabu isim ta mara de, gali ana kan jouzu mara de, lakin zaman al ana geni ma hiya, ana ma ligo isbat biwori mara de azraa (awu ma geni ma hiya gubal kida). ¹⁵ Biga abu wa uma ta binia de bitala isbat al biwori binia towomon azraa gidam ta shiyuk fi bab ta medina. ¹⁶ Abu ta binia bikelim le shiyuk, ana kan wodi binia tai le rajil ze mara towo, wa huwo aba hiya, ¹⁷ Ayinu takum huwo taham hiya bianu hiya amulu fadia, wa gali “ana ma ligo min binia taki isbat ta geni azraa”, lakin isbat yau de gi wori binia tai azraa. Biga umon bifata gumas de gidam shiyuk ta medina. ¹⁸ Shiyuk ta medina bishilu rajil de wa biwodi lowo ikab, ¹⁹ Humon biasuru huwo keli dafa garama miya shekel min fadia, wa biwodi le abu ta binia, ashan rajil de wodi suma al batal le azraa ta Israel wa mara de bestemir mara towo, huwo ma bitalagu mara de fi haya bitowo kulu. ²⁰ Lakin lou kalam ta rajil de tala hagiga, mafi isbat ta azraa fogo mara binia de, ²¹ Biga bitalau binia de gidam bab ta beit ta abu towo wa rajil ta medina bidurubu hiya be hujar hata huwo bi mutu, ashan hiya amulu shokol ta fadia fi Israel, hiya amulu sokol zina fi beit ta abu ta hiya. Intum bitala sher fi nus bitakum. ²² Iza kan gobudu rajil gin um ma mara al jouzu ma rajil tani, umon kulu bimutu, rajil al kan gi num ma mara wa mara benesa towo; wa itum bitala sher fi nus ta Israel. ²³ Iza kan fi binia azraa katibu hajusu le rajil, wa rajil tani ligo hiya fi medina wan um ma hiya, ²⁴ Keli shilu umon kulu le bab ta medina, wa keli durubu umon be hujar hata mutu. Intum bidurubu biinia ma hajer ashan hiya kan ma kore, hata ze hiya kan fi medina. Intum bidurubu rajil ashan huwo karabu mara ta aku bitowo, intum keli tala sher min nus takum. ²⁵ Lakin iza kan rajil ligo binia al hajisu katibu fi mahal zeraa, wa gobudu hiya wan um ma hiya, rajil barau yawu bikatulu. ²⁶ Le binia intum ma bi amulu le hiya ayi haja; mafi katia al bikutu bikatulu binia de. Ashan hala de ze rajil hajim aku bitowo wa katulu huwo. ²⁷ Ashan huwo kan ligo hiya fi mahal zera; binia de kan kore, lakin kan mafi zol al bi saidu hiya. ²⁸ Iza kan rajil ligo binia al azra rajil ma habisu hiya lisa, Kaman ma hajisu, iza kan huwo gobudu hiya wan um ma hiya, wa iza kan arufu kalam de, ²⁹ Biga rajil al num ma hiya bidafa kamsin shekel min fida le abu ta binia, wa hiya bikun mara bitowo, ashan hiya karabu hiya. Huwo ma bitalagu hiya fi haya bitowo kulu. ³⁰ . Rajil ma bishilu mara ta rajil towo ze mara towo, huwo ma bishilu hak ta zawaj ta abi towo