¹ Pamulandu twalilungamikwa ku cicetekelo, twaba mumutende na Lesa ukupitila muli Yesu Klistu Shikulu. ² Ukupitila muli ena emo tukwatila ukupitila mucicetekelo kucikuku apo twashintilila, kabili tusaminwa mwisumino lyalulumbi lwakwa Lesa. ³ Teico ceka awe, lelo tusangalala namukucula kwesu. Pantu twaishiba ukuti ukucula kwesu ekushipa. ⁴ Ukushipikisha kuleta umubelo, nomubelo uleta isubilo, ⁵ kabili isubilo nalyo talileta ukusekwa pantu ukutemwa kwakwa Lesa kwaisula mumitima yesu ukupitila mumupashi wamushilo, uwapelwe kuli fwebo. ⁶ Pantu ilyo fwebo twali abanaka, panshita iyalingwa Yesu afwilile abashali bakwalesa. ⁷ Pantu caba icakosa ukufwila umuntu umulungami, nangu cakuti umo kuti limbi afwila umuntu umusuma. ⁸ Lelo Lesa alanga ukutemwa kwakwe kuli fwebo, pantu ilyo fwebo twali ababembu, Klistu alitufwilile. ⁹ Nokucilisha, limbi, nomba icakuti fwebo twalungamikwa kumulopa wakwe, kabili tukapusushiwa kumulopa wine ukufuma kucipyu cakwa Lesa. ¹⁰ Icakuti, ilyo twali abalwani, tabweseshiwe kuli Lesa ukupitila mumfwa yamwana wakwe, ukucilisha, napanuma yakutubwesha, tulinokupusushiwa kumweo wakwe. ¹¹ Teico ceka, tusangalala muli Lesa ukupitila muli Shikulu Yesu Klistu, uyo fwebo ukupila muli ena nomba twapokelela ubu bwampano. ¹² Eico, ngefyo ukupitila mumuntu umo ulubembu lwaingile mwisonde. Nemfwa yasalanganine kubantu bonse, pantu bonse balibembwike. ¹³ Ukusukilafye ifunde, ulubembu lwaisaingila mwisonde, pantu takwaba ukwishiba ulubembu ilyo takuli ifunde. ¹⁴ Nangu cibefyo, imfwa yatuntwike ukufuma kuli Adam ukwisafika kuli Mose, ukufikafye nakulibonse abashabembwike ngokukana nakila kwakwa Adam, ukuli ngecakumwenako kuli uyo uwali nokwisa. ¹⁵ Lelo icabupe tacali ngecakweshiwa. Pantu kukweshiwa kwaumo abengi balifwa, ngobwingi bwacikuku cakwa Lesa kabili necabupe cacikuku mumwaume umo, Yesu Klistu, cashunguluka abengi! ¹⁶ Icabupe tecintu icafuma kulubembu lwaumo uyo. Ubupingushi bukonka ububi bumo nokuleta mukusekwa, lelo icabupe cikonka ukulufyanya ukwingi nokuleta ukulungamikwa. ¹⁷ Ngacakuti, ngakulufyanya kwaumo, imfwa yaishile ukupitila muli umo, ngokufula kwamusango shani kulyabo abapokelela ukufulisha kwacikuku necabupe cabulungami iciteka mumweo ukupitila muli umo, Yesu Klistu. ¹⁸ Eico nomba, ngefyo ukubembuka kwatwele kukusushiwa kwabantu bonse, efyo ukubombafye kumo ukwacicetekelo kwaletele ubulungami nomweo kubantu bonse. ¹⁹ Pantu ukupitila mukukana umfwa kwamuntu umo abengi baishileba ababembu, ngefyo ukupitila mucumfwilo icaumo emo abengi balengelwe abacetekela. ²⁰ Lelo ifunde lyaishile mukufusha ulubembu. Lelo uko ulubembu lusangwa, eko icikuku cifulisha. ²¹ Ici cacitike ukuti, ilyo ulubembu luleteka mumfwa, elo necikuku cinga teka ukupitila mukucetekela kwamweo wamuyayaya ukupitila muli Yesu Klistu Shikulu wesu.