¹ Kanshi finshi tukalanda? Bushe tufwile ukutwalilila mulubembu pakuti icikuku cingekalilila nafwebo? ² Tacifwile ukuba ifyo. Fwebo fwebafwa kulubembu, kuti twatwalilila shani kabili mulubembu? ³ Bushe tamwaishiba ukuti ifyo abengi ababatishiwe muli Klistu Yesu babatishiwe mumfwa yakwe? ⁴ Twashikilwee, kabili, nao ukupitila mulubatisho mumfwa. Ici cacitike pakuti ngefyo Klistu abukile ukufuma kumfwa kululumbi lwakwa Wishi, eifyo tufwile ukwenda mumweo uupya. ⁵ Pantu ngacakuti twaikatana nankwe mukupalana nankwe mumfwa yakwe, tuli nokwikatana nankwe mukubuka kwakwe. ⁶ Twalishiba ici, ukuti umukote wesu umwaume atanikwe nao pakuti umubili walubembu wingonaulwa. Ici cacitike pakuti fwebo tatuli basha kabili abalubembu. ⁷ Uyo uwafwa etwa umulungami ukulosha kulubembu. ⁸ Nomba ngacakuti twafwile na Yesu, fwebo twasumina ukuti tukekala nankwe. ⁹ Fwebo twaishiba ukuti Ifyo fine Yesu abukile kubafwa, tekuti afwe nakambi; imfwa taikwete amaka pali ena nakambi. ¹⁰ Kanshi ukulosha kumfwa ukuti afwile kulubembu, afwile limo ukufwila bonse. Nangu cibefyo, umweo ekala, ekala umweo wakwa Lesa. ¹¹ Mumusango umo wine, namwebo mufwile mwaipenda abafwa kulubembu, lelo abamweo kuli Lesa muli Klistu Yesu. ¹² Kanshi mwileka ulubembu luteke mumibili wenu iibola pakuti munakile kulunkumbwa lwamubili. ¹³ Mwipela filundwa fyamubili kulubembu, ukuba ifibombelo fyafishalungama. Lelo ipeleni mwebene kuli Lesa ngabo bonse abaipela kufuma kumfwa ukuya kumweo, nokupela ifilundwa fyamubili kuli Lesa ngefibombelo fyakubonfya ifyabulungami. ¹⁴ Mwileka ulubembu lumiteke. Pantu tamuli pesamba lyalubembu, lelomuli mucikuku. ¹⁵ Kanshi cinshi? Bushe nomba tufwile ukubembu pantu tatuli pesemba lyefunde? ¹⁶ Tekuti cibefyo iyo. Bushe tamwaishiba ukuti ngamwaipela mwebene ngabasha, ninshi mwaba abasha kuli uyo mwebene munakila? Mwaba abasha kulubembu, ulutwala kumfwa, nangu abasha kucumfwilo, icitwala kubulungami. ¹⁷ Ukutasha kube kuli Lesa! pantu mwali abasha kulubembu, nomba mwanakila ukufuma mumitima icilangililo cakufunda icomwapelwe. ¹⁸ Mwaba abakaele ukufuma kulubembu, nokulengwa abasha babulungami. ¹⁹ Ndelanda ngomuntu pamulandu wakunaka kwaminofu yenu. Ngefyo mupela ifilundwa fyamibili yenu kufishasangululwa nakufibi, mumusango umo wine, nomba kanshi peleni ifilundwa fyamibili yenu nabasha babulungami kukusangululwa. ²⁰ Pantu ilyo mwali abasha balubembu, mwali abakaele kubulungami. ²¹ Pali ilyanshita, bushe cisabo nshi mwakwete icafintu ifilemilenga ukuba abansoni? Pantu ifitumbukamo mulifyo fintu nimfwa. ²² Nomba pamulandu wakuba abakaele ukufuma kulubembu nokuba abasha kuli Lesa, mwakwata icisabo cakushishiwa. Icifumamo mweo wamuyayaya. ²³ Pantu cilambu calubembu nimfwa, lelo icabupe cakwa Lesa mweo wamuyayaya muli Klistu Yesu Shikulu wesu.