¹ Pokeleleni onse uwanaka mucicetekelo, ukwabula ukupingu mukutalikana. ² Umo umuntu ngali mucicetekelo ukulya ifili fyonse, umbi uwanaka alyefye umusalu weka. ³ Na umo ulya fyonse tafwile ukusula uushilya; naumo uushilya fyonse epingula umubiye uulya fyonse. Pantu Lesa alipokelela ena. ⁴ Niwebo nani, we upingula umubomfi waumbi? Nikuntanshi yakwa Shikulu wakwe uko engeminina nangu ukupona. Pantu alengelwa ukwiminina, pantu Shikulu kuti amulenga ukwimimina. ⁵ Umuntu umo kuti amonati ubushiku bumo bwali cindama ukucila ububiye, bambi balanda ati inshiku shalilingana. Lekeni cila umo ashininwe mumatontonkanyo. ⁶ Uwasunga ubushiku, nikuli Shikulu asungila; na ulelya, aliila kuli Shikulu, pantu natotela kuli Lesa. Uyo ushilelya, akanina ukulya muli Shikulu, nao natotela kuli Lesa. ⁷ Pantu takuli uwa muli fwebo uwingekalila nobumi umwine, kabili takuli uwingafwila umwine. ⁸ Pantu nga twaba no bumi, ni kuli Shikulu twabela no bumi, kabili ngatwafwa, ni kuli Shikulu twafwila. Elyo nangu twaba no bumi nangu twafwa, tuli bakwa Shikulu. ⁹ Nipali uyu wine mulandu Klistu afwilile na ukwikala peka, pakuti abe ni Shikulu wa bonse abafwa na abo aba bumi. ¹⁰ Nomba webo, cinshi upingwila munonko? Na webo cinshi usulila munonko obe? Pantu fwebo bonse tuli no kwiminina kuntanshi ya bupingulo ku cipuna cakwa Lesa. ¹¹ Pantu calilembwa, "ngefyo ndikala," efyo Shikulu alanda, "Kuli nebo ikufi lyonse likafukama, no lulimi lonse luli no kuyebelela kuli Lesa." ¹² Elo nomba, fwebo cila umo tukaya ilubulwila kuli Lesa. ¹³ Eico, twila bwekeshapo ukupingula umo no munankwe, nomba saleni ici, nangu umo eba icakuipuntulako nangu ica kulufyanya munyina. ¹⁴ Nebo ninjiba ukucetekela kwandi muli Shikulu Yesu nalishininkisha ukuti takwaba icakulya icikowesha. Cili kuli uyo umwine uwamona ukuti cilakowesha, kuli ena kuti camukowesha. ¹⁵ Pa mulandu waca kulya munonko nga akukalifya, ninshi tauleenda mukutemwa. Taulingile ukulenga munonko ukonaika pamulandu wa cakulya untu Klistu afwilile. ¹⁶ Elo wisuminishisha ico webo ulemona ukuti cisuma cilandilwe mububi. ¹⁷ Pantu ubufumu bwakwa Lesa tabuli mucakulya nangu mukunwa, lelo mukuba abakaele, aba mutende, nensansa mumupashi wa mushilo. ¹⁸ Pantu kuli uyo uwapuswishe Klistu munshila iyo alisuminishiwa kuli Lesa na bantu bali shinkinisha. ¹⁹ Eico nomba, lekeni tulolekeshe pafintu ifya mutende na pafintu ifya kukula umo no mubiye. ²⁰ Mwi onaula umulimo wakwa Lesa pamulandu no kulya. Ifintu fyonse fyalisanguluka, nomba cibi umuntu ukulya ico conse icingalenga umo ukubifya. ²¹ Cisuma ukukanalya inama, nangu ukukana nwa ubwalwa, nokukana cita ico conse icingalenga munonko ukuba mububi. ²² Icicetekelo mwakwata, cisungeni pakatikenu na Lesa. Alishuka uyo onse uucita ifintu amwene ukuti fya cine. ²³ Lelo uyo ulya icintu ninshi alimukutwishika, pamulandu wakuti tamuli icicetekelo. Na conse umushili cicetekelo lubembu.