¹ Umuntu onse abe uwanakila ku ntungulushi shikalamba, pantu ubutungulushi tabufuma kumbi kano bwasontwa na Lesa. ² Onse uulimukukanya batungulushi ninshi alimukupinkana nefunde lyakwa Lesa: na bonso aba pinkana nalyo bakapokelela ubupingushi abene. ³ Pantu bantungulushi tababa icakutinya kuli balya balimukucita icisuma, kano kuli balya abalimukucita ifibi. Mulefwaya ukukanalatina bantungulushi? ⁴ Citeni icisuma, elo mukapokelela ukutasha kwabo Pantu nintungulushi yakwa kukucita icisuma pali mwebo. Nomba nga mwacita icibi, pantu tasenele umupanga uwabula incito. Pantu mubomfi wakwa Lesa, uwacita ubukali ku ulecita icibi, ⁵ pali ico mufwile mwanakila, tepamulandufye wa bukali, lelo na pamundu wa kampingu. ⁶ Pamulandu waici mulaleta no mutulo. Pantu intungulushi babomfi bakwa Lesa abakonkanyapo kuli iciine. ⁷ Peleni ku uli onse eco alingile ukukwata umutulo kuo umutulo ufwile ukupelwako, umusangulo kuo umusangulo ufwile ukupelwako, umucinshi kuo umucinshi ufwile ukupelwako. ⁸ Mwikakililwa kucili conse, ukufumyakofye ukutemwa cilaumo no munankwe. pantu onse uuli mukutemwa umunankwe ali mukufikilisha amafunde. ⁹ Amafunde, "wilacita ubucende, wilaipaya, wilaba nolunkumbwa." ¹⁰ Nga naukwata ukutemwa tawacite munobe icibi. Eico ukutemwa ekufikilisha kwe funde. ¹¹ Pamulndu waici, namwishiba inshita ino enshita yakuti mushibuke mutulo. Pantu ipusukilo nalipalama ukucila liya mwasumina. ¹² Ubushiku bulimupepi nokupita nakasuba nakabalika nakale. Natu fumyepo imilimo yamfishi. natufwale ifyanso fya bulwi. ¹³ Lekeni twende muli bubwino nga abantu abenda mulubuto lwa kasuba, temuli bucakolwa nangu mukusekelela kwa bucakolwa: twiendela mubulalelale nangu mulu buli mulunkumbwa, na mukalumwa. ¹⁴ Nomba fwaleni shikulu Yesu Klistu, kabili mwila umfwila ififwaya umubili, kukufikilisha fintu umubili ufwaya.