¹ Imbah nitu, Yesus baucap ka buhannya, "Aku mamadahi nang sabujurnya ka ikam, ada babarapa urang nang haratan badiri di sini nang kada mati sampai buhannya malihat Karajaan Allah datang lawan kuasa". Yesus Basama Musa wan Elian ² Imbah anam hari, Yesus maajak Petrus, Yakobus, wan Yohanes, lalu mambawa buhannya manyandiri ka gunung nang tinggi. Lalu, Yesus baubah rupa di hadapan buhannya. ³ Baju Sidin jadi camarlang wan putih banar. Kadada tukang pamutih kain di dunia kawa mamutihakan nang kaya itu. ⁴ Lalu, mancungul di hadapan buhannya, Elia basama lawan Musa, buhannya haratan bapander lawan Yesus. ⁵ Imbah nitu, Petrus baucap ka Yesus, "Rabi, sangat baik kami barada di sini, ayo kita maolah tiga kemah, sabuting gasan pian, sabuting gasan Musa, wan sabuting gasan Elia." ⁶ Sabab, Petrus kada tahu harus manjawab karna buhannya takutan. ⁷ Lalu, muncullah awan manaungi buhannya, tadangarlah suara nang datang dari awan itu, ujar Nya, "Inilah Anak-Ku nang tarkasih. Dangarakan Sidin!" ⁸ Saat itu jua, imbah buhannya malihat ka sakitar, buhannya kada malihat siapa pun basama buhannya kacuali Yesus. ⁹ Samantara buhannya turun dari gunung, Yesus mambari parintah ka buhannya supaya kada mambaritahu siapa haja manganai apa nang sudah buhannya lihat, sampai Anak Manusia bangkit dari antara urang mati. ¹⁰ Karna itu, buhannya marahasiakan panderan nitu gasan buhannya saurang sambil batakun dalam hati apa artinya kabangkitan dari kamatian nitu. ¹¹ Lalu, buhannya batakun ka Yesus, "Mangapa buhan ahli Taurat baucap bahwa Elia harus datang badahulu?" ¹² Lalu, Yesus baucap ka buhannya, "Elia memang datang badahulu gasan mamulihkan sagala sasuatu. Wan, nang kaya apa tatulis manganai Anak Manusia bahwa Sidin harus mandarita banyak hal wan dihina? ¹³ Namun, Aku baucap ka ikam bahwa Elia memang sudah datang, wan buhannya mamparlakuakannya sasuai lawan apa nang dihandaki buhannya, nang kaya tatulis manganai inya." Buhan Murid Kada Sanggup Malapasakan Roh Jahat dari Saikung Urang ¹⁴ Imbah nitu, katika Yesus, Petrus, Yakobus, wan Yohanes kambali ka murid-murid, buhannya malihat karumunan urang banyak di sakaliling murid-murid nitu, wan buhan ahli Taurat haratan badabat lawan buhannya. ¹⁵ Hancap imbah sabarataan urang malihat Yesus, buhannya takajut wan bukah gasan manyambut Sidin. ¹⁶ Lalu, Yesus batakun ka buhannya,"apa nang ikam dabatakan lawan ahli-ahli Taurat nitu?" ¹⁷ Saurang dari karumunan nitu manjawab Sidin, "Guru, ulun mambawa ulun nang lakian ka Pian karna inya karasukan roh nang mambuatnya bisu. ¹⁸ Satiap kali roh nitu manguasainya, inya mambatingnya ka tanah wan inya mangaluarakan busa dari muntungnya, wan mangartakkan giginya, lalu inya manjadi kejang. Ulun maminta murid-murid Pian mangusir roh nitu, tapi buhannya kada sanggup." ¹⁹ Yesus manjawab buhannya wan baucap, "Hai, ganarasi nang kada baiman! Barapa lama lagi Aku harus basama ikam? Barapa lama lagi Aku harus batahan lawan ikam? Bawa anak nitu lawan Ku!" ²⁰ Lalu, buhannya mambawa anak itu ka Yesus. Katika roh itu malihat Yesus, inya langsung mangguncang-gucang anak itu. Anak itu jatuh ka tanah wan taguling-guling lawan muntung nang mangaluarakan busa. ²¹ Imbah nitu, Yesus batakun ka abah anak itu, "Sudah barapa lawas hal ini tajadi ka inya?" Jawabnya, "Tumatan halus. ²² wan, roh itu rancak manimbainya ka dalam api wan ka dalam air gasan mahancurakan inya. Tatapi, jika Pian kawa babuat sasuatu, kasihani kami dan tolong kami." ²³ Yesus baucap ka inya, "Jika Pian kawa? Sagala sasuatu kawa gasan buhannya nang parcaya." ²⁴ Hancap abah anak itu manangis wan basaru, "Aku parcaya! Tolonglah karaguanku!" ²⁵ Katika Yesus malihat bahwa urang banyak datang bakarumun, Sidin mambantak roh itu sambil baucap ka inya, "Ikam roh bisu wan tuli, Aku parintahakan ikam kaluar dari anak ini wan jangan mamasuki inya lagi!" ²⁶ Imbah manjarit wan mangguncang-guncang anak itu, maka roh itu kaluar. Anak itu jadi nang kaya urang mati sahingga urang banyak itu baucap, "Inya mati!" ²⁷ Tatapi, Yesus mamingkuti tangan anak itu wan mambangunakannya, lalu anak itu badiri. ²⁸ Katika Yesus masuk ka dalam rumah, murid-murid Sidin batakun ka Sidin sacara pribadi, "Mangapa kami kada kawa mangusirnya?" ²⁹ Sidin baucap ka buhannya, "Jenis ini kada kawa kaluar kacuali lawan doa." Yesus Mangisahi Manganai Kamatian Sidin ³⁰ Dari sana, Yesus wan murid-murid Sidin tulak malewati wilayah Galilea. Sidin kada hakun ada nang tahu. ³¹ Sabab, Sidin mangajar murid-murid Sidin wan baucap ka buhannya, "Anak Manusia cagar dijulung ka tangan manusia, buhannya cagar mambunuh Sidin. Imbah Sidin dibunuh, tiga hari imbah nitu Sidin pacang bangkit." ³² Tapi buhan murid kada paham panderan nitu wan kada wani batakun ka Sidin. Bubuhannya Bahual Siapa nang Paling Utama ³³ Imbah nitu, Yesus wan murid-murid Sidin sampai di Kapernaum. Imbah Yesus sudah di dalam rumah, Sidin batakun ka buhannya, "Apa nang buhan ikam panderi tadi di jalan?" ³⁴ Tapi buhannya bahinip sabab sapanjang jalan buhannya bahual tantang siapa yang utama. ³⁵ Lalu Yesus dudukan wan mangiau kadua belas murid Sidin. Sidin baucap ka buhannya, "Amun handak jadi nomor satu, inya harus jadi nang pandudi dari sabarataan wan palayan barataannya." ³⁶ Imbah nitu, Yesus maambil saikung anak halus wan manampatakannya badiri di tangah buhannya. Sambil mamaluk anak nitu, Sidin baucap ka buhannya, ³⁷ "Siapa haja nang manyambut kanakan halus nang kaya ini atas ngaran-Ku, inya manyambut Aku. Siapa haja nang manyambut Aku, kada manyambut Aku, tapi manyambut Sidin nang mautus Aku." Urang Nang Mangusir Setan dalam Ngaran Yesus ³⁸ Yohanes baucap ka Yesus, "Guru, kami malihat urang mangusir setan-setan dalam ngaran Pian, kami manangati sabab inya kada maumpati kita." ³⁹ Tapi, Yesus baucap, "Jangan manangati sabab kada urang nang nang malakukan mujizat atas ngaran-Ku, bisa saat itu jua manghujat Aku. ⁴⁰ Sabab, siapa nang kada bamusuhan lawan kita, ada dipihak kita. ⁴¹ Sabab, Aku mamadahakan nang sabujurnya ka ikam, siapa haja nang mambari ikam sacangkir banyu sabab ikam pangikut Kristus, kada pacang hilang upahnya." Tantang Panyabab Dosa ⁴² Siapa haja nang manyababkan saikung kakanakan halus nang parcaya ka Aku jadi badosa, labih baik jika sabiji batu kilangan nang ganal digantung di gulunya wan inya dibuang ka laut. ⁴³ Wan, jika tangan ikam manyababkan ikam badosa, tatak tangan ikam tu, labih baik ikam masuk surga awan tangan buntung, daripada awan dua tangan masuk neraka, ka dalam api nang kada suah padam, ⁴⁴ tampat nang ulatnya kada bamatian wan apinya kadada padamnya. ⁴⁵ Wan, jika batis ikam manyababkan ikam badosa, tatak batis ikam tu. Labih baik ikam masuk surga awan batis buntung, daripada awan dua batis ditimbai ka dalam naraka, ⁴⁶ tampat nang ulatnya kada bamatian wan apinya kadada padamnya. ⁴⁷ Wan, jika mata ikam manyababkan ikam badosa, cungkillah mata ikam tu. Labih baik ikam masuk ka Karajaan Allah awan sabiji mata daripada awan dua mata ditimbai ka dalam naraka, ⁴⁸ tampat nang ulatnya kada bamatian wan apinya kadada padamnya. ⁴⁹ Sabab, sabarataan urang pacang diuyahi awan api. ⁵⁰ Uyah nitu bagus, tapi bila uyah nitu kadada masinnya, kaya apa ikam kawa mambaikinya jadi masin pulang? Baisilah uyah di hidup ikam wan badamailah awan barataan urang."