¹ Pada hari-hari nitu, katika banyak urang bakumpul wan kadada gasan dimakan, Yesus mangiauw murid-murid Sidin wan baucap ka buhannya, ² Aku marasa maras ka urang banyak nitu karana wayahini buhannya basama lawan-Ku salama tiga hari, kadada apa-apa gasan dimakan. ³ Jika Aku manyuruh buhannya bulik ka rumah buhannya dalam kaadaan lapar, buhannya cagar pingsan dalam parjalanan karana babarapa dari buhannya datang dari jauh." ⁴ Murid-murid Sidin manjawab, "Dari mana saikung urang kawa manganyangakan buhannya lawan roti di wadah sunyi kaya ini?" ⁵ Lalu, Yesus batakun ka buhannya, "Barapa roti ampun ikam?" ⁶ Imbah nitu, Yesus mamarintahkan urang banyak nitu duduk di tanah, Sidin mangambil tujuh roti nitu, wan basyukur, Sidin mamacah-macahakannya, dibariakannya ka murid-murid Sidin gasan dihidangakannya ka urang banyak. Buhannya pun mahidangakannya ka uang banyak. ⁷ Murid-murid Sidin jua baisi sadikit iwak halus. Imbah basyukur atasnya, Yesus manyuruh murid-murid Sidin gasan mambagiakan jua iwak-iwak nitu ka urang banyak. ⁸ Urang banyak nitu makan sampai kanyang, buhannya mangumpulakan sisa potongan makanan sabanyak tujuh karanjang. ⁹ Kira-kira ada ampat ribu urang nang makan, imbah nitu, Yesus manyuruh buhannya tulak. ¹⁰ Lalu Yesus hancap masuk ka jukung baimbai murid-murid Sidin wan sampai di daerah Dalmanuta. Yesus Diminta Manunjukakan Tanda dari Surga ¹¹ Urang-urang Farisi datang wan mulai badabat lawan Yesus, sambil maminta Yesus manunjukakan tanda dari surga, gasan mancobai Sidin. ¹² Imbah Yesus manarik napas panjang dalam Roh Sidin, Sidin baucap, " Mangapa ganarasi ini mancari tanda? Aku baucap nang sabujurnya ka ikam, kadada satu pun tanda nang cagar dijulung ka ganarasi ini." ¹³ Imbah nitu, Yesus maningalakan buhannya, masuk pulang ka dalam jukung, wan tulak ka sabarang. Ragi Urang Farisi wan Ragi Herodes ¹⁴ Murid-murid kada ingat mambawa roti, hanya baisi sapotong roti di dalam jukung. ¹⁵ Yesus bapasan ka buhannya, " Siap sadialah! ba hati-hati tahadap ragi urang-urang Farisi wan ragi Herodes." ¹⁶ Lalu buhannya mulai badiskusi satu lawan nang lain soal buhannya nang kada baisi roti. ¹⁷ Imbah mangatahui hal ini, Yesus baucap ka buhannya, "Mangapa ikam bapander tantang ikam nang kada baisi roti? Apa ikam balum jua mangatahui atawa paham? Apa hati ikam dikarasakan? ¹⁸ Apakah ikam baisi mata, tapi kada malihat? Baisi talinga, tapi kada mandangar? Kada ingat kah ikam, ¹⁹ katika Aku mamacah-macahkan lima roti gasan lima ribu urang, barapa banyak karanjang nang hibak lawan potongan-potongan makanan nang ikam kumpulakan?" Buhannya manjawab, "Dua belas karanjang." ²⁰ Katika tujuh roti gasan ampat ribu urang nitu, barapa karanjang nang hibak lawan potongan-potongan makanan nang ikam kumpulakan?" Buhannya manjawab, "tujuh karanjang." ²¹ Lalu, Sidin baucap ka buhannya, "Apakah ikam masih kada paham?" Yesus Manyambuhakan Urang Buta di Betsaida ²² Imbah nitu, Yesus wan murid-murid Sidin sampai di Betsaida, Babarapa urang buta mamohon ka Yesus supaya mamingkutinya. ²³ Yesus pun mamingkuti tangan urang buta nitu wan mambawanya ka luar desa. Lalu, Yesus maludahi mata urang buta nitu wan maandak tangan-Nya di atas inya. Sidin batakun ka inya, "Apakah ikam malihat sasuatu?" ²⁴ Lalu, urang nitu mamandang ka atas wan baucap, "Ulun malihat urang-urang, tapi buhannya talihat nang kaya pohon-pohon nang lagi bajalan." ²⁵ Imbah nitu, Yesus maandak pulang tangan-Nya di atas mata urang nitu, lalu urang nitu mambuka matanya, panglihatannya sambuh, wan inya pun kawa malihat sabarataan. ²⁶ Lalu, Yesus manyuruh inya bulik ka rumahnya wan baucap, "Kada boleh masuk ka dalam desa." Yesus Adalah Kristus ²⁷ Imbah nitu, Yesus tulak basama murid-murid Sidin, ka desa-desa di Kaisarea Filipi. Di tangah parjalanan, Yesus batakun ka para murid wan baucap ka buhannya, "Ujar urang-urang, siapa Aku ini?" ²⁸ Buhannya manjawab, "Yohanes Pambaptis, nang lain baucap Elia, wan nang lainnya salah satu dari nabi-nabi." ²⁹ Imbah nitu, Yesus batakun ka buhannya, "Namun, manurut ikam, siapa Aku ini?" Petrus manjawab Sidin, "Engkau adalah Kristus." ³⁰ Yesus maingatakan buhannya supaya kada mambaritahu ka siapa haja manganai diri Sidin. Pambaritahuan Manganai Pandaritaan Yesus ³¹ Imbah nitu, Yesus mulai mangajar murid-murid Sidin bahwa Anak Manusia harus mandarita banyak hal wan ditolak oleh tua-tua Yahudi, imam-imam kapala, serta ahli-ahli Taurat, wan dibunuh, imbah tiga hari bangkit kambali. ³² Yesus mangatakan hal ini sacara tabuka, karna nitu, Petrus manarik Yesus ka higa wan mulai managur Sidin. ³³ Namun, sambil manoleh wan malihat murid-murid Sidin, Yesus managur Petrus wan baucap, "Bajauh dari Ku, hai Iblis! Sabab, ikam kada mamikirakan parkara-parkara Allah, tatapi parkara-parkara manusia." ³⁴ Imbah nitu, Yesus mangiau urang banyak, sarta murid-murid Sidin, wan baucap ka buhannya, "Jika saurang handak maumpati Aku, inya harus manyangkal dirinya, lalu maumpati Aku. ³⁵ Sabab, Siapa haja nang handak manyalamatakan nyawanya cagar kahilangannya. Tatapi, siapa haja nang kahilangan nyawanya demi Aku wan Injil cagar disalamatakan. ³⁶ Sabab, apa untungnya saurang mandapat sabarataan dunia, tatapi kahilangan nyawanya? ³⁷ Apa nang kawa saurang bariakan gasan manabus nyawanya? ³⁸ Sabab, siapa haja nang supan karna Aku wan firman-Ku di ganarasi nang kada satia wan badosa ini, maka Anak Manusia jua supan mangakui urang nitu katika Sidin datang dalam kamuliaan Bapa-Nya basama lawan malaikat-malaikat nang kudus."