¹ Lalu, bakumpullah urang-urang Farisi manamui Yesus basama lawan babarapa ahli Taurat nang datang dari Yerusalem. ² Buhannya malihat babarapa murid Yesus makan roti lawan tangan najis, yaitu tangan nang kada dibasuh. ³ Sabab, urang-urang Farisi wan sabarataan urang Yahudi kada kawa makan jika tangan buhannya kada dibasuh sampai ka pargalangan tangan karana tradisi nenek moyang nang dipingkut buhannya. ⁴ Jika urang-urang Yahudi datang dari wadah umum, buhannya kada kawa makan sabalum mambasuh tangan. Ada banyak tradisi lainnya nang buhannya tarima gasan dipingkut, nang kaya pambasuhan cawan-cawan, kendi-kendi, dan bejana-bejana tembaga. ⁵ Imbah nitu, urang-urang Farisi wan ahli-ahli Taurat batakun ka Yesus, "kanapa murid-murid Pian kada hidup sasuai tradisi nenek moyang, tapi malah makan roti lawan tangan nanjis?" ⁶ Yesus baucap ka buhannya, "Yesaya banubuat bujur banar tantang ikam nang munafik, nang kaya tatulis: 'Bangsa ini manghormati Aku lawan bibir buhannya, Tapi hati buhannya jauh dari Aku. ⁷ Buhannya manyambah -Ku awan sia-sia karana mangajarakan ajaran parintah-parintah nang dibuat oleh manusia.' ⁸ Sambil mangabaiakan parintah Allah, ikam mamingkut kuat tradisi manusia." ⁹ Lalu, Yesus jua baucap ka buhannya, "Lawan cardik ikam manolak parintah Allah sahingga kawa mampartahanakan tradisi ikam saurang. ¹⁰ Sabab, Musa baucap 'Hormatilah abah wan uma ikam', wan, 'Siapa haja nang mangutuk abah nya atawa umanya harus dihukum mati.' ¹¹ Namun, Ikam baucap jika saikung urang baucap ka abahnya atawa umanya, 'Apa haja kauntungan nang cagar ikam dapat dari inya adalah kurban, yaitu parsambahan,' ¹² lalu ikam kada lagi mangizinakan inya maolah apa haja gasah abahnya atawa umanya, ¹³ lawan nitu ikam sudah mambatalakan firman Allah awan tradisi ikam nang sudah turun-tamurun. Wan ikam malakuakan banyak hal kayak ini." ¹⁴ Imbah nitu, Yesus mangiauw sabarataan urang wan baucap ka buhannya, "Dangarlah Aku, ikam barataan, wan pahamilah. ¹⁵ Kadada sasuatu pun dari luar manusia nang masuk ka dalam dirinya kawa manajisakannya, tapi hal-hal nang kaluar dari manusialah nang manajisakannya." ¹⁶ "Jika saikung urang baisi talinga gasan mandangar, biarlah inya mandangar!" ¹⁷ Lalu, katika Yesus masuk ka rumah wan maninggalakan urang-urang nitu, murid-murid Sidin batakun ka Sidin tantang parumpamaan nitu. ¹⁸ Sidin baucap ka buhannya, "Apakah ikam jua kada paham? Kadakah ikam tahu bahwa apa haja nang dari luar masuk ka dalam manusia kada kawa manajisakannya? ¹⁹ Sabab, nang masuk nitu kada masuk ka dalam hatinya, tapi ka parutnya, imbah tu kaluar ka dalam jamban." (lawan damikian, Yesus manyatakan bahwa sabarataan makanan halal.) ²⁰ Lalu Sidin baucap, " Apa nang kaluar dari manusialah nang manajisakannya. ²¹ Sabab, dari dalam, dari hati manusia, muncul pikiran-pikiran jahat, dosa-dosa seksual, pancurian, pambunuhan, ²² parzinahan, tipu daya, hawa nafsu, iri hati, fitnah, kasombongan, wan kabodohan. ²³ Sabarataan hal nang jahat nitu datang dari dalam manusia, wan nitu nang manajisakannya." Iman Saurang Wanita siro-Fenisia ²⁴ Dari wadah nitu, Yesus bangun wan tulak ka wilayah Tirus wan Sidon. Sidin masuk ka sabuah rumah wan kada handak saurang pun nang tahu, tapi Sidin kada kawa luput dari parhatian. ²⁵ Imbah mandangar tantang Yesus, saurang binian nang anak biniannya karasukan roh najis datang wan basujud di kaki Yesus. ²⁶ Binian nitu adalah urang Yunani, lahir di Siro-Fenisia. Inya mamohon ka Yesus supaya mangusir setan nitu kaluar dari anaknya. ²⁷ Imbah nitu, Yesus baucap ka binian nitu, "Biarakan kakanakan dikanyangakan badahulu. Sabab, kada baik mangambil roti ampun kakanakan wan manimbainya ka anjing-anjing." ²⁸ Tapi, binian nitu manjawab wan baucap ka Yesus, "Bujur, Tuhan. Namun, anjing-anjing ada di bawah meja pun makan remah-remah kakanakan nitu." ²⁹ Lalu, Yesus baucap ka binian nitu, "Karana ikam baucap kayaitu, ikam kawa tulak. Setan nitu sudah maninggalakan anak ikam." ³⁰ Imbah nitu, binian nitu babulik wan batamu lawan anaknya haratan barabah di wadah guring, wan setan setan nitu sudah kaluar. Urang nang Tuli Disambuhakan ³¹ Imbah nitu, Yesus kaluar dari wilayah Tirus wan tulak malawati Sidon manuju ka danau Galilea, di wilayah Dekapolis. ³² Lalu buhannya mambawa ka Yesus saurang tuli nang kada kawa bapander. Buhannya mamohon ka Yesus supaya maandak tangan Sidin atas urang nitu. ³³ Imbah nitu, Yesus mambawa urang nitu manyandiri dari kumpulan urang banyak. Sidin mamasukakan jari Sidin ka dalam talinga urang nitu, imbah maludah, Sidin manjamah lidah urang nitu. ³⁴ Lalu, Yesus mamandang ka atas langit, Sidin manarik napas panjang wan baucap, "Efata!", artinya "Terbukalah!" ³⁵ Saat itu jua, talinga urang nitu tabuka, ikatan dilidahnya talapas, lalu inya kawa bapander. ³⁶ Yesus manangati buhannya mangesahkan paristiwa nitu ka siapa haja. Tapi, samakin Sidin manangati buhannya, buhannya samakin mahabarakannya. ³⁷ Buhannya bujur-bujur takjub wan baucap, "Sidin sudah malakukan sagala sasuatu dangan baik. Sidin bahkan mambuat urang tuli mandangar wan urang bisu bapander."